សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងគោលដៅសម្រេចឱ្យបាននូវចក្ខុវិស័យរបស់រាជរដ្ឋាភិបាលកម្ពុជា ដែលមានក្រសួងរៀបចំដែនដី នគរូបនីយកម្ម និងសំណង់ ដោយបញ្ចប់ការវាស់វែង ចុះបញ្ជីដីធ្លី និងចែកបណ្ណកម្មសិទ្ធិឱ្យបានលឿនរហ័ស រដ្ឋបាលខេត្តនានានៅទូទាំងប្រទេសកំពុងសម្រុកការងារពាក់ព័ន្ធនឹងចុះបញ្ជីដីធ្លីធ្វើឱ្យយ៉ាងណាឱ្យសម្រេចបានតាមការកំណត់របស់រាជរដ្ឋាភិបាល ។ ជាក់ស្ដែងខេត្តកំពត កំពុងជំរុញ និងពន្លឿនការចែកបណ្ណកម្មសិទ្ធិជូនពលរដ្ឋឱ្យបានគ្រប់ៗគ្នា ។
នៅក្នុងឱកាសចែកបណ្ណកម្មសិទ្ធិដីធ្លីជូនពលរដ្ឋក្នុងស្រុកបន្ទាយមាស កាលពីថ្ងៃទី០៤ ខែមីនា ឆ្នាំ២០២៥ ឯកឧត្តម ម៉ៅ ធនិន អភិបាលខេត្តកំពតបានលើកឡើងថា ការចុះបញ្ជីដីធ្លីមានលក្ខណៈជាប្រព័ន្ធត្រូវបានជំរុញ និងពន្លឿនដើម្បីចែកបណ្ណកម្មសិទ្ធិជូនពលរដ្ឋឱ្យបានគ្រប់ៗគ្នា ហើយការចុះបញ្ជីដីធ្លីនេះ ពិតជាបានចូលរួមចំណែកយ៉ាងសំខាន់ជាមួយរាជរដ្ឋាភិបាល និងរដ្ឋបាលខេត្ត ក្នុងការលើកកម្ពស់សុវត្ថិភាពកាន់កាប់ដីធ្លី កាត់បន្ថយទំនាស់ដីធ្លី ដែលជួយជំរុញកំណើនសេដ្ឋកិច្ចសង្គមប្រកបដោយនិរន្តរ៍ភាព និងសុខដុមនីយកម្ម។
ឯកឧត្តម ម៉ៅ ធនិន បានលើកឡើងថា រាជរដ្ឋាភិបាលអាណត្តិទី៧ ដែលបន្តវេណដឹកនាំដោយសម្តេចធិបតី ហ៊ុន ម៉ាណែត ជានាយករដ្ឋមន្ត្រី សម្តេចបានគិតគូរជានិច្ចនូវរាល់កិច្ចការចុះបញ្ជីដីធ្លីមានលក្ខណៈជាប្រព័ន្ធ ដោយបានដាក់ចុះនៅយន្តការ និងការចង្អុលបង្ហាញដោយផ្ទាល់មកកាន់អាជ្ញាធររាជធានី-ខេត្ត និងមន្ទីរជំនាញត្រូវពន្លឿនក្នុងការចុះវាស់វែង និងចេញបណ្ណកម្មសិទ្ធិជូនពលរដ្ឋក្នុងមូលដ្ឋានរបស់ខ្លួនឱ្យបានឆាប់រហ័យបំផុត ហើយការដែលឈានដល់ការចែកបណ្ណកម្មសិទ្ធិនាពេលនេះក៏ដោយសារមានការចូលរួមសហការពីបងប្អូនប្រជាពលរដ្ឋជាមួយអាជ្ញាធរ និងមន្ត្រីជំនាញ ហើយរដ្ឋបាលខេត្តក៏ចង់ឃើញពុកម៉ែបងប្អូនទទួលបានប័ណ្ណកម្មសិទ្ធិស្របច្បាប់គ្រប់ៗគ្នាផងដែរ ។
ឯកឧត្តមបន្ថែមថា បណ្ណកម្មសិទ្ធនេះគឺជាបណ្ណដែលបញ្ជាក់ពីការកាន់កាប់ដីធ្លីស្របច្បាប់របស់បងប្អូន ដូច្នេះពេលទទួលបានហើយសូមទុកដាក់បណ្ណនេះឱ្យបានត្រឹមត្រូវ ម្យ៉ាងទៀតបណ្ណនេះក៏បានរួមចំណែកក្នុងការជួយកាត់បន្ថយនូវទំនាស់ដីធ្លីផងដែរ។ ការចុះបញ្ជីដីធ្លីមានលក្ខណៈជាប្រព័ន្ធ ពិតជាបានចូលរួមចំណែកយ៉ាងសំខាន់ជាមួយរាជរដ្ឋាភិបាល និងរដ្ឋបាលខេត្ត ក្នុងការលើកកម្ពស់សុវត្ថិភាពក្នុងការកាន់កាប់ដីធ្លី ដែលជំរុញនូវកំណើនសេដ្ឋកិច្ចសង្គមប្រកបដោយនិរន្តរ៍ភាព និងសុខដុមនីយកម្ម ជាពិសេសស្របតាមគោលនយោបាយដីធ្លីរបស់រាជរដ្ឋាភិបាលកម្ពុជា ។
ឯកឧត្តម ក៏បានធ្វើការផ្តាំផ្ញើដល់អាជ្ញាធរទាំង៩ ក្រុង-ស្រុកក្នុងខេត្ត មន្រ្តីបច្ចេកទេសសុរិយោដី និងអ្នកពាក់ព័ន្ធ ត្រូវផ្តល់កិច្ចសហការចូលរួមគាំទ្រសម្របសម្រួលឱ្យបានកាន់តែសកម្មថែមទៀតនៅក្នុងដំណើរការចុះបញ្ជីដីធ្លី និងជំរុញដំណើរការចែកបណ្ណកម្មសិទ្ធិជូនប្រជាពលរដ្ឋឱ្យបានឆាប់រហ័ស ហើយត្រូវខិតខំសម្រួល និងដោះស្រាយបញ្ហាប្រឈមនានាដែលកើតមានពាក់ព័ន្ធក្នុងការផ្តល់សេវានៃការចុះបញ្ជីដីធ្លីជាលក្ខណៈប្រព័ន្ធឱ្យបានលឿន ឆាប់រហ័ស និងមានប្រសិទ្ធភាព ។
ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានលើកឡើងកាលពីពេលថ្មីៗនេះថា តាមផែនការរបស់ក្រសួងរៀបចំដែនដី នគរូបនីយកម្មនិងសំណង់ ការវាស់វែងដីធ្លីនៅទូទាំងប្រទេសនឹងត្រូវបញ្ចប់នៅមុនពិធីបុណ្យចូលឆ្នាំប្រពៃណីខ្មែរ ហើយបន្ទាប់ពីបញ្ចប់ការវាស់វែងដីធ្លីក្រុមការងារនឹងបន្តនូវការងារពាក់ព័ន្ធ ចេញបណ្ណកម្មសិទ្ធិជូនពលរដ្ឋឱ្យបានចប់សព្វគ្រប់នៅពេលឆាប់ៗនេះដែរ៕
Account
Security
Favourite Content