ភ្នំពេញ ៖ គម្រោង​ព្រែកជីក​ហ្វូណនតេជោ កាន់តែលេចជា​ពន្លឺច្បាស់ ក្រោយពី​រដ្ឋមន្ត្រីក្រសួង​សាធារណការ​ និងដឹកជញ្ជូន ឯកឧត្តម ​ប៉េង ពោធិ៍នា​ ប្រកាស​ថា​ គម្រោងនេះ​នឹង​ចាប់ផ្ដើ​ម​បើក​ការដ្ឋាន​នៅ​ចុងឆ្នាំ ២០២៤​ខាងមុខនេះហើយ ។  ការ​ប្រកាស​បែបនេះ បានធ្វើឱ្យ​វិស័យដីធ្លីនៅក្នុង​ខេត្ត​កែប មានសកម្មភា​ព​កម្រើក​ឡើង​​មួយកម្រិតដោយមានចរន្ត​ទិញដូរហក់ឡើង​ជាង​ពីមុន​ ។

បើតាមភ្នាក់ងារ​អចលន​វត្ថុ​ប្រចាំខេត្តកែបជាច្រើន​នាក់​បានអះអាងថា គម្រោងហ្វូណន​តេជោ​ ជា​គម្រោង​ធំ​ ដែល​នឹង​ជំរុញ​ឱ្យវិស័យដីធ្លីក្នុងខេត្ត​កែប មានសន្ទុះ​ងើបឡើង​បន្ថែមទៀត​ ​ដោយមានអ្នកស្វែង​រកទិញដី​​កាន់តែច្រើនជាពិសេស​ អ្នកទិញដីមកពី​បណ្ដាខេត្ត​ផ្សេងៗ និងរាជធានីភ្នំពេញ ដោយមួយចំនួន​ទិញ​ដើម្បី​វិនិយោគ​ ពោលគឺទិញទុកលក់​បន្ត​ ចំណែកមួយចំនួន​ទិញ​ដើម្បីអភិវឌ្ឍន៍​នៅពេល​បន្ទាប់​និងខ្លះទៀត​ទិញ សម្រាប់​សង់ផ្ទះលំហែ​ផ្ទាល់ខ្លួន​ ​។

បើតាម​លោក លឹម រដ្ឋា ភ្នាក’អចលនទ្រព្យ​មួយរូប​ប្រចាំ​ខេត្ត​កែប បានឱ្យដឹងថា​ សកម្មភាព នៃការទិញលក់​ដី​ធ្លីនៅក្នុងទឹកដីខេត្ត​កែប ចាប់ផ្ដើម​កម្រើក​ល្អជាង​មុន​បន្តិចហើយ ​ដោយ​អ្នក​ទិញខ្លះ​​មានដីនៅកែប​ស្រាប់​ទៅ​ហើយ ​គឺទិញពីមុនៗមក និ​ងបន្តស្វែងរកទិញទៀត និងខ្លះទៀតជាអ្នកថ្មី ដោយស្វែង​រក​ទិញ​ដើម្បីអភិវឌ្ឍន៍​​ ។​

លោកបន្តថា​ សកម្មភាព​នៃការ​ស្វែងរកទិញ​ដីនៅក្នុ​ងទឹកដីខេត្ត​កែប គឺចាប់ផ្ដើមឡើ​ងនៅ​ក្រោយ​ចូល​ឆ្នាំ​ស​កល​​អំឡុ​ងដើម​ខែ មករាមក ដោយអ្នក​ទិញដីភាគច្រើន​រក​ទំហំដីធំៗ​និង​ខ្លះទៀត​ក៏​ត្រូ​វការរកទិញ​ដីដែលមាន​ទំហំ​តូចៗ​ដែរ និយាយមរួមគឺ​មានទាំង​អ្នក​ទិញដីធំៗ និងអ្នកទិញ​ដីតូច​ៗ​ក៏ច្រើន​ដែរ​​ ។

