សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ យោងតាមការព្យាករណ៍របស់រាជរដ្ឋាភិបាលកម្ពុជាបានបង្ហាញថា វិស័យឧស្សាហកម្មកម្មន្តសាលនៅក្នុងឆ្នាំ២០២៤នេះរំពឹងមានកំណើនឡើងបន្ថែមទៀត ដែលនឹងបង្កើតឱកាសការងារបន្ថែមដល់ប្រជាពលរដ្ឋកម្ពុជា ។ បន្ថែមពីនេះ កំណើននៃវិស័យឧស្សាហកម្មក៏នឹងជំរុញឱ្យមានការសាងសង់ឃ្លាំងសម្រាប់ជួល ជាពិសេសនៅតំបន់ជាយក្រុងបន្ថែមទៀត ។
ជាការកត់សម្គាល់ នៅតំបន់ជាយៗរាជធានីភ្នំពេញ គេឃើញអ្នកវិនិយោគបានសង់ឃ្លាំងជាច្រើនសម្រាប់ជួលឱ្យវិនិយោគផ្សេងទៀតដែលមានតម្រូវការ ជាពិសេសវិនិយោគក្នុងវិស័យឧស្សាកម្ម ដូចជាម្ចាស់រោងចក្រ សហគ្រាសដែលត្រូវទីតាំងដើម្បីស្តុកទំនិញរបស់ពួកគេមុនផលិត និងត្រៀមនាំចេញ ។
អ្នកជំនាញនៃវិស័យអចលនទ្រព្យកម្ពុជាជាច្រើនបានបញ្ជាក់ថា វិស័យឧស្សាហកម្ម រោងចក្រ សហគ្រាសនៅតែមានការវិនិយោគជាហូរហែ ដោយវិនិយោគិនមានទាំងក្នុង និងក្រៅប្រទេស ជាក់ស្ដែងបើតាមការប្រកាសរបស់ក្រុមប្រឹក្សាអភិវឌ្ឍន៍កម្ពុជាក្នុងខែមករាកន្លងទៅនេះ ឃើញថា រាជរដ្ឋាភិបាលបានអនុម័តគម្រោងវិនិយោគថ្មីចំនួន១០គម្រោងដែលសុទ្ធសឹងតែជាគម្រោងរោងចក្រ នៅតាមបណ្ដារាជធានីខេត្តនានាក្នុងប្រទេសកម្ពុជា។ ក្រៅពីនេះក៏មានគម្រោងពង្រីកការវិនិយោគបន្ថែមដែលក្រុមប្រឹក្សាអភិវឌ្ឍន៍ក្ពុជាបានអនុម័តផងដែរ ដោយគម្រោងទាំងនោះ ភាគច្រើនក៏ជាគម្រោងរោងចក្រសហគ្រាស ដែលសុទ្ធតែត្រូវការឃ្លាំងសម្រាប់ជួលស្តុកទំនិញដូចគ្នា ។
លោក ប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានឱ្យដឹង ការវិនិយោគលើរោងចក្រ សហគ្រាស ជាពិសេសនៅក្នុងវិស័យឧស្សាហកម្ម នឹងនៅតែមានកំណើនល្អប្រសើរ ហើយតាមរយៈការវិនិយោគលើរោងចក្រឧស្សាហកម្មនេះដែរ ក៏ជំរុញឱ្យមានតម្រូវការលើឃ្លាំងសម្រាប់ជួល ក្នុងការបំពេញបន្ថែមលើវិស័យនេះដែរ ។
លោកបន្តថា តំបន់ដែលមានការអភិវឌ្ឍលើឃ្លាំងច្រើនគឺជាតំបន់ដែលស្ថិតនៅជាយរាជធានី តាមផ្លូវជាតិលេខ២ លេខ៣ និងលេខ៤ ហើយនៅពេលបន្តិចទៀតនេះ តំបន់តាមបណ្ដោយផ្លូវក្រវាត់ក្រុងទី៣ក៏នឹងមានការវិនិយោគលើឃ្លាំងនេះច្រើនដែរ ព្រោះវាជាទីតាំងដែលងាយស្រួលក្នុងការដឹកជញ្ជូន ។ ម្យ៉ាងទៀត តំបន់រោងចក្រសហគ្រាស បច្ចុប្បន្ននេះ ក៏ភាគច្រើននៅតំបន់ជាយក្រុងដែរ ។
លោកបន្តការវិនិយោគលើរោងចក្រសហគ្រាសទាំងនេះ ក៏នឹងជំរុញចរន្តនៃការទិញលក់ និងជួលអចលនទ្រព្យបានមួយកម្រិតបន្ថែមទៀត ក្នុងពេលស្ថានភាព នៃវិស័យអចលនទ្រព្យនៅតែមិនទាន់មានភាពច្បាស់លាស់ប្រាកដប្រជានៅឡើយ ៕
Account
Security
Favourite Content