សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ រួមជាមួយនឹងក្រសួងធម្មការ និងសាសនា និងក្រសួង វប្បធម៌ និងវិចិត្រសិល្បៈ បានប្រជុំពិភាក្សាដើម្បីស្វែងរកការឯកភាពគ្នាលើការសាងសង់ ថែទាំ និងជួសជុលសំណង់សាសនា សំដៅធានាបាននូវគុណភាព សុវត្ថិភាព និងភាពសមស្របនៃរចនាបទសំណង់ សាសនា និងការជួសជុល អភិរក្សសំណង់បេតិកភណ្ឌ ។
នៅក្នុងកិច្ចប្រជុំដែលធ្វើឡើងកាលពីថ្ងៃទី៨ ខែកក្កដា ឆ្នាំ២០២៥ ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានស្នើសុំមតិយោបល់ពីក្រសួងវប្បធម៌ និងវិចិត្រសិល្បៈ និងក្រសួងធម្មការ និងសាសនា គណៈវិស្វករ គណៈស្ថាបត្យករ និងបញ្ញវន្តខ្មែរទាំងអស់ ដើម្បីស្វែងរកការឯកភាពគ្នាទាក់ទិននឹងការសាងសង់ ថែទាំ និងការជួសជុលសំណង់វត្តអារាម និងសំណង់សាសនា ធ្វើយ៉ាងណាដើម្បីកុំឱ្យមានការប៉ះពាល់ដល់សតិអារម្មណ៍របស់ប្រជាពលរដ្ឋ សំដៅធានាបាននូវគុណភាព សុវត្ថិភាព និងភាពសមស្របនៃរចនាបទសំណង់សាសនា និងការជួសជុលអភិរក្សសំណង់បេតិកភណ្ឌ ។
ឯកឧត្តមឧបនាយករដ្ឋមន្ត្រីបានបញ្ជាក់ថា ៖
«កិច្ចការជាអាទិភាពមួយដ៏ធំរបស់ក្រសួង គឺការរៀបចំដែនដី និងនគរូបនីយកម្ម ដែលក្នុងកិច្ចការនោះមានការបែងចែកជាតំបន់នានានៅក្នុងប្រទេសកម្ពុជាដែលក្នុងនោះមានតំបន់អភិរក្ស តំបន់កសិកម្ម តំបន់ឧស្សាហកម្ម តំបន់សេដ្ឋកិច្ចពិសេស តំបន់ទីប្រជុំជន និងក្រុង ហើយនៅក្នុងតំបន់ទីប្រជុំជន និងក្រុង គឺយើងមានប្លង់គោលប្រើប្រាស់ដីថ្នាក់រាជធានីខេត្ត ក្រុង ស្រុក ខណ្ឌ ឃុំសង្កាត់ ដែលបាន និងកំពុងរៀបចំជាបណ្ដើរៗនៅតាមបណ្ដារាជធានី/ខេត្តមួយចំនួនរួចហើយ»។
ឯកឧត្តមបានបន្តទៀតថា ៖
«ដោយសារវត្តអារាមជាអត្តសញ្ញាណជាតិខ្មែរ ព្រះពុទ្ធសាសនា ជាសាសនារបស់រដ្ឋ ហើយប្រជាពលរដ្ឋខ្មែរភាគច្រើនជាអ្នកកាន់ព្រះពុទ្ធសាសនា ដូច្នេះ ការជួបជុំគ្នានាពេលនេះគឺដើម្បីស្នើសុំមតិយោបល់ពីក្រសួងវប្បធម៌ និងវិចិត្រសិល្បៈ និងក្រសួងធម្មការ និងសាសនា គណៈវិស្វករ គណៈស្ថាបត្យករ និងបញ្ញវន្តខ្មែរទាំងអស់ដើម្បីស្វែងរកការឯកភាពគ្នាទាក់ទិននឹងការសាងសង់ ថែទាំ និងការជួសជុលសំណង់វត្តអារាម និងសំណង់សាសនាធ្វើយ៉ាងណាដើម្បីកុំឲ្យមានការប៉ះពាល់ដល់សតិអារម្មណ៍របស់ប្រជាពលរដ្ឋ សំដៅធានាបាននូវគុណភាព សុវត្ថិភាព និងភាពសមស្របនៃរចនាបទសំណង់សាសនា និងការជួសជុលអភិរក្សសំណង់បេតិកភណ្ឌ»។
បន្ទាប់ពីទទួលបានការឯកភាពគ្នាហើយនោះ ស្ថាប័នទាំងបី នឹងនាំយកលទ្ធផលក្រាបបង្គំទូលថ្វាយគណៈសង្ឃនាយកនៃព្រះរាជាណាចក្រកម្ពុជា និងរាជរដ្ឋាភិបាលកម្ពុជា ដើម្បីក្រាបបង្គំស្នើសុំ និងស្នើសុំអនុសាសន៍សម្រាប់ការអនុវត្ត។
ឯកឧត្តមឧបនាយករដ្ឋមន្ត្រី បានសង្កេតឃើញថា បច្ចុប្បន្ន មានវត្តអារាមមួយចំនួនដែលបានចំណាយមិនចាំបាច់លើសំណង់ច្រើនលើសលប់ ដូច្នេះ ឯកឧត្តមបានលើកជាគតិពិចារណាសម្រាប់អង្គប្រជុំពិនិត្យថា តើគួរបន្តរៀបចំសាងសង់ចេតិយ រឺកុដិ តាមទម្លាប់ដែលមានពីមុនមករឺយ៉ាងណា?
