សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ស្របនឹងផែនការបញ្ចប់ការវាស់វែងដីធ្លីនៅមុនដំណាច់ខែមេសា ឆ្នា២០២៥ខាងមុខ ក្រសួងរៀបចំដែនដី នគរូបនីយកម្ម និងសំណង់ បានប្រគល់ ឬចែកបណ្ណកម្មសិទ្ធិអចលនវត្ថុជូនប្រជាពលរដ្ឋតាមបណ្ដាខេត្តនានាទូទាំងប្រទេសជាបន្តបន្ទាប់។ ជាក់ស្ដែងថ្មីៗនេះ ក្រសួងរៀបចំដែនដី នគរូបនីយកម្ម និងសំណង់ តាមរយៈមន្ទីររៀបចំដែនដី នគរូបនីយកម្ម សំណង់ និងសូរិយោដី បានប្រគល់បណ្ណកម្មសិទ្ធិអចលនវត្ថុចំនួន ១៦.៤២០បណ្ណដល់ពលរដ្ឋនៅក្នុងខេត្តព្រះសីហនុ ។
បើតាមលោក ចេង ស្រុង ប្រធានមន្ទីររៀបចំដែនដី នគរូបនីយកម្ម និងសំណង់ បានឱ្យដឹងថា ក្នុងចំណោមបណ្ណកម្មសិទ្ធិសម្គាល់ម្ចាស់អចលនវត្ថុចំនួន ១៦ ៤២០នេះ គ្រប់ដណ្ដប់លើភូមិចំនួន១៥ ស្ថិតក្នុងក្រុងកំពង់សោម និងស្រុកកំពង់សីលា ខេត្តព្រះសីហនុ ដោយក្នុងនោះ ស្រុកកំពង់សីលា មានចំនួន ៨ភូមិ ស្មើនឹង ៦៧១០ក្បាលដី ឬបណ្ណ ចំណែកក្រុងកំពង់សោម មានចំនួន ៩៧១០បណ្ណឬក្បាល ដែលស្ថិតនៅក្នុងភូមិចំនួន ៧ ។
នៅក្នុងឱកាសនៃពិធីប្រគល់បណ្ណសម្គាល់កម្មសិទ្ធិម្ចាស់អចលនវត្ថុកាលពីពេលថ្មីៗនេះដែរ ឯកឧត្តម ម៉ាង ស៊ីណេត អភិបាលខេត្តព្រះសីហនុ បានមានប្រសសាន៍សំណេះសំណាលជាមួយជាប្រពលរដ្ឋដែលមកពី១៥ភូមិ ដោយឯកឧត្តមបានលើកឡើងថា រដ្ឋបាលខេត្តព្រះសីហនុ ចង់ឃើញបងប្អូនប្រជាពលរដ្ឋទាំងអស់ទទួលបានបណ្ណកម្មសិទ្ធស្របច្បាប់គ្រប់គ្នា ដើម្បីកាត់បន្ថយនូវទំនាស់ដីធ្លី ។
ឯកឧត្តមបន្តថា ៖
«នៅពេលទទួលបានបណ្ណនេះ វាមានអត្ថប្រយោជន៍ ក្នុងការកាន់កាប់ដីធ្លីស្របច្បាប់ និងសូមទុកដាក់បណ្ណនេះឱ្យបានត្រឹមត្រូវ ព្រោះរដ្ឋបាលដីធ្លីមិនអាចចេញបណ្ណនេះជូនបងប្អូនម្ដងទៀតបាននោះទេ ម្យ៉ាងទៀត បណ្ណនេះនឹងជួយកាត់បន្ថយទំនាស់ដីធ្លី ដែលរាជរដ្ឋាភិបាលមិនចង់ឃើញមានជម្លោះដីធ្លីនៅទូទាំងក្រុង ស្រុក នៅទូទាំងប្រទេសនោះទេ»។
ក្នុងពេលជាមួយគ្នានេះ ឯកឧត្តម ក៏បានណែនាំដល់ពលរដ្ឋដែលមកទទួលបណ្ណកម្មសិទ្ធិអចលនវត្ថុនៅពេលនេះ សូមកុំយកបណ្ណកម្មសិទ្ធិយកទៅលក់ដូរ ក៏ប៉ុន្តែការដោះដូរយកទៅប្រកបមុខរបរ ឬការពង្រីកអាជីវកម្មផ្សេងៗ ដើម្បីបង្កើនអាជីវកម្មគ្រួសារកាន់តែល្អប្រសើរ ត្រូវគិតគូរពិចារណាឱ្យបានគ្រប់ជ្រុងជ្រោយជាមុនសិនក្នុងការបង្កើតអាជីវកម្មប្រកបដោយភាពរីករាយក្នុងក្រុមគ្រួសារ ។
ឯកឧត្តមអភិបាលខេត្តព្រះសីហនុបានបន្ថែមថា ការចុះបញ្ជីដីធ្លីមានលក្ខណៈជាប្រព័ន្ធជាទីមោទក គឺពិតជាបានចូលរួមចំណែកយ៉ាងសំខាន់ជាមួយរាជរដ្ឋាភិបាល និងរដ្ឋបាលខេត្ត ក្នុងការលើកកម្ពស់សុវត្ថិភាពក្នុងការកាន់កាប់ដីធ្លី ដែលជាបច្ច័យជួយជំរុញនូវកំណើនសេដ្ឋកិច្ចសង្គមប្រកបដោយនិរន្តរ៍ភាព និងសុខដុមនីយកម្ម ជាពិសេសស្របតាមគោលនយោបាយដីធ្លីរបស់រាជរដ្ឋាភិបាលកម្ពុជា សំដៅប្រែក្លាយខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង និងជាប៉ូលអភិវឌ្ឍជាតិទំនើបប្រកបដោយចីរភាព ជីវភាព សុខភាព និងសុភមង្គលនៅតំបន់ឆ្នេរសមុទ្រកម្ពុជា។
ជាចុងក្រោយ ឯកឧត្តម អភិបាលខេត្ត បានផ្តាំផ្ញើដល់អាជ្ញាធរគ្រប់លំដាប់ថ្នាក់ក្នុងស្រុកកំពង់សីលា មន្រ្តីបច្ចេកទេសសុរិយោដី និងអ្នកពាក់ព័ន្ធ ត្រូវផ្តល់កិច្ចសហការចូលរួមគាំទ្រសម្របសម្រួលឱ្យបានកាន់តែសកម្មថែមទៀតនៅក្នុងដំណើរការចុះបញ្ជីដីធ្លី និងជំរុញដំណើរការចែកប័ណ្ណកម្មសិទ្ធិជូនប្រជាពលរដ្ឋឱ្យបានឆាប់រហ័ស ព្រមទាំងខិតខំសម្រួល និងដោះស្រាយបញ្ហាប្រឈមនានាដែលកើតមានពាក់ព័ន្ធក្នុងការផ្តល់សេវានៃការចុះបញ្ជីដីធ្លីជាលក្ខណៈប្រព័ន្ធឱ្យបានលឿន ឆាប់ និងមានប្រសិទ្ធភាព ។
ប្រជាពលរដ្ឋដែលទទួលបានបណ្ណកម្មសិទ្ធិអចលនវត្ថុនៅពេលនោះ បានបង្ហាញពីអារម្មណ៍រីករាយ ដោយទទួលបាននូវប្លង់ជាកម្មសិទ្ធិលើអចលនវត្ថុរបស់ខ្លួន និងលែងមានការព្រួយបារម្ភចំពោះការបាត់បង់ទ្រព្យរបស់ខ្លួន៕
Account
Security
Favourite Content