សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី CNA បានរាយការណ៍ថា តម្លៃប្រេងបានឡើងថ្លៃបន្តិច បន្ទាប់ពីប្រធានាធិបតីសហរដ្ឋអាមេរិក Donald Trump បញ្ចប់អាជ្ញាប័ណ្ណដែលផ្តល់ទៅឱ្យក្រុមហ៊ុន Chevron ក្នុងការប្រតិបត្តិការនៅក្នុងប្រទេសវេណេហ្ស៊ុយអេឡា។
ទន្ទឹមនឹងនេះ តម្លៃប្រេងឆៅម៉ាក Brent ឡើងថ្លៃ ០,៣ ភាគរយ ឬ ៧២,៧២ ដុល្លារក្នុងមួយបារ៉ែល ខណៈដែលតម្លៃប្រេងឆៅម៉ាក West Texas Intermediate (WTI) ឡើងថ្លៃ ០,២ ភាគរយ ឬ ៦៨,៧៨ ដុល្លារក្នុងមួយបារ៉ែល។ កាលពីថ្ងៃពុធ សន្ទស្សន៍គោលនៃម៉ាកទាំងពីរបានធ្លាក់ចុះនៅកម្រិតទាបបំផុត បើគិតចាប់តាំងពីថ្ងៃទី ១០ ខែធ្នូ ដោយសារការកើនឡើងដ៏គួរឱ្យភ្ញាក់ផ្អើលនៃស្តុកប្រេងឥន្ធនៈរបស់សហរដ្ឋអាម៉េរិក។ នេះបង្ហាញពីការចុះខ្សោយនៃតម្រូវការ និងការធ្លាក់ចុះក្តីសង្ឃឹមសម្រាប់កិច្ចព្រមព្រៀងសន្តិភាពរវាងរុស្ស៊ី និងអ៊ុយក្រែន។
នៅថ្ងៃពុធដដែលនេះ Trump បានបញ្ចប់នូវអាជ្ញាប័ណ្ណដែលផ្តល់ទៅឱ្យក្រុមហ៊ុន Chevron ដើម្បីប្រតិបត្តិការនៅក្នុងប្រទេសវេណេហ្ស៊ុយអេឡា។ គួរឲ្យបញ្ជាក់ដែរថា ក្រុមហ៊ុន Chevron នាំចេញប្រេងឆៅប្រហែល ២៤០ ០០០ បារ៉ែលក្នុងមួយថ្ងៃពីប្រតិបត្តិការរបស់ខ្លួននៅក្នុងប្រទេសវេណេហ្ស៊ុយអេឡា ដែលលើសពី ១ ភាគ ៤ នៃទិន្នផលប្រេងសរុបរបស់ប្រទេស។ ការបញ្ចប់អាជ្ញាប័ណ្ណមានន័យថា ក្រុមហ៊ុន Chevron នឹងមិនអាចនាំចេញប្រេងឆៅពីប្រទេសវេណេហ្ស៊ុយអេឡាបានទៀតទេ។
ចាប់តាំងពីចូលកាន់តំណែងជាប្រធានាធិបតីក្នុងខែមករាមក Donald Trump បាននិយាយម្តងហើយម្តងទៀតថា សហរដ្ឋអាម៉េរិកមិនត្រូវការប្រេងពីវេណេហ្ស៊ុយអេឡានោះទេ និងបង្ហាញពីលទ្ធភាពនៃការដកហូតអាជ្ញាប័ណ្ណប្រតិបត្តិការរបស់ Chevron ថែមទៀតផង។ ក្នុងអំឡុងពេលអាណត្តិដំបូងរបស់លោក Trump បានដាក់ទណ្ឌកម្មប្រឆាំងនឹងរដ្ឋាភិបាលរបស់មេដឹកនាំវេណេហ្ស៊ុយអេឡា Maduro ជាពិសេសកំណត់គោលដៅលើឧស្សាហកម្មថាមពលរបស់ប្រទេសនេះ។ ទោះបីជាទណ្ឌកម្មធ្លាប់ត្រូវបានបន្ធូរបន្ថយក៏ពិតមែន ប៉ុន្តែអតីតប្រធានាធិបតី Joe Biden ដាក់ទណ្ឌកម្មប្រេងយ៉ាងទូលំទូលាយម្តងទៀត ដោយសារលោក Maduro បរាជ័យក្នុងការរក្សាការសន្យាបោះឆ្នោតរបស់គាត់។ យ៉ាងណាមិញ Joe Biden បានទុកអាជ្ញាប័ណ្ណ Chevron ឱ្យនៅដដែល រួមជាមួយនឹងការអនុញ្ញាតពីសហរដ្ឋអាមេរិកទៅក្រុមហ៊ុនប្រេងបរទេសមួយចំនួនទៀត។
លោក Hiroyuki Kikukawa ប្រធានក្រុមហ៊ុន NS Trading ដែលជាអង្គភាពមួយរបស់ក្រុមហ៊ុន Nissan Securities លើកឡើងថា ព័ត៌មានអំពីវេណេហ្ស៊ុយអេឡាបានធ្វើឱ្យទីផ្សារមានរង្គោះរង្គើរ បន្ទាប់ពីកិច្ចចរចាបទឈប់បាញ់រុស្ស៊ី និងអ៊ុយក្រែនធ្វើឲ្យការលក់មានភាពស្ងប់ស្ងាត់នាពេលថ្មីៗនេះ។ ទន្ទឹមនឹងនេះ អ្នកតាមដានទីផ្សារនៅតែផ្តោតលើការចរចាសន្តិភាពរុស្ស៊ី-អ៊ុយក្រែនរបស់លោក Trump ។ ថ្មីៗនេះ Trump លើកឡើងថា ប្រធានាធិបតីអ៊ុយក្រែន Volodymyr Zelenskiy នឹងធ្វើដំណើរមកទីក្រុងវ៉ាស៊ីនតោននៅថ្ងៃសុក្រនេះ ដើម្បីចុះហត្ថលេខាលើកិច្ចព្រមព្រៀងរ៉ែ។ បន្ថែមពីនេះ មេដឹកនាំអ៊ុយក្រែនសង្ឃឹមថា ភាពជោគជ័យនៃកិច្ចព្រមព្រៀងនឹងមានសារៈសំខាន់សម្រាប់កិច្ចពិភាក្សាទាំងនោះ និងការបន្តជំនួយរបស់សហរដ្ឋអាម៉េរិក៕
Account
Security
Favourite Content