សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ការផ្គត់ផ្គង់ផ្សារទំនើបនៅក្នុងរាជធានីភ្នំពេញនាពេលបច្ចុប្បន្ននេះ ត្រូវបានគេមើលឃើញថាបានកើនលើសពីតម្រូវការជាក់ស្ដែងហើយ ដោយផ្សារខ្លះសង់រួចរាល់ហើយតែគ្មានសកម្មភាព ឬដំណើរលារ ខណៈដែលអ្នកជំនាញនៃវិស័យអចលនទ្រព្យក្នុងប្រទេសកម្ពុជាបានប្រាប់ឱ្យអ្នកអភិវឌ្ឍន៍ផ្អាកមួយរយៈសិន រង់ចាំទីផ្សារមួយនេះកម្រើកឡើងវិញសិន ។
អ្នកនាង គឹម គិនកេសា អគ្គនាយិការងនៃក្រុមហ៊ុន CBRE Cambodia បានលើកឡើងថា កាលពីមុនវិបត្តិកូវីដ១៩ និងរហូតមកដល់ពេលបច្ចុប្បន្ននេះ វិបត្តិការសាងសង់ផ្សារទំនើបនៅក្នុងរាជធានីភ្នំពេញមានច្រើនគម្រោង ដោយតំបន់ខ្លះមានផ្សារទំនើប ២ ទៅ ៣ ឯណោះ ដូច្នេះ វាពិតជាមានការប្រកួតប្រជែងខ្លាំងណាស់សម្រាប់វិស័យផ្សារទំនើបនៅក្នុងរាជធានីភ្នំពេញ ។
អ្នកនាងបានបន្តថា រហូតមកដល់ពេលនេះផ្សារទំនើបដែលសាងសង់រួចមួយចំនួននៅមិនទាន់មានដំណើរការ និងសកម្មភាពនៅឡើយ ដូច្នេះហើយក្នុងរយៈពេលប៉ុន្មានឆ្នាំខាងមុខនេះ បើសិនជាអាចអ្នកវិនិយោគមិនគួរវិនិយោគលើផ្សារទំនើបទៀតនោះទេ ត្រូវរង់ចាំមើលពីស្ថានភាពសេដ្ឋកិច្ច និងទីផ្សារដំណើរការឡើងវិញសិន ជាពិសេសចាំមើលពីកំណើនទេសចរច្រើនជាងនេះ។
អ្នកស្រី អាន សុធីតា នាយិកាប្រតិបត្តិក្រុមហ៊ុន PropNex Cambodia ក៏បានលើកឡើងផងដែរថា ផ្សារទំនើបក្នុងរាជធានីភ្នំពេញសាងសង់ច្រើន ហើយមានផ្សារទំនើបខ្លះក៏ទទួលបានជោគជ័យ ខ្លះទៀតក៏បរាជ័យ ដោយមានដំណើរការត្រឹមតែរយៈពេលខ្លីប៉ុណ្ណោះ ។
អ្នកស្រីបន្ថែមថា ផ្សារទំនើបខ្លះគួរតែកែប្រែដើម្បីឱ្យរកចំណូលបានមួយរយៈសិន ដូចជា រៀបចំជាកន្លែងហាត់ប្រាណ ជាបន្ទប់ការិយាល័យជាដើមក្នុងពេលដែលមិនទាន់មានតម្រូវការជួលទីតាំងសម្រាប់ធ្វើអាជីវកម្ម ។
អ្នកស្រីបន្តថា ផ្សារទំនើបដែលទទួលបានការគាំទ្ររយៈពេលយូរ គឺមកពីគេបានរៀបចំនូវចំណតធំទូលាយ មានការរចនានៅផ្នែកខាងក្នុងបានល្អ ទាក់ទាញ និងមានទំនិញច្រើនប្រភេទច្រើនមុខ តែសម្រាប់ផ្សារទំនើបខ្លះ សាងសង់ឡើងដោយមិនមានចំណតគ្រប់គ្រាន់ ឬចំណតពិបាកចត និងការរចនាខាងក្នុងមិនសូវទាក់ទាញ ទើបភ្ញៀវខ្លះចូលតែម្ដងក៏លែងចូល ដែលធ្វើឱ្យផ្សារនោះកាន់តែស្ងាត់ភ្ញៀវ ។
និយាយជារួម អ្នកជំនាញនៃវិស័យអចលនទ្រព្យទាំងពីររូប បានបញ្ជាក់ស្រដៀងគ្នាថា ផ្សារទំនើបក្នុងរាជធានីភ្នំពេញនៅតំបន់ខ្លះមានច្រើនពេក ហើយផ្សារទំនើបធំៗកំពុងតែវាយសម្លាប់ផ្សារទំនើបខ្នាតតូច ដែលតម្រូវឱ្យម្ចាស់ផ្សារទំនើបតូចៗត្រូវផ្លាស់ប្តូរ និងកែប្រែផ្សាររបស់ខ្លួនដើម្បីប្រកួតប្រជែងជាមួយផ្សារទំនើបធំៗ ៕
Account
Security
Favourite Content