សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ក្រសួងរៀបចំដែនដី នគរូបនីយកម្ម និងសំណង់ យកចិត្តទុកដាក់គិតគូរដោះស្រាយបញ្ហាសំណង់មានសភាពចាស់ទ្រុឌទ្រោមដែលងាយបង្កហានិភ័យរងគ្រោះដល់អាយុជីវិតរបស់ប្រជាពលរដ្ឋ
(ភ្នំពេញ)៖ ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ ជានិច្ចកាលតែងយកចិត្តទុកដាក់ និងគិតគូរដោះស្រាយបញ្ហាសំណង់ដែលមានសភាពចាស់ទ្រុឌទ្រោមដែលងាយបង្ករជាហានិភ័យ និងគ្រោះថ្នាក់ដល់អាយុជីវិតរបស់ប្រជាពលរដ្ឋ។ ជាក់ស្ដែង នាព្រឹកថ្ងៃទី០៨ ខែកុម្ភៈ ឆ្នាំ២០២៥ ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀនចំដែនដី នគរូបនីយកម្ម និងសំណង់ បានជួបសំណេះសំណាលជាមួយប្រជាពលរដ្ឋដែលរស់នៅក្នុងអគារចាស់ទ្រុឌទ្រោមនៅក្នុងរាជធានីភ្នំពេញ ចំនួន២១ទីតាំង។
ឯកឧត្តមឧបនាយករដ្ឋមន្ត្រី សាយ សំអាល់ បានលើកឡើងថា ការជួបជុំគ្នានាពេលនេះ គឺដើម្បីរួមគ្នារកដំណោះស្រាយចំពោះអគារដែលមានសភាពចាស់ទ្រុឌទ្រោមដើម្បីបង្ការកុំឱ្យមានហានិភ័យប៉ះពាល់ដល់អាយុជីវិតរបស់ប្រជាពលរដ្ឋដែលរស់នៅក្នុងអគារទាំងនេះ និងបញ្ជៀសពីផលប៉ះពាល់នៃអំពើហឹង្សា និងគ្រឿងញៀនចំពោះកូនចៅប្រជាពលរដ្ឋដែលរស់នៅក្នុងតំបន់អគារចាស់ទ្រុឌទ្រោម។ ការជួបជុំគ្នានេះក៏ដើម្បីស្នើសុំកិច្ចសហការយោគយល់ និងទទួលយកសំណើរបស់ប្រជាពលរដ្ឋដែលរស់នៅក្នុងប្លុកអគារចាស់ទ្រុឌទ្រោមទាំងនេះថាតើពួកគាត់ចង់ទទួលបានផ្ទះសមរម្យសម្រាប់រស់នៅ ឬចង់បានជាសំណងបែបណាមួយដើម្បីឱ្យក្រុមការងារដោះស្រាយជូន។
ឯកឧត្តមឧបនាយករដ្ឋមន្ត្រី បានសង្កត់ធ្ងន់ថា ៖
«ទាក់ទិននឹងកិច្ចការនេះ រដ្ឋបាលរាជធានីភ្នំពេញបានបង្ហាញពីការគាំទ្រដល់ក្រសួងរៀបចំដែនដី នគរូបនីយកម្ម និងសំណង់ ចំពោះបញ្ហាចម្បងគឺការគិតគូរចំពោះសុវត្ថិភាព ពីព្រោះបញ្ហាគ្រោះថ្នាក់ដោយសារការបាក់រលំអគារដែលមានសភាពចាស់ទ្រុឌទ្រោមនេះគឺមិនអាចទស្សន៍ទាយទុកមុនបានទេ ដូច្នេះប្រសិនបើមានការបាក់រលំអគារចាស់ទ្រុឌទ្រោមទាំងនេះដែលបង្កឲ្យមានការស្លាប់ និងរបួសមនុស្សនៅពេលណាមួយនោះនឹងផ្ដល់នូវវិប្បដិសារីសម្រាប់ជាតិ សម្រាប់រាជរដ្ឋាភិបាលក៏ដូចជាយើងទាំងអស់គ្នា ដូច្នេះក្នុងវេទិកានេះ អ្វីដែលត្រូវផ្ដោតការគិតគូរជាចម្បងនោះគឺសុវត្ថិភាពជាមុនសិន បន្ទាប់មកទើបត្រូវរៀបចំគណៈកម្មការត្រួតពិនិត្យថាតើត្រូវប្ដូរទីតាំងផ្ទះសម្បែងរបស់ប្រជាពលរដ្ឋ ឬដោះដូរជាសំណងបែបណាមួយ»។
ជាការឆ្លើយតប ប្រជាពលរដ្ឋបានថ្លែងអំណរគុណយ៉ាងជ្រាលជ្រៅដល់រាជរដ្ឋាភិបាលដែលបានគិតគូរដោះស្រាយចំពោះបញ្ហាប្រជាពលរដ្ឋដែលរស់នៅក្នុងអគារចាស់ទ្រុឌទ្រោមដើម្បីបញ្ជៀសនូវហានិភ័យប៉ះពាល់ដល់អាយុជីវិត និងផ្ដល់នូវជម្រើសដ៏សមស្របសម្រាប់ប្រជាពលរដ្ឋក្នុងការដោះដូរចាកចេញពីទីតាំងកំពុងរស់នៅដែលប្រកបដោយហានិភ័យពីការបាក់រលំនេះ។ សូមបញ្ជាក់ដែរថា អគារដែលមានសភាពចាស់ទ្រុឌទ្រោម និងត្រូវដោះស្រាយទាំងនេះមានចំនួន ២១ ទីតាំង៕
Account
Security
Favourite Content