សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ប្រទេសម៉ាឡេស៊ី បានកោតសរសើរអំពីគុណភាពអង្ករកម្ពុជា ហើយប្រជាជនម៉ាឡេស៊ីបានចាប់ផ្តើមពេញនិយមអង្ករក្រអូបគឺផ្ការំដួល និងសែនក្រអូប។ ដោយសារមានការពេញនិយមនេះ ភាគីម៉ាឡេស៊ី បានស្នើសុំឱ្យកម្ពុជាដាំស្រូវផ្ការំដូល និងសែនក្រអូបឱ្យបានច្រើនសម្រាប់នាំចេញទៅម៉ាឡេស៊ី។
ថ្មីៗនេះ សហព័ន្ធស្រូវអង្ករកម្ពុជា ដឹកនាំដោយ ឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជា ក្រោមកិច្ចសម្របសម្រួលរបស់ស្ថានទូតកម្ពុជាប្រចាំប្រទេសម៉ាឡេស៊ី បានដឹកនាំប្រតិភូ១៦ រូប មកពី១០ក្រុមហ៊ុនធ្វើទស្សនកិច្ចដើម្បីរឹតចំណងសាមគ្គីភាពបន្ថែមទៀតជាមួយក្រុមហ៊ុនរដ្ឋប្រទេសម៉ាឡេស៊ី Padiberas Nasional Bhd (BERNAS) ដែលជាក្រុមហ៊ុនផ្តាច់មុខលើការនាំចូល និងក្រុមហ៊ុនទទួលចែកចាយបន្តនៅក្នុងប្រទេសម៉ាឡេស៊ី ក្នុងគោលបំណងដើម្បីពង្រីកសក្តានុពលនៃការនាំចេញបន្ថែមទៀតនូវអង្ករកម្ពុជាទៅកាន់ប្រទេសម៉ាឡេស៊ី។
យោងតាមសហព័ន្ធស្រូវអង្ករកម្ពុជា ប្រទេសម៉ាឡេស៊ី ជាប្រទេសធំទី៣ ដែលកម្ពុជាបាននាំចេញប្រចាំឆ្នាំមានបរិមាណប្រមាណជាង ៥ម៉ឺនតោន ដែលអង្ករទាំងនោះគី ៩៥%ជាអង្ករក្រអូប (អង្ករផ្ការំដួល និង សែនក្រអូប)។ ក្នុងទស្សនកិច្ចដ៏មានសារៈសំខាន់នេះ ប្រទេសម៉ាឡេស៊ីបានលើកឡើង និងកោតសរសើរអំពីគុណភាពអង្ករកម្ពុជា ដែលប្រជាជនប្រទេសម៉ាឡេស៊ីចាប់ផ្តើមពេញនិយម និងកំពុងប្រើប្រាស់មានកំណើនជាមធ្យមជាង ១០% ប្រចាំឆ្នាំ។
ប្រភពដដែលបានឱ្យដឹងថា ៖ ប្រទេសកម្ពុជាជាប្រទេសធំទី៥ ដែលប្រទេសម៉ាឡេស៊ីបាននាំចូលក្នុងចំណោមប្រទេសទាំង១២។ សម្រាប់ប្រទេសកម្ពុជា អង្ករពូជស្រូវផ្ការំដូល និងសែនក្រអូបគឺជាអង្ករដែលល្អសម្រាប់ទីផ្សារប្រទេសនេះ ហើយភាគីប្រទេសម៉ាឡេស៊ីសូមសំណូមពរឱ្យប្រទេសកម្ពុជាផលិតអង្ករប្រភេទនេះឱ្យបានកាន់តែច្រើនថែមទៀត និងបានសន្យានឹងដឹកនាំក្រុមហ៊ុននានាដែលជាក្រុមហ៊ុននាំចូលអង្ករមកទស្សនកិច្ចសិក្សាដល់រោងម៉ាស៊ីនស្រូវនៅកម្ពុជាបន្ថែមទៀតនាពេលដ៏ខ្លីខាងមុខ ជាពិសេសនៅក្នុងខែកញ្ញា ជារដូវប្រមូលផលស្រូវមិនប្រកាន់ដូវវគ្គទី២ផងដែរ។
គិតចាប់ពីខែមករាដល់ខែមីនា ឆ្នាំ២០២៤ ការនាំចេញស្រូវអង្កររបស់កម្ពុជាសម្រេចបានទឹកប្រាក់ប្រមាណជាង ៧២៣លានដុល្លារអាមេរិក។ ចំណែកឆ្នាំ២០២៣ការនាំចេញស្រូវអង្កររបស់កម្ពុជាសម្រេចបានទឹកប្រាក់ប្រមាណជាង ១ ៧០០លានដុល្លារអាមេរិក ក្នុងនោះការនាំចេញអង្ករសម្រេចបានជាង ៤៦៦លានដុល្លារ និងស្រូវជាង ១៣០០លានដុល្លារ៕
Account
Security
Favourite Content