លោក​ រដ្ឋា ​បានបន្ថែម​ថា​ នៅក្រោយកា​រប្រកាស​គម្រោងអភិវឌ្ឍន៍និង​ផែនកា​របើក​ការដ្ឋាន​សាងសង់​ព្រែក​ជីក​​តេជោ ឃើញថា​មាន​ភ្ញៀវ​ស្វែងរកទិញដីនៅកែប​កាន់តែច្រើន​ ហើយរំពឹងថា​ នឹង​មានកា​រទិញលក់​កាន់​តែ​ខ្លាំង​ថែមទៀត តែសម្រាប់​តម្លៃដីធ្លី​នា​ពេលនេះ មិនទាន់មាន​ការ​ឡើងថ្លៃ​ខ្លាំង​នោះទេ ដោយ​អ្នកស្វែងរកទិញ​ដី​ចង់​បាន​តម្លៃទាប ហើយអ្នកលក់​ដែលត្រូវការ​លុយដោះស្រាយបញ្ហា​បន្ទាន់​ក៏​លក់ដីក្នុងតម្លៃក្រោម​ទីផ្សារ ធ្វើឱ្យ​មាន​ការទិញលក់​ច្រើន​ករណី ។​

លោក​បញ្ជាក់ថា​ សក្ដានុពល​ខេត្តកែប​ដូចជា​គម្រោងផ្លូវ​តាម​បណ្ដោយឆ្នេរ​សមុទ្រ​អង្កោល​ និងផ្លូវ​មួយចំនួន​ទៀត​នៅក្នុង​ខេត្តកែប បានធ្វើឱ្យអ្នក​អភិវឌ្ឍន៍​និងអ្នក​វិនិយោគ​ចាប់អារម្មណ៍​​ក្នុង​ខេត្ត​កែប​បន្ថែម ដោយ​គេ​មើល​ឃើញ​ថា​ នៅពេលអនាគត​ខេត្ត​មួយនេះ នឹង​កាន់តែមានសក្ដានុពលខ្ពស់​ ។​

លោក ​ជិន ណារិន​ ភ្នាក់ងារអចលនវត្ថុមួយរូប​ប្រចាំខេត្តកំពត និងកែប ក៏បាន​ និយាយថា​ គម្រោង​អភិវឌ្ឍន៍​ព្រែក​ជីក​ហ្វូណន​តេជោ នឹង​ធ្វើឱ្យ​ខេត្ត​កំពត​និងកែប ក្លាយជា​តំបន់​ពាណិជ្ជកម្ម​និងទេសចរណ៍​ដ៏មាន​សក្ដានុពល​​​ ។​ បើនិយាយពីខេត្តកំពត និងកែប គឺជា​តំបន់​តែមួយ​ ដោយសារតែ វា​មានទីតាំ​ងនៅជាប់គ្នា ហើយ​ខេត្តទាំង​ពីរ​ក៏​អាច​បំពេញ​បន្ថែម​ចំណុច​ខ្វះ​ខាតឱ្យគ្នាទៅវិញទៅមក​ផងដែរ​ ជាក់ស្ដែង​ពេលកំពត​មានភ្ញៀវ​ច្រើន​ហើយខ្វះ​សេវា​ទេសចរណ៍ ខាង​ខេត្ត​កែបអាចបំពេញឱ្យកំពត ពេល​កែប​មានភ្ញៀ​វទេសចរ​ណ៍​ច្រើនក៏កំពត​អាច​បំពេញឱ្យកែបបានដូចគ្នា​ដែរ ដូចជា​សេវាកម្ម​ស្នាក់នៅ និង ហូបចុក​ជាដើម ។

បើតាមផែនកា​ររបស់រដ្ឋាភិបាល​ បានកំណត់​យកតំបន់ឆ្នេរ​ជា​តំបន់គោលដៅអភិវឌ្ឍន៍ ក្នុង​នោះ​ខេត្ត​ជាប់មាត់​សមុទ្រ​ចំនួន​៤ រួមមាន​ខេត្ត​កោះកុង ព្រះសីហនុ កំពតនិង​ខេត្ត​កែប រដ្ឋាភិបាល​បាន​អភិវឌ្ឍន៍​ហេ​ដ្ឋារ​ច​នា​ស​ម្ព័ន្ធ តភ្ជាប់ពីភ្នំពេញ និ​ងពីបណ្ដាខេត្ត​ផ្សេងទៀត ដើម្បីសម្រួល​ដល់ការ​ធ្វើ​ដំណើរ​ទៅកាន់​តំបន់ឆ្នេ​រ និង​​អភិវ​ឌ្ឍ​ន៍​ហេ​ដ្ឋារចនាសម្ព័ន្ធ​​នៅក្នុង​តំបន់នោះបន្ថែម​ទៀត​ ៕​