សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅក្នុងជំនួបជាមួយសមាគមជប៉ុន-កម្ពុជា កាលពីព្រឹកថ្ងៃទី១៨ វិច្ឆិកា ២០២៤ ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានផ្សព្វផ្សាយពីសក្ដានុពលវិនិយោគនៅក្នុងប្រទេសកម្ពុជា និងបានទាក់ទាញវិនិយោគិនជប៉ុនចូលមកបណ្ដាក់ទុនវិនិយោគនៅកម្ពុជាបន្ថែមទៀត ក្នុងគោលបំណងជំរុញកំណើនសេដ្ឋកិច្ច និងលើកកម្ពស់ជីវភាពរបស់ប្រជាពលរដ្ឋកម្ពុជា ។
នៅក្នុងជំនួបនោះដែរ ឯកឧត្តម សាយ សំអាល់ បានស្វាគមន៍ដំណើរទស្សនកិច្ចរបស់ប្រតិភូ JCA មកកាន់ប្រទេសកម្ពុជា ហើយបានចាត់ទុកថា នេះជាពេលវេលាដែលខុសប្លែកពីទស្សនកិច្ចលើកមុន ហើយក៏ជាទស្សនកិច្ចដែលប្រកបដោយឱកាសជាច្រើនសំរាប់សមាគមជប៉ុន-កម្ពុជា។ នេះក៏ជាឱកាសដ៏ល្អសម្រាប់ក្រសួងរៀបចំដែនដី នគរូបនីយកម្ម និងសំណង់ ដែលគ្រោងនឹងរៀបចំសន្និបាតប្រចាំឆ្នាំនាសប្តាហ៍ក្រោយ ដែលនឹងមានការចូលរួមជាអធិបតីភាពដ៏ខ្ពង់ខ្ពស់ពីសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ពោលគឺនេះជាពេលវេលាប្រកបដោយមោទនភាពរបស់ឯកឧត្តមផ្ទាល់ និងមន្ត្រីរាជការគ្រប់លំដាប់ថ្នាក់នៃក្រសួងរៀបចំដែនដី ព្រមទាំងរាជរដ្ឋាភិបាលកម្ពុជានីតិកាលទី៧នៃរដ្ឋសភាផងដែរ។
ឯកឧត្តមបានលើកឡើងពីលទ្ធផលការងារជាអាទិភាពរបស់ក្រសួងដែលបានអនុវត្តកន្លងមក ក្នុងនោះមានការចុះបញ្ជីដីធ្លីដែលមកដល់ពេលនេះនៅទូទាំងប្រទេសសម្រេចបានជាង ៣លានក្បាលដី និងនៅសល់ត្រឹមតែប្រមាណជា ៥០ម៉ឺនក្បាលដីទៀតប៉ុណ្ណោះនឹងបញ្ចប់រួចរាល់ជាស្ថាពរ ហើយនេះជាលើកទី១ក្នុងប្រវត្តិសាស្រ្តប្រទេសកម្ពុជា ដែលបានបញ្ចប់ការងារចុះបញ្ជីដីធ្លីនៅទូទាំងប្រទេស។
ចំពោះបញ្ហាវិវាទដីធ្លីមកដល់ពេលនេះ គឺបានដោះស្រាយបានច្រើនករណីរួចមកហើយ ពោលគឺនៅសល់ត្រឹមក្រោម ១ ០០០ករណីប៉ុណ្ណោះ ដែលកាលពីមុនមានរហូតដល់ជាង ១ម៉ឺន៥ពាន់ករណី។ រីឯសេវាសុរិយាដី និងសេវាសំណង់ គឺបានប្រែក្លាយមកជាប្រព័ន្ធឌីជីថល ដែលផ្តល់ភាពងាយស្រួលដល់ប្រជាពលរដ្ឋក្នុងការប្រើប្រាស់។
