ភ្នំពេញ ៖ ក្រសួងកសិកម្ម រុក្ខាប្រមាញ់ និង​នេសាទ គ្រោងបំពាក់ម៉ាស៊ីនថតស្វ័យប្រវត្តិជាលើកដំបូងសម្រាប់ឃ្លាំមើលសកម្មភាពរស់នៅរបស់សត្វផ្សោតទន្លេមេគង្គ និងតាមដានរាល់សកម្មភាពបទល្មើសនេសាទនានាដែលកើតមានក្នុងដែនអភិរក្សផ្សោតក្នុងខេត្តក្រចេះ។

លោកបណ្ឌិត អ៊ុក វិបុល ប្រធាននាយកដ្ឋាន​អភិរក្សជលផលនៃរដ្ឋបាលជលផល ក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា ការប្រើប្រាស់ប្រព័ន្ធត្រួត​ពិនិត្យ​ពីចម្ងាយនេះ ធ្វើឡើងក្នុងគោលដៅឃ្លាំមើលសកម្មភាពប្រចាំថ្ងៃ​របស់សត្វផ្សោត និងបទល្មើសនេសាទ​នៅក្នុងតំបន់​អភិរក្សសត្វផ្សោត តាមរយៈការបំពាក់ម៉ាស៊ីនថតស្វ័យ​ប្រវត្តិ និង​ការបង្ហោះដ្រូនជាប់ជាប្រចាំ ក្រោមកិច្ចសហការគាំទ្រថវិកាពីអង្គការ WWF ប្រចាំនៅកម្ពុជា និងគាំទ្របច្ចេកទេសពីវិទ្យាស្ថានវារីសាស្ត្រ (IHB)នៃបណ្ឌិត្យសភាវិទ្យាសាស្ត្រប្រទេសចិន។

តាមរយៈបច្ចេកទេសខាងលើ ក្រសួងគ្រោងនឹងបំពាក់ Screen Digital តភ្ជាប់ជាមួយប្រព័ន្ឋយន្តហោះខ្នាតតូច (ឬហៅដា​ដ្រូន) និងតភ្ជាប់ប្រព័ន្ឋកមេរ៉ាស្វ័យ​ប្រវត្តិ ដែលបំពាក់លើបង្គោលតាមដងទន្លេមេគង្គ ជាទីតាំងដែលមានសត្វផ្សោតរស់នៅច្រើន។

លោកបានបញ្ជាក់ថា ៖

«ឧបករណ៍ទាំងនោះវានឹង connect ចូលមកដល់ស្រ្គីនយើងនៅខាងក្នុងអាគារតែម្តង ដូច្នេះយើងងាយស្រួលក្នុងការតាមចលនាសត្វផ្សោត តាមដានអ្នកនេសាទដែលគេចូលទៅធ្វើនេសាទនៅតំបន់ហ្នឹងដោយប្រើប្រាស់ឧបករណ៍ខុសច្បាប់ ហើយប្រសិនបើមានរឿងអីកើតឡើងឆ្មាំរបស់យើងអាចចេញប្រតិបត្តិការតែម្តង»។

សូមជម្រាបថា ក្នុងដំណាក់កាលដំបូងនេះ ក្រសួងគ្រោងនឹងអនុវត្តន៍គម្រោងសាកល្បងលើផ្ទៃទន្លេប្រមាណជា ៣០គីឡូម៉ែត្រ មានបំពាក់កាមេរ៉ាស្វ័យប្រវត្តិចំនួន ០៦គ្រឿង និងយន្តហោះដ្រូនចំនួន ០៤គ្រឿង បង្ហោះជាប្រចាំដើម្បីផ្តិតយកសកម្មភាពពីផ្ទៃទន្លេ តភ្ជាប់បណ្តាញ Screen Digital នៅក្នុងមជ្ឈមណ្ឌល ដែលជាបន្ទប់ផ្តល់ពត៌មានប្រចាំនៅទីតាំងខាងលើ។

លោកបន្តថា ៖

ផ្អែកតាមទីតាំងភូមិសាស្រ្តអន្លង់កាំពីមានភាពមិនសូវអំណោយផលសម្រាប់ធ្វើសកម្មភាពល្បាតដោយផ្ទាល់របស់មន្រ្តីឆ្មាំ និងអភរិក្សនោះទេ ដែលតម្រូវឱ្យប្រើវិធីសាស្រ្តថ្មី មានភាពងាយស្រួលជាងមុន និងមានប្រសិទ្ធភាពជាងមុនដែលអាចត្រួតពិនិត្យ ល្បាតបាន ២៤ម៉ោង លើ ២៤ម៉ោង។

គួរបញ្ជាក់ថា​ វត្តមានសត្វផ្សោតទន្លេមេគង្គបានទាក់ទាញទេសចរជាតិ និងអន្តរជាតិ ទៅទស្សនាកម្សាន្តនៅទីនោះជាហូរហែរ ដែលធ្វើឱ្យអន្លង់កាំពីក្លាយជារមណីយដ្ឋានទេសចរណ៍ដ៏មានសក្តានុពលមួយនៅក្នុងភូមិកាំពី ឃុំសំបុក ស្រុកចិត្របូរី ខេត្តក្រចេះ។ អន្លង់ផ្សោតកាំពី ជាអន្លង់មួយធំជាងគេក្នុងចំណោមអន្លង់ទាំង៥ទីតាំង នៅក្នុងខេត្តក្រចេះ ហើយគិតមកទល់ដើមឆ្នាំ២០២៦នេះ មានសត្វផ្សោតរស់នៅនិងបង្ករកំណើតសរុបចំនួន ១១២ ក្បាល៕