បរទេស ៖ ជារៀងរាល់ឆ្នាំ ក្រុមហ៊ុនអ្នកម៉ៅការយោធាក្នុងស្រុករបស់អាមេរិកដែលមានដូចជា Lockheed Martin ជាដើម បានសម្ងំកើបលុយកប់ក្តោងពីកុងត្រាផលិតអាវុធ និងលក់អាវុធក្នុងគ្រាដែលរដ្ឋាភិបាលអាមេរិកត្រូវដើរតួជាអ្នកដោះស្រាយបញ្ហាជម្លោះយោធាជាច្រើននៅលើពិភពលោកផង ព្រមទាំងកិច្ចការងារដើម្បីបង្កើនប្រសិទ្ធភាពកិច្ចការពារជាតិផង។ យ៉ាងណាក្តី សម្រាប់រដ្ឋាភិបាលអាមេរិកអាណត្តិថ្មីនេះគេជឿជាក់ថា កុងត្រាយោធានានានឹងជួបផលលំបាកក្នុងការចរចាគ្នាជាមិនខាន ដោយសារតែប្រធានាធិបតីអាមេរិកថ្មី លោក Donald Trump គឺជាមេដឹកនាំម្នាក់ដែលមានភាពសាំញាំខ្លាំងក្នុងការចរចាតម្លៃ និងបច្ចេកទេសនៃសព្វាវុធគ្រប់ប្រភេទ ពោលគឺតាំងតែពីអាណត្តិចាស់របស់គាត់មកម្ល៉េះ។

ដូច្នេះ ទាំងអ្នកជំនាញ និងក្រុមអ្នកវិភាគអាចសន្មត់ថា ការវិលត្រឡប់របស់លោក Trump មកកាន់សេតវិមានក្នុងនាមជាអគ្គមេបញ្ជាការកំពូលនៃយោធាអាមេរិកនឹងមានភាពរាំងស្ទះខ្លាំង ជាពិសេសទៅលើកិច្ចការងារចរចាគ្នាចំពោះកុងត្រានានាដែលធ្វើឡើងរវាងក្រុមហ៊ុនអ្នកម៉ៅកាយោធាជាមួយនឹងរដ្ឋាភិបាលអាមេរិក។

កាសែត The Defense News សរសេរថា ជានិច្ចកាលការងារចំបងរបស់លោក Trump ចំពោះកុងត្រាអាវុធ គឺធ្វើឡើងដោយផ្តោតទៅលើការកាត់បន្ថយថ្លៃដើមផង ទៅលើកិច្ចព្រមព្រៀងដែលពិបាកអាចនឹងឈានទៅដល់ការសម្រេចផង និងការបង្កើនការប្រុងប្រយ័ត្នចំពោះប្រភេទនៃកិច្ចសន្យាដែលធ្វើឱ្យពួកគេមានហានិភ័យខ្ពស់ ជាពិសេសក្រុមហ៊ុនអ្នកផលិតក្នុងផ្នែកអាកាសចរណ៍ដែលអភិវឌ្ឍយន្តហោះថ្លៃៗ និងពឹងផ្អែកខ្លាំងលើបច្ចេកវិទ្យាថ្មីៗ។

កន្លងមក លោក John Venable ដែលជាអ្នកបើកយន្តហោះ F-16 ចូលនិវត្តន៍ និងជាសហការីជាន់ខ្ពស់ម្នាក់នៅវិទ្យាស្ថាន Mitchell សម្រាប់ការសិក្សាលំហអាកាស Mitchell Institue for Aerospace Studies បាននិយាយថា លោក Trump អាចប្រើប្រាស់សមត្ថភាពពិសេសរបស់គាត់ក្នុងការបញ្ជាក់ពីការយកចិត្តទុកដាក់លើសាធារណៈ ដើម្បីដាក់សម្ពាធលើក្រុមហ៊ុនអ្នកម៉ៅការផ្នែកយោធាដោយក្នុងនោះគាត់តែងតែចង្អុលទៅលើការពន្យារពេលរបស់ Lockheed Martin ដើម្បីអាចធ្វើឱ្យប្រសើរឡើងនៃយន្តហោះចម្បាំងប្រភេទ F-35។ នេះជាឧទាហរណ៍ស្រាប់។ មិនត្រឹមតែប៉ុណ្ណោះ លោក Trump ជារឿយៗតែងតែបានបង្ហាញពីភាពប៉ិនប្រសប់ក្នុងអាជីវកម្មរបស់គាត់ និងសមត្ថភាពក្នុងការធ្វើចរចាទៅលើកិច្ចព្រមព្រៀងនានា ជាពិសេសដូចជាការចរចាឡើងវិញនៅឆ្នាំ២០១៨របស់រដ្ឋបាលរបស់គាត់អំពីកិច្ចសន្យារបស់ក្រុមហ៊ុន Boeing ដើម្បីផលិតយន្តហោះប្រធានាធិបតីថ្មី VC-25B Air Force One ទាំង២គ្រឿង។

ថ្មីៗ​នេះដែរ លោក Trump បាន​ធ្វើការរិះគន់ខ្លាំងថា ជាការ​ខ្ជះខ្ជាយ និង​ការ​ក្លែងបន្លំ​មិន​គួរ​ឲ្យ​ជឿនៅក្នុង​រដ្ឋាភិបាលអាណត្តិចាស់របស់លោកប្រធានាធិបតី Joe Biden ​ក្នុង​បទសម្ភាសន៍​ផ្ទាល់​មួយ​កាលពី​ថ្ងៃ​ទី ៣១ ខែ​តុលា ជាមួយ​នឹង​លោក Tucker Carlson។

គួរឲ្យដឹងដែរថា ក្រៅតែពីគោលនយោបាយអន្តោប្រវេសន៍ហើយនោះ សកម្មភាពដំបូងរបស់ លោក Trump ក្នុងនាមជាប្រធានាធិបតីជាប់ឆ្នោតគឺនឹងតែងតាំងកំពូលមហាសេដ្ឋី លោក Elon Musk និងសហគ្រិន Vivek Ramaswamy ទៅជាអ្នកទទួលបន្ទុកគណៈកម្មាធិការថ្មីចំពោះប្រសិទ្ធភាពចំណាយរបស់រដ្ឋាភិបាល ហើយក្នុងនោះក៏មានការពិនិត្យឡើងវិញ និងគ្រប់គ្រង់ទៅលើកុងត្រាទាំងឡាយជាមួយនឹងក្រុមហ៊ុនអ្នកម៉ៅកាយោធាទាំងនោះផងដែរ៕