ឯកឧត្តមឧបនាយករដ្ឋមន្ត្រី ក៏បានលើកឡើងពីឱកាសវិនិយោគថ្មីសំរាប់ជប៉ុនលើវិស័យមួយចំនួន ដូចជានៅខេត្តព្រះសីហនុនឹងមានការពង្រីកកំពង់ផែទឹកជ្រៅ ដោយមានមហិច្ឆតានឹងប្រែក្លាយផែនេះឱ្យក្លាយជាផែធំទី២បន្ទាប់ពីផែនៅប្រទេសសិង្ហបុរី។ ក្រៅពីនេះ ឯកឧត្តមក៏បានលើកឡើងអំពីតំបន់សេដ្ឋកិច្ចពិសេសភ្នំពេញដែលជាកន្លែងដ៏សំខាន់មួយសំរាប់បង្កើតការងារដល់ប្រជាជនកម្ពុជា ព្រមទាំងទិសដៅវិនិយោគសំខាន់ៗមួយចំនួនទៀតដែលជប៉ុនអាចចូលរួមសហការបានក្នុងការជួយជំរុញដល់ដំណើរការសេដ្ឋកិច្ចរបស់ប្រទេសកម្ពុជា។
ឯកឧត្តមបានបញ្ជាក់ថា អ្វីៗដែលរាជរដ្ឋាភិបាលកម្ពុជានីតិកាលទី៧ បានខិតខំប្រឹងប្រែងធ្វើសព្វថ្ងៃនេះគឺដើម្បីជំរុញឱ្យដំណើរការសេដ្ឋកិច្ចកម្ពុជាប្រព្រឹត្តទៅដោយរលូនទៅមុខ ដោយសង្ឃឹមថានឹងរក្សាបានកំណើនសេដ្ឋកិច្ចក្នុងរង្វង់៧%ជារៀងរាល់ឆ្នាំ។
ឯកឧត្តម តាកាហាស៊ី ហ្វូមីអាគី (TAKAHASHI Fumiaki) ប្រធានសមាគមជប៉ុន-កម្ពុជា បានឱ្យដឹងថា នេះជាលើកទី៤ហើយដែលសមាគមជប៉ុន-កម្ពុជា បានធ្វើទស្សនកិច្ចផ្លូវការមកកាន់ប្រទេសកម្ពុជា ដោយបច្ចុប្បន្ននេះ លោកសង្កេតឃើញថាកម្ពុជាបានអភិវឌ្ឍជឿនលឿនជាងមុនលើការវិនិយោគពីបណ្តាប្រទេសនានា ក្នុងនោះក៏មានជប៉ុនផងដែរ។
លោកបានបញ្ជាក់ថា ជំនួបនេះធ្វើឡើងក្នុងគោលបំណងដើម្បីពិភាក្សាអំពីលទ្ធភាពក្នុងការវិនិយោគពីក្រុមហ៊ុននានារបស់ប្រទេសជប៉ននៅក្នុងប្រទេសកម្ពុជា។
គួរបញ្ជាក់ថា បច្ចុប្បន្ននេះ វិនិយោគិនជប៉ុន ជាវិនិយោគិនដែលបណ្ដាក់ទុនវិនិយោគនៅកម្ពុជាធំមួយ ហើយគម្រោងវិនិយោគរបស់ជប៉ុននៅកម្ពុជាក៏ទទួលបានការគាំទ្រច្រើនពីសំណាក់ប្រជាពលរដ្ឋនៅក្នុងប្រទេស ធ្វើឱ្យវិនិយោគិនជប៉ុនបានពង្រីកការវិនិយោគជាបន្តបន្ទាប់ទៀត ក្នុងនោះគម្រោងលេចធ្លោមួយចំនួនបាននិងកំពុងពង្រីកខ្លួនជាបន្តបន្ទាប់រួមមានគម្រោងផ្សារទំនើបអ៊ីអនម៉ល ធនាគារឯកទេសអ៊ីអន និងគម្រោងវិនិយោគរបស់ក្រុមហ៊ុន Minebea ជាដើម ៕
Account
Security
Favourite Content