មួកស្លឹកត្នោត ត្រូវបានគេស្គាល់ថា ជាផ្នែកមួយនៃអត្តសញ្ញាណខ្មែរដោយស្ទើរតែគ្រប់ពិធីបុណ្យប្រពៃណីជាតិនានា ភាគច្រើនគេតែងតែយកមួកស្លឹកត្នោតដែលជាផលិតផល និងសម្ភារៈធ្វើឡើងដោយដៃរបស់ប្រជាសហគមន៍តាមបណ្តាខេត្តនានា ដាក់តាំងតុបតែងលម្អនៅតាមបណ្តាក្រុមហ៊ុនឯកជន ស្ថាប័នរដ្ឋ ទីវត្តអារ៉ាមនានា ជាពិសេសក្នុងឱកាសបុណ្យចូលឆ្នាំថ្មីប្រពៃណីជាតិខ្មែរតែម្ដង ខណៈដែលម្ចាស់អាជីវកម្មមួយកន្លែងរំពឹងថា នឹងអាចលក់បានរហូតដល់រាប់ម៉ឺនមួកក្នុងអំឡុងពេលបុណ្យចូលឆ្នាំខាងមុខនេះ។

លោក ឡេង លាភផេង ជាម្ចាស់អាជីវកម្មលក់មួកស្លឹកត្នោត និងសម្ភារៈសម្រាប់តុបតែងលម្អបែបខ្មែរ ក្រោមស្លាកយីហោ «មួកស្លឹកត្នោតខ្មែរ» មានទីតាំងស្ថិតនៅសង្កាត់ទឹកថ្លា ខណ្ឌសែនសុខ រាជធានីភ្នំពេញ ខាងក្រោយបុរីអ័រគីដេ បានប្រាប់ AMS Economy ឱ្យដឹងថា នៅក្នុងឆ្នាំនេះ តម្រូវការមួកស្លឹកត្នោតនឹងកើនឡើងជាងឆ្នាំមុន ជាក់ស្ដែងត្រឹមតែរយៈពេលជាងកន្លះខែតែប៉ុណ្ណោះ តាមរយៈអាជីវកម្ម «មួកស្លឹកត្នោតខ្មែរ» របស់លោក អាចលក់បានប្រមាណ ៥០០០មួករួចទៅហើយ។


លោក លាភផេង បានបញ្ជាក់ថា ៖

«នៅកន្លែខ្ញុំមានលក់សម្ភារៈដេគ័របែបខ្មែរជាច្រើនប្រភេទ ដោយផលិតផល និងសម្ភារៈទាំងអស់នេះ ខ្ញុំទទួលទិញពីឈ្មួញកណ្ដាល និងបញ្ជាទិញបងប្អូនដែលជាប្រជាសហគមន៍រស់នៅតាមបណ្តាខេត្តផ្សេងៗ ដូចជា កំពង់ឆ្នាំ បាត់ដំបង សៀមរាប ជាពិសេសខេត្តបន្ទាយមានជ័យ»។

បន្ថែមពីនេះ ក្រៅពីផលិតផលដែលបង្ហាញពីអត្តសញ្ញាណខ្មែរនៃមួកស្លឹកត្នោត អាជីវកម្ម «មួកស្លឹកត្នោតខ្មែរ» ក៏មានលក់សម្ភារៈតុបតែងលម្អបែបខ្មែរផ្សេងៗទៀត ដូចជា កញ្ចើ ល្អី ឈ្នាង អង្រុត ក្អម ស្បូវ គោមផ្កាយ ទ្រូ សង្រែក បំពង់ទឹកត្នោត ស្លាកសួស្ដីឆ្នាំថ្មី និងប្រភេទខ្សែទង់ចំរុះពណ៌ផងដែរ។

លោក ឡេង លាភផេង បានបន្តថា ៖

«ផលិតផលដែលគេនិយមទិញរួមមាន មួកត្នោត ស្បូវ គោមផ្កាយ ទង់ជ័យ ឈ្នាង កន្ទេលកក់ជាដើម ដែលមានតម្លៃចន្លោះពី ២៥០០ ដល់ ១០ម៉ឺនរៀល អាស្រ័យទៅតាមប្រភេទផលិតផល និងទំហំរបស់ផលិតផល។ ជាក់ស្ដែង មួកស្លឹកត្នោត ជាផលិតផលដែលមានការគាំទ្រខ្លាំងជាងគេ ព្រោះបងប្អូនយើងនិយមទិញច្រើនអាចឈានដល់រាប់សិបម៉ឺនមួកក្នុងមួយរដូវកាល ហើយតាមរយៈមួកស្លឹកត្នោតនេះវាក៏ជាផ្នែកមួយជួយឱ្យក្រុមអ្នកផលិតដែលជាប្រជាសហគមន៍ទទួលបានចំណូលសម្រាប់ផ្គត់ផ្គង់ជីវភាពផងដែរ។ ដោយឡែក ចំពោះអតិថិជនរបស់អាជីវកម្មខាងលើនេះ ភាគច្រើនជាអ្នកទិញដុំយកទៅលក់បន្តទាំងនៅក្នុងក្រុង និងនៅតាមជាយក្រុង ហើយក៏មានអ្នកទិញយកទៅលក់នៅតាមបណ្តាខេត្តដែរ ដូចជា ខេត្តព្រះសីហនុ រតនគិរី តាកែវ ព្រៃវែងជាដើម »។

គួរបញ្ជាក់ថា អាជីវកម្មលក់សម្ភារៈតាំងលម្អបែបខ្មែរ «មួកស្លឹកត្នោតខ្មែរ» ទើបតែចាប់ផ្ដើមបង្កើត និងដំណើរការនៅឆ្នាំ២០២៣ ដោយផ្ដោតលើគ្រឿងដេគ័រខ្មែរ ពិសេសគឺសម្រាប់រៀបចំសង្ក្រាន្ត ព្រោះលោកមានចំណូលចិត្តការតុបតែងបែបខ្មែរ ហើយអតិថិជនក៏អាចរកទិញសម្ភារៈតាំងលម្អបានច្រើនមុខ ច្រើនប្រភេទដោយមិនចាំបាច់ដើររកច្រើនកន្លែង និងចំណាយពេលយូរនោះទេ។

យ៉ាងណាមិញ លោក លាភផេង ក៏បានប្រាប់ពីផលលំបាកក្នុងអាជីវកម្មនេះដែរ ដោយគឺភាគច្រើនទាក់ទងនឹងការរកក្រុមអ្នកផលិតនៅតាមតំបន់ផ្សេងៗ ព្រោះត្រូវចុះទៅរកដោយខ្លួនឯង ឬរកឈ្មួញកណ្តាលដែលអាចប្រមូលទិញ និងមានភាពស្មោះត្រង់។ ចំណែកពេលអនាគត លោកមានបំណងចង់ផ្សព្វផ្សាយពីសម្ភារបែបខ្មែរនេះឱ្យមានភាពល្បីល្បាញ បន្ថែមទៀត៕