សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងពេលស្ថានភាពនៃវិបត្តិសកលបន្តជះឥទ្ធិពលដល់វិស័យអចលនទ្រព្យជាសកលនោះ ការទិញលក់ដីធ្លីនៅលើទីផ្សារកម្ពុជាក៏មានការថមថយចុះ និងមិនមានហាងឆេងខ្ពស់ប៉ុន្មាននោះទេ ជាពិសេសមានអ្នកលក់ច្រើនជាងអ្នកទិញ ហើយអ្នកទិញក៏រកតែដីណាដែលមានតម្លៃទាបជាងទីផ្សារ។ យ៉ាងណាក៏ដោយ សម្រាប់ការធ្លាក់ចុះតម្លៃនេះក៏មិនមែនទាំងអស់នោះ ពោលគឺដីណាដែលមានទីតាំងល្អ ឬក្នុងគម្រោងវិនិយោគរបស់រាជរដ្ឋាភិបាល ក៏ដូចជាវិស័យឯកជន នៅតែអាចរក្សាបានតម្លៃថ្លៃ និងមានសកម្មភាពទិញ-លក់ដដែល។
អ្នកអភិវឌ្ឍន៍ដីធ្លីមួយកន្លែងស្ថិតក្នុងសង្កាត់កំបូល ខណ្ឌកំបូល រាជធានីភ្នំពេញ បានលើកឡើងថា សម្រាប់ទីតាំងដីដែលស្ថិតនៅក្នុងតំបន់មានសក្ដានុពលនៃការវិនិយោគពីវិស័យឯកជន ក៏ដូចជាតំបន់ដែលស្ថិតផែនការអភិវឌ្ឍរបស់រាជរដ្ឋាភិបាលនៅតែមានសកម្មភាពទិញ-លក់ជាធម្មតា និងអាចរក្សាបានតម្លៃខ្ពស់ដដែលបើទោះជាស្ថិតក្នុងបរិបទសេដ្ឋកិច្ចដូចពេលបច្ចុប្បន្ននេះក៏ដោយ។
លោកបន្តថា ៖
«ដីដែលមានតម្រូវការពីអតិថិជនគឺជាដីដែលនៅជិតៗក្រុងភ្នំពេញ ជាដីដែលមានសក្ដានុពលផ្នែកលំនៅឋាន និងមានគម្រោងអភិវឌ្ឍន៍ទាំងរដ្ឋ និងឯកជន ដូចជាដីដែលមានការអភិវឌ្ឍផ្លូវស្អាតល្អ មានការតភ្ជាប់ប្រព័ន្ធអគ្គិសនី ប្រព័ន្ធទឹក និងប្រព័ន្ធលូទឹកស្អុយបានរួចរាល់ជាដើម ។ ដីទាំងនេះ គឺមានតម្រូវការសម្រាប់អ្នកដែលត្រូវការទិញហើយអភិវឌ្ឍន៍ ដូចជាសង់ផ្ទះផ្ទាល់ខ្លួន សង់ជាឃ្លាំងសម្រាប់ជួល ឬសង់ជាផ្ទះជួល ។ សម្រាប់អ្នកទិញដើម្បីទុកវិនិយោគបន្តគឺមិនសូវជាមាននោះទេ ក្នុងបរិបទពេលនេះ »។
លោក សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) ក៏បានលើកឡើងផងដែរថា ដីដែលមានទីតាំងល្អៗ គឺនៅតែមានការទិញលក់ ដូចជាដីដែលស្ថិតនៅតំបន់ដែលមានសក្ដានុពលសម្រាប់ការវិនិយោគនៅពេលអនាគត ដីដែលមានការអភិវឌ្ឍហេដ្ឋារចនាសម្ព័ន្ធ និងដី ស្ថិតនៅក្បែរគម្រោងអភិវឌ្ឍន៍ធំៗជាដើម ។
ជាមួយគ្នានេះ លោកក៏ដាក់ការរំពឹងដែរថា ស្ថានភាពអចលនទ្រព្យនៅក្នុងប្រទេសកម្ពុជានាឆ្នាំ២០២៤នេះ អាចនឹងមានសកម្មភាពប្រសើរជាងឆ្នំាមុន ដោយសកម្មនៃការទិញលក់ដីធ្លី និងសកម្មភាពនៃការវិនិយោគនឹងអាចមានភាពមមាញឹកជាងឆ្នាំ២០២៣ ជាក់ស្ដែងនៅដើមឆ្នាំ ២០២៤នេះ ឃើញមានសកម្មភាពរបស់វិនិយោគិនស្វែងការវិនិយោគចាប់ផ្ដើមកើនឡើងវិញជាបណ្ដើរៗ។
Account
Security
Favourite Content