សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងព្រែកជីកហ្វូណនតេជោ រហូតមកដល់ពេលនេះ ក្រុមការងារបច្ចេកទេសបានបោះបង្គោលនិយាមការួចរាល់ហើយ ដោយនឹងចាប់ផ្ដើមដំណើរការជីកព្រែកតែម្ដងនៅអំឡុងខែ កុម្ភៈ ឆ្នាំ ២០២៥ ។ នេះ បើតាមឯកឧត្តម គង់ វិមាន អគ្គលេខាធិការរងក្រុមប្រឹក្សាអភិវឌ្ឍន៍កម្ពុជាថ្លែងក្នុងកិច្ចប្រជុំមួយនៅក្រសួងរៀបចំដែនដី នគរូបនីយកម្ម និងសំណង់កាលពីដើមសប្ដាហ៍នេះ ។
ឯកឧត្តមបន្តថា ក្នុងរយៈពេលប៉ុន្មានខែមកនេះ ក្រុមការងារបានរៀបចំនូវកិច្ចព្រមព្រៀង និងចុះពិនិត្យក៏ដូចជាបោះបង្គោលនិយាមកាលើគម្រោងព្រែកជីកហ្វូណនតេជោ ដូច្នេះដំណើរការនសការជីកហ្វូណនតេជោ យ៉ាងយូរបំផុតត្រឹមខែកុម្ភៈ ឆ្នាំ ២០២៥ខាងមុខនេះ ។
ឯកឧត្តមបន្តថា ព័ត៌មានពីការជីកព្រែករបស់កម្ពុជានេះ បានផ្សព្វផ្សាយរួចរាល់ហើយទៅដល់បណ្ដាវិនិយោគិនបរទេសនិងក្នុងស្រុកជាពិសេសវិនិយោគិនចិន ដើម្បីជំរុញឱ្យវិនិយោគិនចិនមកចាប់ដៃជាមួយរាជរដ្ឋាភិបាលកម្ពុជា ក៏ដូចជាចាប់ដៃវិនិយោគជាមួយបណ្ដាវិនិយោគក្នុងស្រុក ដើម្បីស្វែងរកទីតាំងសមស្របណាមួយដើម្បីវិនិយោគគម្រោងនានានៅក្នុងប្រទេសកម្ពុជា ។
ឯកឧត្តមបន្ថែមថា ងាកមកមើលគម្រោងវិនិយោគនៅក្នុងប្រទេសកម្ពុជារយៈពេល១ឆ្នាំពេញ ២០២៤កន្លងមកនេះ ក្រុមប្រឹក្សាអភិវឌ្ឍន៍កម្ពុជាអនុម័តគម្រោងវិនិយោគ ចំនួន ៤១៤គម្រោង ដែលមានទឹកប្រាក់សរុបជាង៧ពាន់លានដុល្លារអាមេរិក ។ ទឹកប្រាក់វិនិយោគដែលទទួលបានពីក្រុមហ៊ុនស្នើសុំចុះបញ្ជីវិនិយោគនៅកម្ពុជា ក្នុងឆ្នាំ ២០២៤គឺជាទឹកប្រាក់ដ៏ច្រើន និងជាប្រវត្តិសាស្ត្រក្នុងរយៈពេលប៉ុន្មានឆ្នាំមកនេះ ។
ឯកឧត្តមអគ្គលេខាធិការរងបានថ្លែងបន្ថែមទៀតថា បច្ចុប្បន្ននេះ ជាការកត់សម្គាល់ឃើញថា មានវិនិយោគិនជាច្រើនបានចូលមកកម្ពុជាស្វែងរកការវិនិយោគនានាទាំងក្នុងតំបន់សេដ្ឋកិច្ចពិសេស និងក្រៅតំបន់សេដ្ឋកិច្ចពិសេស ជាពិសេសនៅបណ្ដាខេត្តក្នុងតំបន់ឆ្នេរដូចជាខេត្តព្រះសីហនុ និងខេត្តកោះកុង ។
ឯកឧត្តម ស៊ុន ចាន់ថុល ឧបនាយករដ្ឋមន្ត្រីនិងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជាបានលើកឡើងកន្លងមកថា ចាប់តាំងពីគម្រោងព្រែកជីកហ្វូណនតេជោបានប្រារព្ធពិធីបើកការដ្ឋានមក ក្រុមការងារមិនទាន់បានជីកមួយម៉ែត្រនៅឡើយ ។ ក្រោយពីធ្វើពិធីបើកការដ្ឋានរួច ក្រុមការងារបច្ចេកទេស បានសិក្សាលម្អិតពីផលប៉ះពាល់ និងផ្ដល់សំណងដល់ប្រជាពលរដ្ឋ យ៉ាងត្រឹមត្រូវបំផុត ដោយធ្វើយ៉ាងណានៅពេលជីកព្រែកហើយ មិនឱ្យមានពលរដ្ឋតវ៉ាឬត្រូវបាត់បង់ទ្រព្យសម្បត្តិទទេរនោះឡើយ ។
ឯកឧត្តមបានលើកឡើងថាគម្រោងព្រែកជីកហ្វូណនតេជោនេះ នឹងក្លាយជាសក្ដានុពលទាក់ទាញការវិនិយោគបន្ថែមពីក្រៅប្រទេសចូលមកក្នុងប្រទេសកម្ពុជា ដើម្បីផលិតទំនិញ ហើយនាំចេញទៅកាន់ទីផ្សារអន្តរជាតិវិញ ព្រោះព្រែកនេះ នឹងក្លាយជាផ្លូវទឹកដឹកជញ្ជូនឆាប់រហ័ស និងមានតម្លៃទាបជាងមុន ។
គួររម្លឹកថា រាជរដ្ឋាភិបាលតាមរយៈគណៈកម្មការគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា ក៏បើកកិច្ចប្រជុំដើម្បីផ្សព្វផ្សាយពីសក្ដានុពលតំបន់ឆ្នេរ ក្នុងនោះ ក៏បានលើកយកកោះកុងក្រៅ ដែលជាកោះដ៏មានសក្ដានុពលមួយរបស់កម្ពុជា ដើម្បីទាក់ទាញការវិនិយោគនិងទេសចរចូលមកទស្សនាសម្រាក កម្សាន្តលំហែ ខណៈកោះនេះ ជាកោះដែលមានឆ្នេរខ្សាច់ស្រស់ស្អាត និងខ្យល់អាកាសល្អ ។
អគ្គលេខាធិការរងក្រុមប្រឹក្សាអភិវឌ្ឍន៍កម្ពុជា ឯកឧត្តមគង់វិមាន ក៏បានបញ្ជាក់ថា បើសិនជាកោះកុងក្រៅ ទាក់ទាញបានការវិនិយោគបន្ថែម និងដោះស្រាយបញ្ហានានាបាននោះ វារឹតតែប្រសើរបន្ថែមទៅទៀត ស្របនឹងបរទេសជាពិសេសចិន កំពុងរកទីតាំងវិនិយោគនៅកម្ពុជា ៕
Account
Security
Favourite Content