ភ្នំពេញ ​៖ សែន​សុខ ​ជា​ខណ្ឌ​មួយដែលកំពុង​មានសក្ដានុពល​ក្នុងការទាក់ទាញ​វិនិយោគិន​ដើម្បីអភិវឌ្ឍន៍​ដូច​ជា​​គម្រោងផ្សារទំនើប លំនៅឋានប្រណីត​ៗ​ អាជីវកម្មលក់​រាយជាច្រើន​ទៀត ។ ​ថ្ងៃនេះ ស្ថាប័នផ្សព្វផ្សាយព័ត៌មាន ​AMS Economy នឹង​បង្ហាញពីតម្លៃដីធ្លី​ក្នុ​ងសង្កាត់នីមួយៗ​នៃខណ្ឌសែនសុខ​ សម្រាប់ជាទុន និងជាចំណេះដឹង​មួយក្នុងកា​រពិចារណា​មុននឹង​ទិញ​ដីសម្រាប់អភិវឌ្ឍន៍​គម្រោងអ្វីមួយ​ ។

យោងតា​ម​សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) ​បានបង្ហាញពីតម្លៃ​ដី​ក្នុង​សង្កាត់​នីមួយៗនៃ​ខណ្ឌសែន​សុខ ដោយក្នុង​នោះដែរ​ឃើញថា​តម្លៃដី​ក្នុង​ខណ្ឌ​នេះមានតម្លៃចន្លោះចាប់ពី ៣៥០ដុល្លារ ​រហូត​ដ​ល់ ​៤ ២០០​​ដុល្លារអាមេរិក​ក្នុងមួយម៉ែត្រ​ការ៉េ ដែល​មានបែងចែកទៅតាម​សង្កាត់នីមួយៗ ។

១. សង្កាត់ភ្នំពេញថ្មី ៖ សង្កាត់នេះ​តម្លៃដីហាក់​ខ្ពស់ជាងគេ​ក្នុង​ចំណោម​បណ្ដា​សង្កាត់​ក្នុង​ខណ្ឌសែន​សុខ​ដោយ​នៅតាមផ្លូវ​ធំ វាមានតម្លៃចន្លោះពី ​២ ៦០០ដុល្លារអាមេរិក​ ទៅ ដល់ ​៤ ២០០ដុល្លារ​អាមេរិក​ក្នុងមួយម៉ែត្រ​ការ៉េ និងតម្លៃ ៨៥០ដុល្លារ​អាមេរិក​ដល់ ១ ៧០០ដុល្លារអាមេរិកក្នុងមួយការ៉េ​ សម្រាប់​ដី​ដែលមានទីតាំ​ងនៅ​ជាប់ផ្លូវតូច​ៗ  ។

២. សង្កាត់​ទឹក​ថ្លា​ ៖ សង្កាត់​នេះ តម្លៃដីក៏មាន​ហាង​ខ្ពស់ដែរ ដោយនៅតាម​បណ្ដោយផ្លូវធំ​វា​មានតម្លៃចន្លោះពី ​២ ៦០០ដុល្លារអាមេរិក​ដល់ ៤ ២០០ដុល្លារអាមេរិកក្នុងមួយម៉ែត្រការ៉េ​​ និង​នៅតាមបណ្ដោយផ្លូវ​តូច​ៗ​មាន​តម្លៃ​ចន្លោះពី​ ៩៥០ដុល្លារ​អាមេរិក​ទៅដល់​ ២ ០០០ដុល្លារអាមេរិ​កក្នុងមួយម៉ែត្រការ៉េ ។​

៣. សង្កាត់​ឃ្មួញ ៖ ឃ្មួញ​ក៏ជា​តំបន់​អភិវឌ្ឍន៍គួរឱ្យ​ទាក់ទាញ​សម្រប់វិនិយោគិន​ជាតិ ​និងអន្តរជាតិ​ដែរ ដោយ​ក្នុង​រយៈ​ពេ​ល​ប៉ុន្មានឆ្នាំចុងក្រោយនេះ តម្លៃដីក្នុងសង្កាត់មួយ​នេះ​មានតម្លៃចន្លោះពី​៨០០ដុល្លារអាមេរិក​ទៅ ​១ ៩០០ដុល្លារអាមេរិកក្នុងមួយម៉ែត្រការ៉េ​សម្រាប់ដីនៅតាមបណ្ដោយផ្លូវធំៗ និងតម្លៃចន្លោះពី ៣៥០​ដុល្លារ​​អា​មេ​រិក​ទៅ​ ៧០០ដុល្លារអាមេរិក​ក្នុងមួយម៉ែត្រ​ការ៉េ​សម្រាប់ដីនៅតាមបណ្ដោយផ្លូវតូច​ៗ ។

