សេចក្តីប្រកាសព័ត៌មាន

ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ (ដ.ន.ស.) សូមបដិសេធនូវសំណើសុំទាំង២ ដែលមានទីតាំងទី១ ស្ថិតនៅឃុំកំពង់ព្រៀង ស្រុកសង្កែ និងឃុំព្រៃតូច ស្រុកមោងឫស្សី ខេត្តបាត់ដំបង និងទីតាំងទី២ ស្ថិតនៅឃុំព្រៃចាស់ ឃុំតាម៉ឺន និងឃុំតាពូង ស្រុកថ្មគោល ខេត្តបាត់ដំបង  គឺស្ថិតក្នុងតំបន់៣នៃបឹងទន្លេសាប ដែលជាតំបន់អភិរក្ស និងការពារឱ្យបានដាច់ខាត ដើម្បីរក្សាអាយុជីវិតបឹងទន្លេសាប ដែលមិនអាចផ្តល់កម្មសិទ្ធិឯកជនបាននោះឡើយ។

ក្រសួងរៀបចំដែនដី នគរូបនីយកម្ម និងសំណង់ (ដ.ន.ស.) សូមជម្រាបជូនសាធារណជនជ្រាបថា បន្ទាប់ពីទទួលបានលិខិតស្នើសុំចំនួន ២ច្បាប់ ដូចខាងក្រោម៖

(១). ស្នើសុំដោយបុគ្គលចំនួន ៨នាក់ ដែលមានឈ្មោះ ស្វាយ ឆៃ, ហេង សុធា, មាស សាវ៉េត, សេក សៀង, ស៊ឹម ណេង, ព្រួញ ធារិទ្ធ, ឯម ចន និងឈ្មោះ ពេជ្រ សល់ ដែលបានអះអាងថាជាតំណាងប្រជាពលរដ្ឋចំនួន ១១៦គ្រួសារ សុំកាត់ឆ្វៀល ចុះវាស់វែង និងចេញបណ្ណកម្មសិទ្ធិដីចំនួន ១ ៦៧៨ហិកតា នៅក្នុងឃុំកំពង់ព្រៀង ស្រុកសង្កែ និងឃុំព្រៃតូច ស្រុកមោងឬស្សី ខេត្តបាត់ដំបង

(២). ស្នើសុំដោយបុគ្គលចំនួន ៦នាក់ មានឈ្មោះ សុខ វ័យ, សូ ភិរុន, ប៉ែន សុចិន្តា, ឯម ច័ន្ទសុភ័ក្ត្រា, ហេង លៀងអ្វី និងឈ្មោះ ពុត ហុងលី បានអះអាងថាជាតំណាងប្រជាពលរដ្ឋចំនួន ១៧៩គ្រួសារ ស្នើសុំកាត់ឆ្វៀល ចុះវាស់វែង និងចេញបណ្ណកម្មសិទ្ធិដីចំនួន ១ ៦៣៧ហិកតា នៅឃុំព្រៃចាស់ ឃុំតាម៉ឺន និងឃុំតាពួង ស្រុកថ្មគោល ខេត្តបាត់ដំបង។

ក្រសួងរៀបចំដែនដី នគរូបនីយកម្ម និងសំណង់ បានពិនិត្យឃើញថា ទីតាំងដីស្នើសុំទាំង២កន្លែងខាងលើ ស្ថិតនៅក្នុងតំបន់៣នៃ បឹងទន្លេសាប ដែលជាតំបន់ត្រូវអភិរក្ស និងការពារឱ្យបានដាច់ខាតសម្រាប់ឧត្តមប្រយោជន៍ប្រជាជនកម្ពុជាគ្រប់រូប និងតជំនាន់។

ផ្អែកតាមលទ្ធផលនៃការធ្វើកោសល្យវិច័យដោយអគ្គនាយកដ្ឋានអត្តសញ្ញាណកម្មនៃក្រសួងមហាផ្ទៃ លើស្នាមម្រាមដៃរបស់បុគ្គលស្នើសុំទាំង ១៤នាក់ខាងលើ និងស្នាមម្រាមដៃប្រជាពលរដ្ឋចំនួន ២៩៥នាក់ លើឯកសារភ្ជាប់មកជាមួយលិខិតស្នើសុំទាំង២ ឃើញថា មានបុគ្គលចំនួន ៦នាក់ មានចេតនាទុច្ចរិតក្លែងបន្លំ ដោយផ្តិតស្នាមម្រាមដៃរបស់ខ្លួនលើឈ្មោះផ្សេងទៀតដូចខាងក្រោម៖

