សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ បានយកចិត្តទុកដាក់គិតគូរអំពីការរៀបចំទីក្រុង ទីប្រជុំជន តាមរយៈការដោះស្រាយបញ្ហាអគារសហកម្មសិទ្ធិដែលមានសភាពចាស់ទ្រុឌទ្រោម ដើម្បីរក្សាគុណតម្លៃមរតកនៃអគារទាំងនោះ និងចាប់ទាញប្រជាពលរដ្ឋដែលស្នាក់នៅក្នុងអគារទាំងនោះឱ្យចាកចេញពីភាពទាល់ច្រក អំពើហិង្សា គ្រឿងញៀន ការបៀតបៀន និងបញ្ចៀសកុំឱ្យមានគម្លាតបែងចែកក្នុងការរស់នៅក្នុងសង្គមជាតិ ។
នៅក្នុងសិក្ខាសាលាស្ដីពីសំណង់អគារស្នាក់នៅរួមមានសភាពចាស់ទ្រុឌទ្រោមដែលធ្វើឡើងកាលពីថ្ងៃចុងសប្ដាហ៍កន្លងទៅនេះ ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានជំរុញឱ្យមានការយកចិត្តទុកដាក់គិតគូរអំពីការរៀបចំទីក្រុង ទីប្រជុំជន តាមរយៈការដោះស្រាយបញ្ហាសំណង់អគារសហកម្មសិទ្ធិដែលមានសភាពចាស់ទ្រុឌទ្រោម ដើម្បីរក្សាគុណតម្លៃមរតកនៃអគារទាំងនោះ និងចាប់ទាញប្រជាពលរដ្ឋដែលស្នាក់នៅក្នុងអគារទាំងនោះឱ្យចាកចេញពីភាពទាល់ច្រក អំពើហិង្សា គ្រឿងញៀន ការបៀតបៀន និងបញ្ជៀសកុំឱ្យមានគម្លាតបែងចែកក្នុងការរស់នៅក្នុងសង្គមជាតិ ។
ឯកឧត្តម បានចាត់ទុកសិក្ខាសាលានេះថា មានសារៈសំខាន់ដែលអាចត្រួសត្រាយផ្លូវសម្រាប់ដើរទៅមុខបានត្រឹមត្រូវ ហើយប្រធានបទស្ដីពី សំណង់អគារស្នាក់នៅរួមដែលមានសភាពចាស់ទ្រុឌទ្រោម គឺជាចំណុចមួយដ៏សំខាន់សម្រាប់កម្ពុជា និងសម្រាប់វិស័យជំនាញរបស់ក្រសួងរៀបចំដែនដី នគរូបនីយកម្ម និងសំណង់ ។
តាមរយៈសិក្ខាសាលានេះ ឯកឧត្តមឧបនាយករដ្ឋមន្ត្រី បានជំរុញណែនាំដល់សិក្ខាកាមទាំងអស់ត្រូវពង្រីកនូវការគិតគូរឱ្យបានវែងឆ្ងាយ និងទូលំទូលាយបន្ថែមទៀតទៅលើការថែរក្សាគុណតម្លៃមរតកនៃអគារដែលមានអាយុកាលចំណាស់ និងមានសភាពចាស់ទ្រុឌទ្រោមដោយត្រូវសិក្សាពីរចនាបថ ស្ថាបត្យកម្ម និងវិស្វកម្មនៃអគារទាំងនោះ ដើម្បីអាចឈានឆ្ពោះទៅមុខប្រកបដោយនវានុវត្តន៍ និងភាពបត់បែនប្រកបដោយភាពរស់រវើកផងដែរ ។
ឯកឧត្តមបានបន្ថែមថា អគារសហកម្មសិទ្ធិដែលមានសភាពទ្រុឌទ្រោមនេះគឺជាបញ្ហាមួយសម្រាប់រាជធានីភ្នំពេញដែលត្រូវរួមគ្នាគិតគូរ ដោយឯកឧត្តមបានចាត់ឱ្យមន្ត្រីជំនាញស្រង់យកបញ្ហាអគារទាំងនេះដែលមាននៅក្នុងរាជធានីភ្នំពេញសំរាប់ធ្វើជាប្រធានបទមួយដើម្បីដោះស្រាយ។
ឯកឧត្តម សាយ សំអាល់ យល់ឃើញថា សិក្ខាសាលានេះគឺជាចំណុចចាប់ផ្ដើមមួយ ដើម្បីឱ្យសិក្ខាកាមទាំងអស់បានយល់ដឹងអំពីបញ្ហានៅក្នុងរាជធានីភ្នំពេញ ហើយសង្ឃឹមថាជំហានដែលត្រូវដើរទៅមុខទៀតគឺមានលក្ខណៈច្បាស់លាស់ក្នុងការកំណត់គោលដៅថាតើត្រូវធ្វើអ្វីខ្លះសម្រាប់រាជធានីភ្នំពេញ និងបណ្ដាទីប្រជុំជននានាចាប់ពីពេលនេះរហូតដល់ឆ្នាំ២០៥០។
ឯកឧត្តមឧបនាយករដ្ឋមន្ត្រី សាយ សំអាល់បញ្ជាក់ថា នៅក្នុងការដោះស្រាយបញ្ហាអគារសហកម្មសិទ្ធិដែលមានភាពទ្រុឌទ្រោមនេះ គឺត្រូវធ្វើការសម្រេចចិត្តតាមរយៈនយោបាយ សេដ្ឋកិច្ច និងសុវត្ថិភាពសង្គម មានន័យថា ត្រូវជ្រើសយកជម្រើសនយោបាយសម្របសម្រួលជាមួយអ្នកស្នាក់នៅក្នុងអគារនេះដើម្បីធ្វើយ៉ាងណាឱ្យមានសុវត្ថិភាពដល់សង្គម និងបុគ្គល ដោយក្នុងនោះត្រូវផ្ដល់សំណងឱ្យពួកគាត់ចាកចេញពីអគារទាំងនេះទៅរកទីតាំងថ្មីដែលល្អប្រសើរជាងនេះ ។
ម្យ៉ាងទៀតការដោះស្រាយសម្របសម្រួលឱ្យអ្នកស្នាក់នៅក្នុងអគារទាំងនេះចាកចេញនោះគឺជាការចាប់ទាញប្រជាពលរដ្ឋឱ្យចាកចេញពីភាពទាល់ច្រក អំពើហឹង្សា គ្រឿងញៀន ការបៀតបៀន និងបញ្ជៀសកុំឱ្យមានគម្លាតបែងចែកក្នុងការរស់នៅរវាងអ្នកដែលមានជីវភាពធូរធារនិងអ្នកដែលមានជីវភាពខ្វះខាតជាដើម។
សូមបញ្ជាក់ថា នៅរាជធានីភ្នំពេញមានអគារសហកម្មសិទ្ធិដែលមានសភាពចាស់ទ្រុឌទ្រោមចំនួន ១៩អគារ ដែលត្រូវដោះស្រាយ៕
Account
Security
Favourite Content