បរទេស ៖ មីក្រូប្លាស្ទិក (Microplastics) បានក្លាយទៅជាបញ្ហាដ៏ធ្ងន់ធ្ងរសម្រាប់បរិស្ថានរស់នៅនាពេលបច្ចុប្បន្ន ខណៈដែលការស្រាវជ្រាវរបស់អ្នកវិទ្យាសាស្ត្របានរកឃើញថា ផលប៉ះពាល់ជាច្រើនដែលអាចកើតឡើងចំពោះមនុស្សគ្រប់គ្នាពីការប្រើប្រាស់ប្លាស្ទិករួមមានដូចជា អាចបណ្តាលឲ្យមានការអភិវឌ្ឍខួរក្បាលទាប និងបញ្ហានៃការបន្តពូជ ទាំងចំពោះសត្វមានជីវិត ទាំងចំពោះមនុស្សទាំងអស់លើលោកផងដែរ។

អតីតប្រធានាធិបតីអាមេរិក លោក Joe Biden ធ្លាប់បានតាក់តែងច្បាប់ជាច្រើនរួចមកហើយដើម្បីទប់ស្តាត់បញ្ហាកាកសំណល់ជាប្លាស្ទិកដោយក្នុងនោះក៏មានគោលការណ៍ដើម្បីបញ្ឈប់ទាំងស្រុងនូវការប្រើប្រាស់ទុយោប្លាស្ទិកដែរ។ អាណត្តិរបស់លោក Biden បានដាក់ផែនការក្នុងការបញ្ចប់ការប្រើប្រាស់ទុយោប្លាស្ទិកនៅក្នុងគ្រប់សេវាកម្មម្ហូបអាហារក្នុងជួររដ្ឋាភិបាលអាមេរិកនៅត្រឹមឆ្នាំ២០២៧ និងបញ្ចប់ការប្រើប្រាស់ទាំងស្រុងនូវទុយោប្លាស្ទិកនៅទូទាំងប្រទេសនៅត្រឹមឆ្នាំ២០៣៥។

យ៉ាងណាក៏ដោយ ចូលមកអាណត្តិថ្មីក្រោមការដឹកនាំរបស់លោកប្រធានាធិបតី Donald Trump នេះគេមើលឃើញថា គោលការណ៍ទាំងនោះនឹងមានការប្រែប្រួលមកវិញ១៨០ដឺក្រេ ដោយកាលពីចុងសប្តាហ៍កន្លងទៅនេះ លោក Trump បានប្រកាសអំពីផែនការលើកទឹកចិត្ត និងជំរុញឲ្យមានការប្រើប្រាស់ផលិតផលនេះឡើងវិញ។

សរសេរនៅលើបណ្តាញសង្គម Truth Social លោក Trump បានរៀបរាប់បែបនេះថា ៖

«ខ្ញុំនឹងចុះហត្ថលេខាដើម្បីបញ្ចប់គោលការណ៍ប្រើប្រាស់ទុយោផលិតពីក្រដាស ឬ Paper Straws ដែលខ្ញុំជឿជាក់ថា វានឹងមិនអាចជោគជ័យនោះឡើយ ហើយយើងនឹងត្រឡប់ទៅរកប្លាស្ទិកវិញទាំងអស់គ្នា (BACK TO PLASTIC!) »។

គេបានដឹងហើយថា ផលិតផលធ្វើអំពីប្លាស្ទិកគឺជាដំណើរការផលិតដោយប្រើប្រាស់ថាមពលដែលបានមកពីការដុតប្រេងឆៅ និងហ្គាស ដូច្នេះគោលការណ៍ថ្មីរបស់លោក Trump លើកនេះគឺជាដំណឹងដ៏គួរឲ្យរីករាយបំផុតសម្រាប់សម្ព័ន្ធមិត្តដែលជាមហាសេដ្ឋីប្រេងកាតរបស់គាត់ផង ក៏ដូចជាក្រុមហ៊ុនទាំងឡាយនៅក្នុងឧស្សាហកម្មផលិតគ្រឿងប្លាស្ទិកទាំងអស់ផងដែរ។

សូមរំលឹកដែរថា កាលពីអាណត្តិរបស់លោក Biden សេតវិមានធ្លាប់បានទទួលស្គាល់ថា មីក្រូប្លាស្ទិកពិតជាបានចាក់ចូលទៅគ្រប់ទីកន្លែងចាប់ពីមហាសមុទ្រ និងខ្យល់អាកាសនៅជុំវិញបរិយាកាសរស់នៅបច្ចុប្បន្ន ហើយវាគឺជាកត្តាគំរាមកំហែងយ៉ាងខ្លាំងទៅដល់សុខមាលភាពសាធារណៈ។

មកដល់បច្ចុប្បន្ន ការដាក់ជំនួសទុយោប្លាស្ទិកនៅក្នុងជួររដ្ឋាភិបាលអាមេរិកនៅមិនទាន់អនុវត្តបានច្បាស់លាស់នៅឡើយទេ ហើយបើយោងតាមការស្រាវជ្រាវថ្មីៗក៏រកឃើញដែរថា ទោះបីជាទុយោផលិតអំពីក្រដាសបច្ចុប្បន្នអាចយកមកជំនួសក្តី ប៉ុន្តែវាក៏នៅតែជាផលិតផលដែលអាចផ្តល់ផលប៉ះពាល់ដល់សុខភាពរបស់អ្នកប្រើប្រាស់ និងបរិស្ថានដូចគ្នាដែរ។

ការស្រាវជ្រាវវិទ្យាសាស្ត្ររកឃើញថា សារធាតុម្យ់ាងដែលគេស្គាល់ឈ្មោះថា PFAS ដែលមាននៅក្នុងផលិតផលគ្រប់ប្រភេទទុយោដែលអាចធុន និងមិនជ្រាបទឹក សូម្បីតែទុយោដែលធ្វើអំពីក្រដាស ឬអំពីដើមឫស្សីក្តី ក៏នៅតែអាចបញ្ចេញសារជាតុពុលចូលទៅក្នុងបរិយាកាសដដែល៕