សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ រួមជាមួយនឹងក្រសួងវប្បធម៌ និងវិចិត្រសិល្បៈ, រដ្ឋបាលខេត្តសៀមរាប អាជ្ញាធរជាតិអប្សរា និងអាជ្ញាធរពាក់ព័ន្ធ បានជួបប្រជុំផ្លាស់ប្តូរមតិយោបល់គ្នាលើគោលការណ៍ក្នុងការតាក់តែងប្លង់គោលនៃការប្រើប្រាស់ដីនៅក្នុងតំបន់បេតិកភណ្ឌពិភពលោកអង្គរ សំដៅជំរុញកសាងការឯកភាពរវាងប្រជាពលរដ្ឋដែលកំពុងរស់នៅក្នុង ១១៤ភូមិ ជាមួយអាជ្ញាធរដែនដី និងអាជ្ញាធរជាតិអប្សរា។
នៅក្នុងកិច្ចប្រជុំកាលពីថ្ងៃទី២ ខែតុលា ឆ្នាំ២០២៥ ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែន ដីនគរូបនីយកម្ម និងសំណង់ បានឱ្យដឹងថា ការជួបជុំគ្នានាពេលនេះ គឺដើម្បីជជែកពិភាក្សាផ្លាស់ប្ដូរមតិយោបល់ជាមួយអន្តរក្រសួងស្ថាប័នពាក់ព័ន្ធដើម្បីរៀបចំប្លង់គោលនៃការប្រើប្រាស់ដីនៅតំបន់បេតិកភណ្ឌពិភពលោកអង្គរ ក្នុងខេត្តសៀមរាប ដោយកំណត់ឱ្យបានច្បាស់លាស់អំពីតំបន់លំនៅឋាន តំបន់បេតិកភណ្ឌ និងដីសម្រាប់ប្រើប្រាស់ ។
ឯកឧត្តមបានមានប្រសាសន៍សង្កត់ធ្ងន់ថា ៖
«ការងារនេះ គឺជាកិច្ចការសំខាន់ ពីព្រោះនាពេលខាងមុខ យើងនឹងយកប្លង់គោលនៃការប្រើប្រាស់ដីនេះជាគោលក្នុងការរៀបចំថវិកាសម្រាប់អភិវឌ្ឍន៍តំបន់នេះទាំងមូល»។
ឯកឧត្តមឧបនាយករដ្ឋមន្ត្រី សាយ សំអាល់ បានស្នើដល់សមាជិកអង្គប្រជុំត្រូវគិតគូរឱ្យបានហ្ម៉ត់ចត់ និងវែងឆ្ងាយ ដើម្បីរៀបចំប្លង់គោលនៃការប្រើប្រាស់ដីនៅតំបន់បេតិកភណ្ឌពិភពលោកអង្គរនេះឱ្យបានត្រឹមត្រូវ សមស្របតាមស្ថានភាពជាក់ស្ដែង ចៀសវាងកើតមាននូវបញ្ហាផ្សេងៗនាពេលក្រោយ។
ការរៀបចំប្លង់គោលនៃការប្រើប្រាស់ដីនៅតំបន់អង្គរលើភូមិទាំង១១៤ភូមិនេះ នឹងជួយលើកកម្ពស់ជីវភាពពលរដ្ឋរស់នៅក្នុងតំបន់នោះកាន់តែប្រសើរ អាចទាញយកផលប្រយោជន៍ពីការរៀបចំប្លង់គោលនៃការប្រើប្រាស់ដីបានកាន់តែច្រើន និងអាចទាញរកប្រាក់ចំណូលសម្រាប់ផ្គត់ផ្គង់ជីវភាពគ្រួសារបានកាន់តែប្រសើរ ។
គួររម្លឹកថា សកម្មភាពរបស់ក្រសួងរៀបចំដែនដី នគរូបនីយកម្ម និងសំណង់ នៅពេលនេះ គឺជាសមរភូមិថ្មីបន្ទាប់ពីបានចុះបញ្ជីដីធ្លី និងបញ្ចប់វិវាទដីធ្លីនៅទូទាំងប្រទេស ។ ក្រៅពីនេះ ក្រសួងរៀបចំដែនដី នគរូបនីយកម្ម និងសំណង់ ក៏មានបេសកកម្មផ្សេងទៀត ដើម្បីរៀបចំនគរូបនីយកម្មនៅក្នុងប្រទេសកម្ពុជាឱ្យកាន់តែទំនើប និងធ្វើឱ្យពលរដ្ឋកាន់តែមានភាពងាយស្រួលក្នុងការរស់នៅប្រកបដោយសុខុដុមរមនា និងរីករាយសប្បាយចិត្ត ៕
Account
Security
Favourite Content