សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពត ៖ អ្នកឧកញ៉ាបណ្ឌិត សុខ គង់ អគ្គនាយកក្រុមហ៊ុនសូគីម៉ិច អ៊ិនវេសមេន គ្រុប បានឱ្យដឹងថា ការវិនិយោគអភិវឌ្ឍន៍តំបន់ទេសចរណ៍ឧទ្យានជាតិព្រះមុនីវង្ស (បូកគោ) គិតមកទល់ពេលនេះ បានចំណាយទុនអស់ប្រហែលពី ៧០០ទៅ ៨០០លានដុល្លារអាមេរិកហើយ ប៉ុន្តែក្រុមហ៊ុនមិនទាន់ទទួលបានប្រាក់ចំណេញមកវិញនៅឡើយនោះទេ។
អ្នកឧកញ៉ាបណ្ឌិត សុខ គង់ បានលើកឡើងដូច្នេះនៅក្នុងឱកាសជួបសំណេះសំណាល និងផ្តល់បទសម្ភាសជាមួយអ្នកសារព័ត៌មានមកពី៣០ស្ថាប័ន ដែលរៀបចំឡើងដោយក្លិបអ្នកកាសែតកម្ពុជា ដើម្បីផ្សព្វផ្សាយទ្រង់ទ្រាយធំពីសក្តានុពលនៃការអភិវឌ្ឍក្រុងបូកគោ កាលពីថ្ងៃទី ២៩ ខែឧសភា ឆ្នាំ២០២៤។
អ្នកឧកញ៉ា សុខ គង់ បានមានប្រសាសន៍ថា៖ ចាប់តាំងពីក្រុមហ៊ុនទទួលបានសិទ្ធិវិនិយោគអភិវឌ្ឍន៍តំបន់ឧទ្យានជាតិបូកគោ កាលពីឆ្នាំ២០០៨ រហូតមកទល់នឹងពេលនេះ ក្រុមហ៊ុនបានចំណាយទុនអស់ពី ៧០០ទៅ ៨០០លានដុល្លារអាមេរិកហើយទៅលើការវិនិយោគអភិវឌ្ឍន៍ហេដ្ឋារចនាសម្ព័ន្ធផ្លូវ ភ្លើង ទឹក សណ្ឋាគារលំដាប់ផ្កាយ ៥, គម្រោងសង់លំនៅឋានប្រណិត និងសំណង់អគារផ្សេងៗទៀតដែលបម្រើឲ្យវិស័យទេសចរណ៍ និងពាណិជ្ជកម្មនៅតំបន់នេះ។
អ្នកឧកញ៉ា បានបន្តលើកឡើងថា៖
«ឥឡូវនេះ យើងបានសាងសង់ ផ្លូវ ភ្លើង ទឹក និងអ្វីៗផ្សេងទៀតច្រើន ហើយអស់ប្រហែល ៧ ទៅ ៨រយលានដុល្លារ ក៏ប៉ុន្តែថាចំណេញ ? គឺអត់មានទេ មានតែខាត»។
អ្នកឧកញ៉ា បានបន្តថា ៖ ទោះបីជាស្ថានភាពសេដ្ឋកិច្ចសកលមិនល្អ ដែលកំពុងប៉ះពាល់ដល់ដំណើរការអភិវឌ្ឍន៍នៅរមណីយដ្ឋានបូកគោទាំងមូល ជាពិសេសទៅលើគម្រោងអភិវឌ្ឍន៍លំនៅឋាន និងដីឡូតិ៍ ក៏ប៉ុន្តែក្រុមហ៊ុននៅតែបន្តធ្វើការអភិវឌ្ឍជាជំហ៊ានៗជាបន្តបន្ទាប់ ហើយនៅពេលសេដ្ឋកិច្ចងើបឡើងវិញ ការអភិវឌ្ឍនឹងដំណើរការល្អឡើងវិញ។
បើតាមអ្នកឧកញ៉ា សុខ គង់ ក្រុមហ៊ុន សុខា អូតែល ដែលជាបុត្រសម្ព័ន្ធរបស់ក្រុមហ៊ុន សូគីម៉ិច អ៊ិនវេសមេន គ្រុប បានទទួលសិទ្ធិវិនិយោគអភិវឌ្ឍន៍ឧទ្យានជាតិព្រះមុនីវង្ស (បូកគោ) ពីរាជរដ្ឋាភិបាលកាលពីឆ្នាំ២០០៨ នៅលើទំហំដីសរុបប្រមាណ ៤ម៉ឺនហិកតា។
គួរឱ្យដឹងថា ៖ ឧទ្យានជាតិព្រះមុនីវង្ស ដែលគេស្គាល់ជាទូទៅថាឧទ្យានជាតិបូកគោស្ថិតនៅលើជួរភ្នំដំរី ដែលមានផ្ទៃក្រឡា១៤ម៉ឺនហិកតា ឬ ១៤០០គីឡូម៉ែត្រក្រឡាលាតសន្ធឹងដល់ខេត្តកំពង់ស្ពឺ និងខេត្តព្រះសីហនុ។ ឧទ្យានជាតិនេះ ត្រូវបានគេចាត់ទុកថា ជាគោលដៅទេសចរណ៍ដ៏ទាក់ទាញនៅខេត្តកំពត ដែលមានទាំងតំបន់ទេសចរណ៍បែបធម្មជាតិ,តំបន់ទេសចរណ៍វប្បធម៌,តំបន់ទេសចរណ៍បែបសាសនា និងតំបន់ទេសចរណ៍បង្កើតថ្មី។
អ្នកឧកញ៉ា សុខ គង់ បានបញ្ជាក់ថា ទំហំផ្ទៃដីភ្នំបូកគោចំនួនជាង ១៥ម៉ឺន ហិកតា តែអ្នកឧកញ៉ាកាន់កាប់តែ ៤ ម៉ឺន ហិកតា ខណៈក្រុមហ៊ុនអ្នកឧកញ៉ាមានផែនការសាងសង់ហេដ្ឋារចនាសម្ព័ន្ធផ្សេងទៀត៕
Account
Security
Favourite Content