សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងផ្លូវជាតិលេខ១០ ដែលតភ្ជាប់ពីខេត្តបាត់ដំបង កាត់តាមខេត្តពោធិ៍សាត់ ទៅដល់ខេត្តកោះកុង នឹងជួយជំរុញសក្ដានុពលវិស័យទេសចរណ៍ ជាពិសេស សម្រាប់អ្នកដែលចូលចិត្តធ្វើដំណើរទស្សនាចរ គយគន់ធម្មជាតិដ៏ស្រស់ស្អាតនៅតាមបណ្ដាខេត្តជាប់ព្រំដែនថៃ។ ក្រៅពីនេះ តាមរយៈផ្លូវជាតិលេខ១០នេះ ក៏នឹងទាក់ទាញការវិនិយោគទៅកាន់តំបន់ខេត្តកោះកុង ពោធិ៍សាត់ និងបាត់ដំបងបន្ថែមទៀត ជាពិសេស ការវិនិយោគទៅលើវិស័យទេសចរណ៍ រួមមានសណ្ឋាគារ ផ្ទះសំណាក់ ភោជនីយដ្ឋាន និងរីសតជាដើម ។
បើតាមក្រសួងសាធារណការ និងជញ្ជូន បានឱ្យដឹងថា គម្រោងសាងសង់ផ្លូវជាតិលេខ១០ បានរួមចំណែកយ៉ាងសំខាន់ក្នុងការកែលម្អជីវភាពរស់នៅរបស់ប្រជាជននៅតំបន់នោះ ដោយផ្តល់ភាពងាយស្រួលក្នុងការធ្វើចរាចរណ៍ និងកាត់បន្ថយពេលវេលាធ្វើដំណើរ ។
ផ្លូវវជាតិលេខ១០ ជាប្រភេទផ្លូវ Grade III ក្រាលកៅស៊ូពីរស្រទាប់ (DBST) មានប្រវែងផ្លូវ សរុប១៩៧,៣៦ គីឡូម៉ែត្រ និងទទឹង ៩ម៉ែត្រ លាតសន្ធឹងកាត់ស្រុកសំឡូត ខេត្តបាត់ដំបង ពោធិ៍សាត់ រហូតដល់ខេត្តកោះកុង ។ គម្រោងនេះ បានចំណាយថវិកាប្រមាណជាង២០០លានដុល្លារអាមេរិក ដែលជាហិរញ្ញប្បទានរបស់រដ្ឋាភិបាលចិនរួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ ការបោសសម្អាតគ្រាប់មីនជាដើម ។
បើតាមអ្នកជំនាញនៃវិស័យអចលនទ្រព្យបានបង្ហាញពីទស្សនវិជ្ជមានតាំងពីគម្រោងនេះចាប់ផ្ដើមលើកដំបូង ដោយបានលើកឡើងថា គម្រោងនេះនឹងជំរុញការវិនិយោគលើវិស័យដីធ្លី និងអចលនទ្រព្យនៅតំបន់តាមបណ្ដោយផ្លូវនេះក្នុងខេត្តទាំងបី ហើយនឹងធ្វើឱ្យតម្លៃដីនៅតាមបណ្ដោយផ្លូវនេះកើនឡើងមួយកម្រិតទៀត ក្រោយពេលផ្លូវបានសាងសង់រួចរាល់ និងមានអ្នកធ្វើដំណើរឆ្លងកាត់ច្រើន ។
អ្វីដែលជាការកត់សម្គាល់ ក្រោយពេលរដ្ឋាភិបាលចំណាយថវិការាប់រយលានដុល្លារអាមេរិកសាងសង់ផ្លូវមួយនេះឃើញថា ពលរដ្ឋនៅប៉ែកពាយព្យនៃប្រទេស ដូចជា បាត់ដំបង ពោធិ៍សាត់ និងបន្ទាយមានជ័យកាន់តែងាយស្រួល និងចំណាយពេលខ្លីដើម្បីធ្វើដំណើរទៅកាន់ខេត្តកោះកុង តំបន់សមុទ្រ និងធ្វើឱ្យខេត្តកោះកុងទាក់ទាញភ្ញៀវទេសចរបានកាន់តែច្រើន ជាក់ស្ដែង កាលពីថ្ងៃឈប់សម្រាកកន្លងទៅនេះខេត្តកោះកុងទទួលបានភ្ញៀវទេសចរយ៉ាងច្រើនកុះករ រហូតដល់ខ្វះបន្ទប់សម្រាក់ស្នាក់នៅទៀតផង។
លោកជំទាវ មិថុនា ភូថង អភិបាលខេត្តកោះកុង បានថ្លែងប្រាប់សារព័ត៌មាន AMS កាលពីពេលថ្មីៗនេះថា តាមរយៈផ្លូវជាតិលេខ១០ និងផ្លូវជាតិលេខ៤៨ ពិតជាបានធ្វើឱ្យភ្ញៀវទេសចរមកលេងខេត្តកោះកុងកាន់តែច្រើន និងពិតជាបានធ្វើឱ្យបន្ទប់ស្នាក់នៅមានការខ្វះខាតបន្តិចពិតមែន ។
លោកជំទាវបន្តថា ឱកាសនេះគឺជាពេលវេលាសម្រាប់វិនិយោគិនក្នុងការបណ្ដាក់ទុនវិនិយោគលើបន្ទប់ស្នាក់នៅដូចជាសណ្ឋាគារ ផ្ទះសំណាក់ រីសត និងភោជនីយដ្ឋាន ពីព្រោះថា នៅពេលផ្លូវជាតិលេខ១០ និងផ្លូវជាតិលេខ៤៨ សាងសង់រួចរាល់ ប្រាកដណាស់ថា នឹងមានទេសចរជាតិ - អន្តរជាតិ កាន់តែច្រើនមកសម្រាក និងកម្សាន្តនៅក្នុងខេត្តកោះកុងជាក់ជាមិនខាន៕
Account
Security
Favourite Content