៤.សង្កាត់ក្រាំងធ្នង់ ៖ សង្កាត់​ក្រាំង​ធ្នង់ក៏ចាត់ទុកជា​តំបន់ដែលមានការអភិវឌ្ឍ​ទៅលើ​លំនៅឋាន​ដ៏មាន​សក្ដា​នុ​​ពល​​ក្នុង​ខណ្ឌសែនសុខ​ដែរ​ ។ ដីធ្លី​ក្នុង​សង្កាត់​មួយនេះ អាច​រក​បានក្នុងចន្លោះពី ៣៥០ដុល្លារ​អាមេរិក​ដល់ ​១ ៨០០ដុល្លារអាមេរិកក្នុងមួយម៉ែត្រការ៉េ ដោយ​តាមបណ្ដោយផ្លូវធំ​អាចរក​បានក្នុងចន្លោះពី​ ៧០០​ដុល្លារ​អា​មេរិក​ទៅ​ ១ ៨០០ដុល្លារអាមេរិក​ក្នុងមួយម៉ែត្រ​ការ៉េ និង​តម្លៃចន្លោះពី​៣៥០ដុល្លារអាមេរិក​ដល់ ៥០០​ដុល្លារអាមេរិកក្នុងមួយម៉ែត្រការ៉េ​ ​សម្រាប់​ដីនៅតាមបណ្ដោយផ្លូវតូចៗ ។

៥. សង្កាត់​អូរបែក​ក្អម ៖ អូរ​បែក​ក្អម​ត្រូវបានចាត់ទុកជា​តំបន់នៅកណ្ដាល​ក្រុងមួយ​ ដោយតម្លៃដីធ្លី​អាច​មាន​ចន្លោះ​ពី ២ ៤០០ ដុល្លារអាមេរិក​ទៅ​ ៣ ៨០០ដុល្លារអាមេរិក​សម្រាប់ទីតាំង​នៅតាមបណ្ដោយផ្លូវធំ និង​តម្លៃ​ចន្លោះ​ពី ​៧៥០ដុល្លារអាមេរិក​ដល់ ១ ៤០០ដុល្លារអាមេរិក​ក្នុងមួយម៉ែត្រការ៉េសម្រាប់ទីតាំង​នៅ​តាម​បណ្ដោ​យ​ផ្លូវ​តូចៗ ។

៦.​សង្កាត់​គោក​ឃ្លាង ៖ សង្កាត់គោក​ឃ្លាងតម្លៃដី​ក៏​ហាក់​មាន​ហាង​ឆេង​គ្រាន់​បើ​ដែរក្នុង​ចំណោម​បណ្ដា​សង្កា​ត់​ក្នុង​ខណ្ឌសែន​សុខ ក្នុងនោះដែរ នៅតាមបណ្ដោយផ្លូវធំអាច​មានតម្លៃចន្លោះពី ១​ ៩០០ដុល្លារអាមេរិក ដល់​​ ៣ ៦០០ដុល្លារអាមេរិក ក្នុងមួយម៉ែត្រការ៉េ និងតម្លៃចន្លោះពី ៦៥០​ដុល្លារអាមេរិក​ដល់ ​១ ១០០​ដុល្លារអាមេរិក​ស​ម្រាប់ទីតាំង​ដី​នៅតាមបណ្ដោយផ្លូវ​តូច​ៗ  ។​

លោកឧកញ៉ា សំ សុខនឿ​ន ប្រធានក្រុមហ៊ុន​អចលនទ្រព្យ KW SAM SN បានមានប្រសាសន៍លើក​ឡើងថា តាមបណ្ដា​សង្កាត់មួយចំនួន​នៅក្នុង​ខណ្ឌសែន​សុខ​ ជាពិសេស​នៅប៉ែក​ខាងជើង​ ឃើញថា​មានការទាក់ទាញ​លើការអភិវឌ្ឍ​លំនៅឋានប្រណីត​តម្លៃខ្ពស់​សម្រាប់ផ្គត់ផ្គង់​​លើទីផ្សារ ។ ​​

លោកឧកញ៉ា​ថា ៖ ​

«កត្តា​ដែល​ជំរុញ​ឱ្យវិនិយោ​គិន​​ជាតិ​ និងអន្តរជាតិ​ ​អភិវឌ្ឍន៍​លំនៅឋាន​ប្រណិត​ដែលមានតម្លៃ​ខ្ពស់​នៅតំបន់​នោះច្រើន ដោយសារតែ នៅតំបន់​មានការអភិវឌ្ឍហេដ្ឋារចនាសម្ព័ន្ធថ្មីៗ​ធំៗ ងាយស្រួលក្នុងការ​ធ្វើដំណើរ ហើយក៏មានការអភិវឌ្ឍ​ទៅលើ​ផ្សារទំនើបតូចធំ​ ជាមួយ​នឹងអាជីវកម្មចម្រុះ​​ »៕