«ដោយសារយើងឃើញថា កុដិ សាលាឆាន់ និងអគារផ្សេងៗ បម្រើឲ្យវិស័យពុទ្ធចក្រដែលបានសាងសង់តាមទម្លាប់ពីមុនមកនោះគឺចំណាយក្នុងការសាងសង់ខ្ពស់ និងពិបាកក្នុងការថែទាំ មានសភាពងងឹត គ្មានខ្យល់អាកាស និងពន្លឺចេញចូលគ្រប់គ្រាន់ ដូច្នេះខ្ញុំមានបំណងចង់ឲ្យមានការរៀបចំវត្តអារាម ឬសំណង់សាសនាផ្សេងៗឱ្យបានត្រឹមត្រូវ ដើម្បីកែប្រែផ្នត់គំនិតរបស់ប្រជាជនក្នុងការរស់នៅ និងប្រើប្រាស់វត្តអារាម ឬសំណង់សាសនាទាំងនោះតាមបែបបទថ្មីក្នុងសហសម័យ ដោយគិតអំពីលំហសាធារណៈ លំហបៃតង មានខ្យល់អាកាស និងពន្លឺចេញចូលគ្រប់គ្រាន់ ផ្ដល់គុណប្រយោជន៍ដល់សុខភាព មានមនោសញ្ចេតនា និងលើកកម្ពស់គុណភាពជីវិតរបស់ប្រជាពលរដ្ឋ»។ នេះជាការលើកឡើងរបស់ឯកឧត្តមឧបនាយករដ្ឋមន្ត្រីនៅក្នុងកិច្ចប្រជុំខាងលើនេះ។
ឯកឧត្តម សាយ សំអាល់ បានយល់ឃើញថា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី គឺជាថ្នាក់ដឹកនាំកំពូលមួយរូបរបស់កម្ពុជានាជំនាន់ថ្មីនេះដែលមានទស្សនៈវិស័យវែងឆ្ងាយ និងជាក់លាក់ក្នុងការប្រែក្លាយកម្ពុជាឱ្យមានការអភិវឌ្ឍន៍រីកចម្រើន ក្លាយជាប្រទេសដែលមានចំណូលខ្ពស់នាឆ្នាំ២០៥០។ ដូច្នេះ ក្នុងនាមក្រសួងរៀបចំដែនដី នគរូបនីយកម្ម និងសំណង់ ឯកឧត្តមឧបនាយករដ្ឋមន្ត្រី រួមនឹងសហការី នឹងខិតខំប្រឹងប្រែងធ្វើយ៉ាងណាឆ្លើយតបឱ្យបានជោគជ័យទៅនឹងទស្សនៈវិស័យរបស់សម្ដេចមហាបវរធិបតី ហ៊ុន ម៉ាណែត ។
ទាក់ទិននឹងការសាងសង់ និងការជួសជុលសំណង់វត្តអារាម ឯកឧត្តមឧបនាយករដ្ឋមន្ត្រី បានស្នើសុំឱ្យមានជាគោលការណ៍ និងទស្សនៈវិស័យពីក្រសួង និងស្ថាប័នពាក់ព័ន្ធផ្សេងទៀត ក៏ដូចជាបញ្ញវន្តខ្មែរទាំងអស់ និងត្រូវមានការឯកភាពគ្នារវាងក្រសួងរៀបចំដែនដី នគរូបនីយកម្ម និងសំណង់ និងក្រសួងវប្បធម៌ និងវិចិត្រសិល្បៈ លើកិច្ចការសំណង់បេតិកភណ្ឌ និងមានការឯកភាពគ្នាជាមួយក្រសួងធម្មការ និងសាសនា ដើម្បីធ្វើយ៉ាងណាឱ្យទីវត្តអារាម ស័ក្ដិសមជាទីសក្ការៈបូជា មានលំហបៃតង មានខ្យល់អាកាស និងពន្លឺចេញចូលគ្រប់គ្រាន់ មានភាពស្ងប់ស្ងាត់ មានសន្តិភាពផ្លូវចិត្ត និងផ្ដល់គុណប្រយោជន៍ទាំងសុខភាពផ្លូវកាយ និងផ្លូវចិត្ត សម្រាប់ពុទ្ធបរិស័ទគ្រប់រូបដែលបានចូលទៅកាន់ទីវត្តអារាម ៕
Account
Security
Favourite Content