១. ឈ្មោះ ហេង សុធា កើតនៅថ្ងៃទី ២០ ខែខុសភា ឆ្នាំ ១៩៨៦ កាន់អត្តសញ្ញាណប័ណ្ណលេខ ១៧១៣០៣៧៧៦ បានផ្តិតស្នាមម្រាមដៃក្លែងបន្លំជំនួសឱ្យឈ្មោះប្រជាពលរដ្ឋចំនួន ១០៥នាក់ នៅស្រុកសង្កែ ស្រុកមោងឫស្សី និងស្រុកថ្មគោល។

២. ឈ្មោះ ស្វាយ ឆៃ កើតនៅថ្ងៃទី ២១ ខែមីនា ឆ្នាំ ១៩៧១ កាន់អត្តសញ្ញាណប័ណ្ណលេខ ១៧០៧៣៧២៣៧ បានផ្តិតស្នាមម្រាមដៃស្តាំក្លែងបន្លំជំនួសឱ្យឈ្មោះប្រជាពលរដ្ឋចំនួន ២១នាក់ នៅស្រុកសង្កែ ស្រុកមោងឫស្សី និងស្រុកថ្មគោល។

៣. ឈ្មោះ សេក សៀង កើតនៅថ្ងៃទី ៣១ ខែធ្នូ ឆ្នាំ ១៩៧១ កាន់អត្តសញ្ញា ណប័ណ្ណលេខ ១៧០៧៧៣១១២ បានផ្តិតស្នាមម្រាមដៃស្តាំក្លែងបន្លំជំនួសឱ្យឈ្មោះប្រជាពលរដ្ឋចំនួន ១២នាក់ នៅស្រុកសង្កែ ស្រុកមោងឫស្សី និងស្រុកថ្មគោល។

៤. ឈ្មោះ ពេជ្រ សល់ កើតនៅថ្ងៃទី ០៦ ខែមេសា ឆ្នាំ ១៩៨០ កាន់អត្តសញ្ញាណប័ណ្ណលេខ ១៦០៤៣៦៣៤៦ បានផ្តិតស្នាមមេដៃស្តាំក្លែងបន្លំជំនួសឱ្យឈ្មោះប្រជាពលរដ្ឋចំនួន ១១នាក់ នៅស្រុកសង្កែ ស្រុកមោងឫស្សី និងស្រុកថ្មគោល។

៥. ឈ្មោះ ព្រួញ ធារិទ្ធ កើតនៅថ្ងៃទី ៣០ ខែសីហា ឆ្នាំ ១៩៨៧ កាន់អត្តសញ្ញាណប័ណ្ណលេខ ១៧១២១១២៤៣ បានផ្តិតស្នាមមេដៃស្តាំក្លែងបន្លំជំនួសឱ្យឈ្មោះប្រជាពលរដ្ឋចំនួន ៨នាក់ នៅស្រុកសង្កែ ស្រុកមោងឫស្សី និងស្រុកថ្មគោល។

៦. ឈ្មោះ ពុធ ហុងលី កើតនៅថ្ងៃទី ០១ ខែខុសភា ឆ្នាំ ១៩៦៩ កាន់អត្តសញ្ញាណប័ណ្ណលេខ ១០០៧៦៦៧១៦ បានផ្តិតស្នាមមេដៃស្តាំក្លែងបន្លំជំនួសឱ្យឈ្មោះប្រជាពលរដ្ឋចំនួន ៣នាក់ នៅស្រុកថ្មគោល។

ក្រសួង ដ.ន.ស. សូមបដិសេធនូវសំណើសុំទាំង២ខាងលើនេះ និងសូមបញ្ជាក់ជូនសាធារណជនជ្រាបថា ទីតាំងដីស្នើសុំទាំង២ទីតាំងនេះ ស្ថិតក្នុងតំបន់៣នៃបឹងទន្លេសាប ដែលជាតំបន់អភិរក្ស និងការពារឱ្យបានដាច់ខាត ដើម្បីរក្សាអាយុជីវិតបឹងទន្លេសាប ដែលមិនអាចផ្តល់កម្មសិទ្ធិឯកជនបាននោះឡើយ ហើយក្រសួង ដ.ន.ស បន្តសិក្សាផ្លូវច្បាប់ដើម្បីចាត់វិធានការចំពោះបុគ្គលខាងលើដែលបានក្លែងបន្លំស្នាមម្រាមដៃរបស់ប្រជាពលរដ្ឋលើឯកសារស្នើសុំជូនភ្ជាប់មកជាមួយ។

សេចក្តីដូចបានជម្រាបជូនខាងលើ សូមសាធារណជនមេត្តាជ្រាបជាព័ត៌មាន៕