ភ្នំពេញ ៖ ជាទូទៅ អចលនវត្ថុ ក៏ដូចជាដីធ្លីនៅក្នុងរាជធានីភ្នំពេញគឺមានតម្លៃខ្ពស់ធៀបនឹងតំបន់ផ្សេងៗដែលស្ថិតនៅតាមបណ្ដាខេត្តនានាទូទាំងប្រទេស ប៉ុន្តែក្នុងនោះដែរ ក៏មានតំបន់មួយចំនួននៃរាជធានីភ្នំពេញមានតម្លៃទាបផងដែរ ដែលវិនិយោគិនអាចពិចារណាក្នុងការវិនិយោគដើម្បីរកប្រាក់ចំណេញ នាពេលអនាគតដ៏ខ្លីខាងមុខនេះ ។

ថ្ងៃនេះ តាមរយៈ AMS នឹងបង្ហាញពីសង្កាត់ចំនួន៥នៅរាជធានីភ្នំពេញ ដែលមានតម្លៃដីទាបជាងគេ ដែលសង្កាត់ទាំងនោះភាគច្រើនជាសង្កាត់នៅតំបន់ជាយក្រុងភ្នំពេញ។

១- សង្កាត់ប្រទះឡាង ក្នុងខណ្ឌកំបូល ៖ សង្កាត់នេះតម្លៃដីនៅជាប់ផ្លូវធំមានចន្លោះពី ៦០ដុល្លារទៅ ២៩០ដុល្លារក្នុងមួយម៉ែត្រការ៉េ និងតម្លៃចន្លោះពី ៩០ដុល្លារទៅ១៥០ដុល្លារអាមេរិកក្នុងមួយម៉ែត្រការ៉េសម្រាប់តំបន់នៅតាមបណ្ដោយផ្លូវតូចៗ។

២- សង្កាត់ឪឡោក ក្នុងខណ្ឌកំបូល ៖ តម្លៃដីនៅសង្កាត់នេះនៅតាមបណ្ដោយផ្លូវធំមានតម្លៃ ៧០ដុល្លារទៅ ១៦០ដុល្លារអាមេរិកក្នុងមួយម៉ែត្រការ៉េ និងតម្លៃ ៥០ដុល្លារទៅ ១០០ដុល្លារអាមេរិកក្នុងមួយម៉ែត្រការ៉េសម្រាប់ដីនៅតំបន់ផ្លូវតូចៗ ។

៣- សង្កាត់ពន្សាំង នៃខណ្ឌព្រែកព្នៅ ៖ សង្កាត់នេះជាសង្កាត់ថ្មីដែលទើបកាត់មកពីរដ្ឋបាលខេត្តកណ្ដាលមកក្រោមការគ្រប់គ្រងរបស់រដ្ឋបាលរាជធានីភ្នំពេញ ។ តម្លៃដីនៅសង្កាត់មានចន្លោះពី ៣០ដុល្លារទៅ ៣៧០ដុល្លារអាមេរិកសម្រាប់តំបន់នៅតាមបណ្ដោយផ្លូវធំៗដោយអាស្រ័យលើទីតាំងសក្ដានុពល និងតម្លៃចន្លោះពី២០ដុល្លារទៅ ១៩០ដុល្លារសម្រាប់តំបន់នៅតាមបណ្ដោយផ្លូវតូចៗ ។

៤- សង្កាត់ពញាពន់ ក្នុងខណ្ឌព្រែកព្នៅ ៖ តំបន់នេះ តម្លៃដីមានចន្លោះពី ៦០ដុល្លារទៅ ២៥០ដុល្លារអាមេរិកក្នុងមួយម៉ែត្រការ៉េសម្រាប់តំបន់តាមបណ្ដោយផ្លូវធំៗ និងតម្លៃ ៤០ដុល្លារទៅ ៨០ដុល្លារអាមេរិកក្នុងតំបន់ស្ថិតនៅតាមបណ្ដោយផ្លូវតូចៗ ។

៥- សង្កាត់បឹងធំ ក្នុងខណ្ឌកំបូល ៖ សង្កាត់នេះតម្លៃដីធ្លីក៏អាចចាត់ទុកថានៅមានកម្រិតទាបដែរ ត្រឹមពី ៩០ដុល្លារទៅ ២៦០ដុល្លារអាមេរិកក្នុងមួយម៉ែត្រការ៉េសម្រាប់តំបន់តាមបណ្ដោយផ្លូវធំ និងចន្លោះពី ៦០ដុល្លារទៅ ១៥០ដុល្លារអាមេរិកក្នុងមួយម៉ែត្រការ៉េសម្រាប់តំបន់នៅតាមបណ្ដោយផ្លូវតូចៗ ។

ជាមួយនឹងការបង្ហាញពីតម្លៃដីធ្លីនៅក្នុងសង្កាត់៥ខាងលើនេះ អ្នកជំនាញអចលនទ្រព្យជាច្រើនបានបង្ហាញទស្សនទានស្រដៀងគ្នាថា ការវិនិយោគដីធ្លីដែលអាចរកចំណេញបានគឺព្យាយាមរកទីតាំងណាដែលតម្លៃដីនៅទាប និងអាចលក់ចេញវិញក្នុងតម្លៃខ្ពស់ក្នុងរយៈពេល២-៣ឆ្នាំបន្ទាប់។ វិនិយោគិនដែលចង់បានចំណេញពីការវិនិយោគដីធ្លីគួររកទីតាំងនៅជាយក្រុង ហើយកាន់តែឆ្ងាយពីក្រុងតម្លៃកាន់តែទាប និងអាចចំណេញបានខ្ពស់នៅពេលមានការអភិវឌ្ឍទៅដល់ទីតាំងនោះ ៕