សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ការនាំចេញផលិតផលពីតំបន់សេដ្ឋកិច្ចពិសេសមានរហូតដល់ ២៣% ទៅ ២៥% នៃការនាំចេញសរុបរបស់កម្ពុជាទៅលើទីផ្សារពិភពលោកចាប់ពីឆ្នាំ២០២២ ដល់ឆ្នាំ២០២៤ ។ នេះបើតាមការឱ្យដឹងរបស់ឯកឧត្តមបណ្ឌិត សរ សិនិរ៉ា អគ្គលេខាធិការរងគណៈកម្មាធិការវិនិយោគកម្ពុជា។
យោងតាមអគ្គនាយកដ្ឋានគយ និងរដ្ឋាករកម្ពុជា បានឱ្យដឹងថា ទំហំពាណិជ្ជកម្មនាំចេញ-នាំចូលសរុបរបស់កម្ពុជា បានឈានដល់ ៥៤.៧៤ ពាន់លានដុល្លារអាមេរិក កាលពីឆ្នាំ ២០២៤ ដោយឡែកសម្រាប់តែរយៈពេល៥ខែ គិតពីខែមករា ដល់ ខែឧសភា ឆ្នាំ២០២៥ កន្លងទៅនេះ មានទំហំជាង ២៥ពាន់លានដុល្លារ។
ឯកឧត្តមបណ្ឌិត សរ សិនិរ៉ា អគ្គលេខាធិការរងគណៈកម្មាធិការវិនិយោគកម្ពុជា បានមានប្រសាសន៍ថា៖
« តំបន់សេដ្ឋកិច្ចពិសេសកម្ពុជា ដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ចកម្ពុជា ដោយទាក់ទាញការវិនិយោគផ្ទាល់ពីបរទេស ជំរុញកំណើនឧស្សាហកម្ម និងការធ្វើពិពិធកម្មសេដ្ឋកិច្ច បង្កើតការងារ និងរួមបញ្ចូលកម្ពុជាទៅក្នុងខ្សែច្រវាក់តម្លៃសកល»។
នៅក្នុងសិក្ខាសាលាស្តីពីការជំរុញការវិនិយោគបៃតងក្នុងតំបន់សេដ្ឋកិច្ចពិសេសនៅកម្ពុជានាពេលថ្មីៗកន្លងមកនេះ អគ្គលេខាធិការរងបានលើកឡើងថា៖ ច្បាប់ស្តីពីវិនិយោគនៃព្រះរាជាណាចក្រកម្ពុជា និងអនុក្រឹត្យស្តីពីការអនុវត្តច្បាប់នេះ បានជំរុញ និងលើកទឹកចិត្តការវិនិយោគបៃតងដែលរួមមានការវិនិយោគក្នុងវិស័យថាមពលបៃតង, បច្ចេកវិទ្យា រួមចំណែកដល់ការបន្សុំ និងការកាត់បន្ថយការប្រែប្រួលអាកាសធាតុ, ការគ្រប់គ្រង និងការពារបរិស្ថាន ព្រមទាំងការអភិរក្សជីវៈចម្រុះ និងសេដ្ឋកិច្ចចក្រាជាដើម។
បើតាមឯកឧត្តម សួន សុផល អគ្គលេខាដ្ឋានរងនៃគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា (CDC) បានឱ្យដឹងថា ចាប់ឆ្នាំ២០១១ ដល់ខែតុលា ឆ្នាំ២០២៤ ទំនិញដែលផលិតនៅក្នុងតំបន់សេដ្ឋកិច្ចពិសេសរួមចំណែកនៃការនាំចេញរបស់កម្ពុជាបានដល់ ៣២,៦ពាន់លានដុល្លារ។ ក្រៅពីនេះ នៅមានការវិនិយោគទៅលើវិស័យផលិតរថយន្ត (ការដំឡើងរថយន្ត ការផលិតគ្រឿងបន្លាស់រថយន្ត កៅអីរថយន្ត និងគ្រឿងបង្គុំនានាពាក់ព័ន្ធនឹងយានយន្ត)។ វិស័យអេឡិត្រូនិច រួមមានគ្រឿងបង្គុំអគ្គិសនី គ្រឿងបន្លាស់អេឡិចត្រូនិក បន្ទះសូឡា ការផលិតបន្ទះសៀគ្វីបោះពុម្ព នឹងខ្សែឧបករណ៍ភ្ជាប់…ជាដើម។
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ធ្លាប់បានលើកឡើងថា៖ ការបង្កើតតំបន់សេដ្ឋកិច្ចពិសេសបានកាន់តែច្រើន សេដ្ឋកិច្ចជាតិក៏នឹងរីកចម្រើនកាន់តែខ្លាំងដូចគ្នា។ វាធ្វើឱ្យមានកំណើនជីវភាពប្រជាពលរដ្ឋដែលនៅជុំវិញនោះកាន់តែធូរធា ដោយសារមានការងារធ្វើច្រើន សេដ្ឋកិច្ចមានដំណើរការ។ ការបង្កើតតំបន់សេដ្ឋកិច្ចពិសេស ជារឿងចំណេញសម្រាប់សេដ្ឋកិច្ចជាតិ ដែលជួយជំរុញកំណើនទាំងសេដ្ឋកិច្ចជាតិ និងសេដ្ឋកិច្ចប្រជាពលរដ្ឋផងដែរ៕
Account
Security
Favourite Content