សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាជរដ្ឋាភិបាលកម្ពុជាក្នុងអាណត្តិទី៧នៃរដ្ឋសភា បានផ្ដោតការយកចិត្តទុកដាក់យ៉ាងខ្លាំងទៅលើការរៀបចំដែនដី និងនគរូបនីយកម្ម នៅទូទាំងប្រទេស ដោយចាប់ផ្ដើមរៀបចំនៅតំបន់ដែលអាទិភាពមុនគេ ដូចជា តំបន់អង្គរ តំបន់ជុំវិញបឹងទន្លេសាប និងតំបន់បុរាណដ្ឋានជាដើម ខណៈដែលក្រោយពេលរៀបចំរួចរាល់ នឹងផ្ដល់អត្ថប្រយោជន៍យ៉ាងច្រើនទៅដល់វិស័យសំខាន់ៗមួយចំនួន ដែលក្នុងនោះរួមមានទាំងការវិនិយោគវិស័យសំណង់ វិស័យសេដ្ឋកិច្ច សង្គម បរិស្ថាន សន្តិសុខស្បៀង ធនធានវប្បធម៌ប្រវត្តិសាស្ត្រ និងនយោបាយ/អភិបាលកិច្ច ។
ទាក់ទងនឹងវិស័យសេដ្ឋកិច្ច ការរៀបចំដែនដី នគរូបនីយកម្ម និងសំណង់ នឹងផ្ដល់អត្ថប្រយោជន៍ដល់រាជរដ្ឋាភិបាលតាមរយៈការជួយតម្រង់ទិស ការវិភាជន៍ថវិកាសម្រាប់ការអភិវឌ្ឍឱ្យចំគោលដៅអាទិភាព និងមានប្រសិទ្ធភាពថវិកា ព្រមទាំងកាត់បន្ថយការអភិវឌ្ឍដោយមិនចីរភាព ។ អ្វីដែលសំខាន់ ការរៀបចំនេះផងដែរ ក៏នឹងផ្ដល់ផលវិជ្ជមានឱ្យអ្នកវិនិយោគ ដោយធានាបានទីតាំងសមស្រប មានសក្ដានុពលមានធនធានគ្រប់គ្រាន់ ក៏ដូចជាហេដ្ឋារចនាសម្ព័ន្ធ ដើម្បីធានាភាពជោគជ័យនៃការវិនិយោគ ។
ដោយឡែក សម្រាប់វិស័យសង្គម នឹងផ្ដល់នូវការរៀបចំរចនាសម្ព័ន្ធ និងសេវាសាធារណៈដែលគាំទ្រដល់ជីវភាពរស់នៅ និងភ្ញៀវទេសចរ ។ វាក៏ជួយបង្កើនការយល់ដឹងរបស់ប្រជាពលរដ្ឋឱ្យមានភាពជាម្ចាស់ក្នុងការចូលរួមប្រើប្រាស់ធនធានធម្មជាតិប្រកបដោយប្រសិទ្ធភាព និងចីរភាព ។
ការរៀបចំដែនដី នគរូបនីយកម្ម និងសំណង់ ក៏នឹងផ្ដល់អត្ថប្រយោជន៍ដល់បរិស្ថាន ដោយបានកាត់បន្ថយផលប៉ះពាល់ពីការអភិវឌ្ឍទៅលើដែនដី ការកើនឡើងកម្ដៅក្នុងទីក្រុង និងការជួយបន្សាំទៅនឹងការប្រែប្រួលអាកាសធាតុ ។ ក្រៅពីនេះ វាក៏បានផ្ដល់អត្ថប្រយោជន៍ដល់វិស័យសន្តិសុខស្បៀង ដោយចូលរួមចំណែកកំណត់ទីតាំងដែលមានសក្ដានុពលសម្រាប់គ្រប់គ្រងប្រភេទដំណាំសំខាន់ៗ ដូចជា ស្រូវ ពោត ដំឡូង ដំណាំចម្ការចម្រុះស្របទៅតាមស្រទាប់ដីដែលផ្ដល់ផលិតភាពខ្ពស់ ។
យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានបង្ហាញពីការចូលរួមចំណែកដែលជាអត្ថប្រយោជន៍ទទួលបានពីការរៀបចំដែនដី នគរូបនីយកម្ម និងសំណង់ លើបូរណភាពទឹកដី ដោយនឹងចូលរួមជាយុទ្ធសាស្ត្រសម្រាប់បម្រើដល់វិស័យការពារជាតិ តាមរយៈការរៀបចំលំនៅឋាន និងការបែងចែកដីសម្រាប់គ្រួសារកងកម្លាំងប្រដាប់អាវុធតាមបណ្ដោយព្រំដែន ។ ក្រៅពីនេះ ក៏នឹងផ្ដល់ជាប្រយោជន៍ដល់ធនធានវប្បធម៌ប្រវត្តិសាស្ត្រ ចូលរួមអភិវឌ្ឍន៍ អភិរក្ស សមស្របទៅតាមគុណតម្លៃពិសេសផ្សេងៗគ្នាតាមរយៈការរៀបចំផែនការប្រើប្រាស់ដីធ្លី ។
អត្ថប្រយោជន៍ពិសេសមួយទៀតដែលទទួលបានពីការរៀបចំដែនដី នគរូបនីយកម្ម និងសំណង់ លើវិស័យនយោបាយ និងអភិបាលកិច្ច ដោយកាត់បន្ថយ និងទប់ស្កាត់ការចូលទន្ទ្រានកាន់កាប់ដីរបស់រដ្ឋ និងកាត់បន្ថយការទិតៀនមកលើរាជរដ្ឋាភិបាលចំពោះសកម្មភាពសាងសង់រំលោភលើដីសាធារណរបស់រដ្ឋផងដែរ៕
Account
Security
Favourite Content