សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ សហរដ្ឋអាម៉េរិកបានយល់ព្រមកាត់បន្ថយអត្រាពន្ធមកនៅត្រឹម ១៥% លើការនាំចូលពីកោះតៃវ៉ាន់ ដែលជាថ្នូរនឹងការវិនិយោគតម្លៃរាប់រយពាន់លានដុល្លាររបស់កោះមួយនេះទៅលើការផលិតបន្ទះសៀគ្វីអេឡិចត្រូនិ ឬ semiconductor ដែលជាឧស្សាហកម្មបន្ទះឈីបរបស់ខ្លួន នេះបើយោងតាមសេចក្ដីរាយការណ៍ពី BBC ។
កាលពីប៉ុន្មានខែមុននេះ កោះតៃវ៉ាន់ តែងតែជំរុញឲ្យរដ្ឋបាល Trump ឈានដល់ដំណាក់កាលនៃកិច្ចព្រមព្រៀងបន្ថែមទៀតជុំវិញអត្រាពន្ធ ២០% ដែលដាក់លើការនាំចេញរបស់ខ្លួនកាលពីឆ្នាំមុន ខណៈដែលដៃគូពាណិជ្ជកម្មសំខាន់ៗផ្សេងទៀតដូចជា ជប៉ុន កូរ៉េខាងត្បូង និងសហភាពអឺរ៉ុប ត្រូវបានកាត់បន្ថយពន្ធមកត្រឹមអត្រា ១៥%។ ជាលទ្ធផល ការទន្ទឹងរង់ចាំនៃកិច្ចព្រមព្រៀងថ្មីនេះទទួលបានដូចការរំពឹងទុក ដោយអាម៉េរិកបានបន្ថយមកនៅត្រឹម ១៥% លើការនាំចូលពីកោះតៃវ៉ាន់ ។ ជាមួយនឹងការទទួលបានអត្រាពន្ធថ្មីនេះ ប្រធានាធិបតីកោះតៃវ៉ាន់ លោក Lai Ching-te បានសន្យាថា នឹងជំរុញការវិនិយោគនៅក្នុងទឹកដីអាម៉េរិកឱ្យបានកាន់តែច្រើន ជាពិសេស បង្កើនការចំណាយលើវិស័យការពារជាតិរបស់ខ្លួន ដោយរដ្ឋាភិបាលបានព្យាយាមកាត់បន្ថយពន្ធលើការនាំចូលពីអាម៉េរិកដូចគ្នា។
នាយកដ្ឋានពាណិជ្ជកម្មរបស់អាម៉េរិកបានលើកឡើងថា បណ្តាក្រុមហ៊ុនបច្ចេកវិទ្យារបស់កោះតៃវ៉ាន់ បានប្តេជ្ញាវិនិយោគជាមួយអាម៉េរិក ជាមួយទុនសរុបយ៉ាងហោចណាស់ ២៥០ ពាន់លានដុល្លារ។ លើសពីនេះ កិច្ចព្រមព្រៀងនេះនឹងដកពន្ធចេញពីក្រុមហ៊ុនឈីបតៃវ៉ាន់ដែលវិនិយោគនៅអាម៉េរិក ក្នុងគោលបំណងជំរុញការផលិតបន្ទះឈីប semiconductor ក្នុងទឹកដីរបស់ខ្លួន។ semiconductor គឺជាធាតុសំខាន់ក្នុងការផលិតគ្រឿងអេឡិចត្រូនិក ឬ ម៉ាស៊ីន រាប់ចាប់តាំងពីរថយន្តរហូតដល់ទូរស័ព្ទ ហើយវាគឺជាអាទិភាពមួយនៅក្នុងការធ្វើពាណិជ្ជកម្មរបស់អាម៉េរិក ដោយសារមានការខ្វះខាតនៅក្នុងខ្សែសង្វាក់ផ្គត់ផ្គង់ចាប់តាំងពីកំឡុងពេលរាតត្បាតជំងឺកូវីដមកម្ល៉េះ។ ជាការកត់សម្គាល់ នៅក្នុងរយៈពេលប៉ុន្មានឆ្នាំកន្លងមកនេះ អាម៉េរិកបានចំណាយលុយរាប់រយពាន់លានដុល្លារសម្រាប់ឧបត្ថម្ភធនជួយដល់ឧស្សាហកម្ម semiconductor ក្នុងស្រុក ជាពិសេសការជួយធានា និងពង្រីកការវិនិយោគពីក្រុមហ៊ុនបរទេស ដូចជា TSMC របស់តៃវ៉ាន់ដែលនាំមុខគេក្នុងវិស័យមួយនេះ។
កាលពីថ្ងៃព្រហស្បតិ៍ សប្ដាហ៍នេះ ក្រុមហ៊ុនតៃវ៉ាន់ TSMC បានបង្ហើបថា ខ្លួនកំពុងពន្លឿនការវិនិយោគបន្ថែមទៀតនៅក្នុងទឹកដីអាម៉េរិក ខណៈដែលមានរោងចក្រដំណើរការនៅទីនោះចាប់តាំងពីឆ្នាំ ២០២៤។ ជាក់ស្តែង រោងចក្ររបស់ខ្លួននៅក្នុងរដ្ឋ Arizona កំពុងផលិតបន្ទះឈីបសម្រាប់ក្រុមហ៊ុនធំៗដូចជា Nvidia, Apple, AMD និងក្រុមហ៊ុនបច្ចេកវិទ្យាអាម៉េរិកផ្សេងទៀត។ រដ្ឋលេខាធិការពាណិជ្ជកម្មរបស់អាម៉េរិក លោក Howard Lutnick បានលើកឡើងថា កិច្ចព្រមព្រៀងនេះនឹងជួយឱ្យអាម៉េរិករឹងមាំ អាចពឹងផ្អែកលើខ្លួនឯងគ្រប់គ្រាន់ ហើយក៏ជួយជំរុញឲ្យក្រុមហ៊ុន TSMC របស់តៃវ៉ាន់ អាចពង្រីកខ្លួនបានដើម្បីអភិវឌ្ឍខ្សែសង្វាក់ផ្គត់ផ្គង់បន្ថែមទៀត ជាពិសេស លើកទឹកចិត្តដល់អាជីវកម្មខ្នាតតូចរបស់តៃវ៉ាន់ឱ្យផ្លាស់ប្តូរទីតាំងទៅកាន់អាម៉េរិកផងដែរ៕
Account
Security
Favourite Content