សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ផ្លូវជាតិលេខ៣១ ដែតភ្ជាប់ពីផ្លូវជាតិលេខ៣ ត្រង់ផ្លូវបំបែក បែកគុសទៅដល់ទីរួមស្រុកកំពង់ត្រាច មានប្រវែងជាង៥៣គីឡូម៉ែត្រ បានចាប់ផ្ដើមបើកការដ្ឋានស្ដារ និងលើកកម្រិតគុណភាពកាលពីចុងឆ្នាំ២០២២ ដែលមកដល់បច្ចុប្បន្ននេះ គម្រោងអភិវឌ្ឍន៍ផ្លូវជាតិមួយនេះសម្រេចស្ទើរតែទាំងស្រុងហើយ និងដោយគ្រោងបញ្ចប់ជាស្ថាពរនៅចុងខែមិថុនា ឆ្នាំ ២០២៤ខាងមុខនេះ ពោលគឺសម្រេចមុនផែនការដែលបានកំណត់រហូតដល់មួយឆ្នាំ ។
បើតាមឯកឧត្តម ខាន់ ម៉ាណេរ រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោងស្ដារ និងលើកកម្រិតគុណភាពផ្លូវជាតិលេខ៣១ បានឱ្យដឹងថា តាមការគ្រោងទុក ការងារនឹងបញ្ចប់ក្នុងដំណាច់ខែមិថុនាឆ្នាំ២០២៤ ក្រោយពីបំពេញបន្ថែមការងារបំពាក់សម្ភារៈ បរិក្ខាសុវត្តិភាពរួច អាចនឹងរៀបចំបែបបទប្រគល់ទទួលបញ្ចប់គម្រោងបណ្ដោះអាសន្ននៅចុងខែសីហា ឆ្នាំ២០២៤នេះ ពោលគឺមានន័យថាបញ្ចប់មុនកិច្ចសន្យារយៈពេល១ឆ្នាំ។
ឯកឧត្តមបន្តថា មន្ត្រីបច្ចេកទេសពាក់ព័ន្ធ ភាគីក្រុមហ៊ុនសាងសង់ CRBC ព្រមទាំងក្រុមហ៊ុនត្រួតពិនិត្យលក្ខណ:បច្ចេកទេស WACC តែងយកចិត្តទុកដាក់ និងពិនិត្យជាក់ស្តែងលើវឌ្ឍនភាពការងារ ដូចជាការកាយដីសម្អាតពង្រីកផ្លូវមុខបន្ថែមក្រោមស្ពានផ្លូវវាងផ្សារបន្ទាយមាសត្រង់គីឡូម៉ែត្រលេខ 35+750 ដាក់លូបង្ហូរទឹកកាត់ផ្លូវតភ្ជាប់ទល់ខ្លោងទ្វារវត្តស្រែរនោង និងបន្ថែមដែកក្បាំង guard rail ការពារលូប្រអប់ ដោយលទ្ធផលការងារគម្រោងជារួមគិតត្រឹមថ្ងៃទី២៥ ខែមេសា ឆ្នាំ២០២៤ សម្រេចបាន៧៨,៤៣%ហើយ ។
គម្រោងស្ដារ និងលើកកម្រិតគុណភាពផ្លូវជាតិលេខ៣១ មានប្រវែងសរុប ៥៣,៥៣គ.ម (ចាប់ពីបែកគុស ចំណុចប្រសព្វផ្លូវជាតិលេខ៣ រហូតទៅដល់ទីរួមស្រុកកំពង់ត្រាច ចំណុចតភ្ជាប់ផ្លូវជាតិលេខ៣៣) បានលេចចេញវឌ្ឍនភាពជាមោទកភាព។ ទន្ទឹមនឹងនោះ ការចុះពិនិត្យជាប្រចាំ តែងបានធ្វើឡើងដើម្បីដានការងារបច្ចេកទេសសាងសង់របស់ក្រុមហ៊ុនសំដៅឱ្យការសាងសង់ប្រព្រឹត្តទៅស្របតាមបទដ្ឋានបច្ចេកទេស និងកិច្ចសន្យាសាងសង់ ធានាឱ្យបានការសាងសង់មានគុណភាពរឹងមាំ អាចប្រើប្រាស់ជាប់បានយូរអង្វែង ។
ផ្លូវនេះដែរក៏នឹងតភ្ជាប់ទៅផ្លូវជាតិលេខ៣៣ ពីទីរួមស្រុកកំពង់ត្រាចទៅដល់ទីរួមខេត្តកំពត និងចេញពីស្រុកកំពង់ត្រាចទៅច្រកព្រំដែនកម្ពុជា-វៀតណាម (ច្រកលក ) ដែលក្នុងនោះគម្រោងស្ដារ និងលើកកម្រិតគុណភាពផ្លូវជាតិលេខ៣១ គ្រោងចំណាយថវិកាប្រមាណ ៦០លានដុល្លារអាមេរិក និង ផ្លូវជាតិលេខ៣៣ គ្រោងចំណាយថវិកាប្រមាណ៦១លានដុល្លារអាមេរិក ។ ក្រោយបញ្ចប់ការសាងសង់ផ្លូវជាតិទាំងពីរខ្សែនេះ នឹងចូលរួមចំណែកដល់ការតភ្ជាប់រវាងរាជធានីភ្នំពេញ ខេត្តតាកែវ ខេត្តកំពត ខេត្តកែប និងខេត្តព្រះសីហនុ ព្រមទាំងតភ្ជាប់ទៅនឹងតំបន់ឧស្សាហកម្ម កំពង់ផែសមុទ្រ តំបន់ព្រំដែនកម្ពុជា-វៀតណាម និងតំបន់ទេសចរណ៍នានា នៅក្នុងខេត្តកែប និងខេត្តកំពត ៕
Account
Security
Favourite Content