ភ្នំពេញ៖ រាជរដ្ឋាភិបាលកម្ពុជា និងរដ្ឋាភិបាលចិន បានចុះហត្ថលេខាលើអនុស្សរណៈនៃការយោគយល់គ្នាចំនួន១៥ ដែល​ឯកសារស្តីផែនការ​សកម្មភាព​នៃការកសាងសហគមន៍វាសនារួមកម្ពុជា-ចិន ក្នុងយុគសម័យថ្មីឆ្នាំ២០២៤-២០២៨។ ពិធីចុះហត្ថលេខានេះធ្វើឡើងក្រោយជំនួប​ចរចាទ្វេរភាគីរវាងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងលោក លី ឈាង (Li Qiang) នាយករដ្ឋមន្រ្តីនៃសាធារណរដ្ឋប្រជាមានិតចិនកាលពីចុងសប្តាហ៍។

ក្នុងចំណោមកិច្ចព្រមព្រៀងកិច្ចសហប្រតិបត្តិការទ្វេភាគីក្នុងវិស័យឧស្សាហកម្ម ហេដ្ឋារចនាសម្ព័ន្ធសេដ្ឋកិច្ចឌីជីថល ការអភិវឌ្ឍន៍បៃតង ការត្រួតពិនិត្យ និងកិច្ចសហប្រតិបត្តិការអភិវឌ្ឍន៍ក៏មានកិច្ចព្រមព្រៀងស្តីពីច្រករបៀង មច្ឆា និងអង្ករ ផងដែរ។ ទាក់ទងនឹងច្រករបៀង មច្ឆា និងអង្ករនេះ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងសហការីបានជួប​ពិភាក្សាការងារជាមួយសមភាគីលោក Tang Renjian រដ្ឋមន្ត្រីក្រសួងកសិកម្ម និងកិច្ចការជនបទនៃសាធារណរដ្ឋប្រជាមានិតចិន និង​សហការី នៅទីក្រុងណាននីង ដើម្បីពិភាក្សាទ្វេភាគីស្តីពីកិច្ចសហប្រតិបត្តិការក្នុងវិស័យកសិកម្មនៃប្រទេសទាំង២។

នៅក្នុងជំនួបនោះ ឯកឧត្តមរដ្ឋមន្ត្រី ឌិត ទីណា បានលើកពីសមិទ្ធផលធំៗជាច្រើនដែលសម្រេចបានក្រោមកិច្ចសហការរវាងក្រសួង​កសិកម្ម​នៃប្រទេសទាំងពីរ រួមមានការកសាងហេដ្ឋារចនាសម្ព័ន្ធរូបវ័ន្ដ មន្ទីរពិសោធន៍ផលិតផលកសិកម្ម, មជ្ឈមណ្ឌលជំរុញផលិតផលកសិកម្មកម្ពុជា និងការកសាងសមត្ថភាពបច្ចេកទេសដល់មន្ត្រីកសិកម្ម។

បន្ថែមពីលើនេះ ឯកឧត្តមរដ្ឋមន្ដ្រី បានថ្លែងអំណរគុណដល់ក្រុមការងាររបស់មជ្ឈមណ្ឌលកិច្ចសហប្រតិបត្តិការសេដ្ឋកិច្ចអន្តរជាតិ (Foreign Economic Cooperation Center) នៃក្រសួងកសិកម្ម និងកិច្ចការជនបទចិន ដែលបានសហការយ៉ាងជិតស្និទ្ធជាមួយមន្ត្រីក្រសួងកសិកម្ម រុក្ខាប្រមាញ់ និងនេសាទកម្ពុជា បានរៀបចំនូវផែនការយុទ្ធសាស្ត្រអភិវឌ្ឍន៍កសិកម្មកម្ពុជា ២០២៤-២០២៨។

ឯកឧត្តមរដ្ឋមន្ត្រីក៏បានបញ្ជាក់ផងដែរអំពីយន្តការសម្រាប់ជំរុញអនុវត្តឱ្យមានប្រសិទ្ធភាព និងបានជាផលប្រយោជន៍ដល់ភាគីទាំងសងខាង​នូវច្រករបៀងមច្ឆា និងអង្ករ ដែលភាគីទាំង២បានចុះហត្ថលេខាកាលពីថ្ងៃទី១៥ ខែកញ្ញា ២០២៣ ដោយត្រូវរៀបចំនូវគណៈកម្មការតម្រង់ទិស​ដែលដឹកនាំដោយអនុរដ្ឋមន្ត្រីនៃក្រសួងទាំងពីរ និងក្រុមការងារបច្ចេកទេសរួមសម្រាប់រៀបចំផែនការសកម្មភាពអនុវត្តឱ្យត្រូវតាមគោល​នយោបាយដែលបានកំនត់ដោយថ្នាក់ដឹកនាំកំពូលនៃប្រទេសទាំងពីរ។

ឯកឧត្តមរដ្ឋមន្ត្រីក៏បានស្នើសមភាគីជួយសហការផ្នែកបច្ចេកទេសដើម្បីជំរុញនូវមុខទំនិញអាទិភាពចំនួន៣ដូចជា អង្ករ ស្វាយចន្ទីរ និង​ត្រីចិញ្ចឹម នៅក្នុងច្រករបៀងអង្ករ និងមច្ឆា សម្រាប់នាំចេញមកកាន់ទីផ្សារចិន និងទីផ្សារអន្តរជាតិដទៃទៀត។ ទន្ទឹមគ្នានេះ ឯកឧត្តមរដ្ឋមន្ដ្រី បានលើកទឹកចិត្តដល់អ្នកវិនិយោគិនចិនដែលមានជំនាញ និងបច្ចេកទេសទីផ្សារល្អៗ មកវិនិយោគក្នុងវិស័យកសិកម្មនៅកម្ពុជាពិសេសលើការ​កែច្នៃ វិចខ្ចប់ផលិតផលកសិកម្មដែលមានស្រាប់ឱ្យទៅជាផលិតផលដែលមានគុណភាពខ្ពស់ រសជាតិឆ្ងាញ់ និងមានឈ្មោះល្បីលើទីផ្សារ​អន្តរជាតិ។

ឯកឧត្តម Tang Renjian រដ្ឋមន្ត្រីកសិកម្មចិន ក៏បានបញ្ជាក់ថា កម្ពុជាមានផលិតផលកសិកម្មជាច្រើនដែលមានគុណភាពល្អ រសជាតិឆ្ងាញ់ ហើយប្រជាជនចិនក៏ចូលចិត្តផងដែរ។ ឯកឧត្តមនឹងលើកទឹកចិត្ត និងជំរុញអ្នកវិនិយោគចិនមកវិនិយោគនៅកម្ពុជាដើម្បីបង្កើនពាណិជ្ជកម្ម​កសិកម្មរវាងប្រទេសទាំង២ ឱ្យកើនឡើងមួយកម្រិតទៀតនាពេលខាងមុខ។

ឯកឧត្តមរដ្ឋមន្ត្រីទាំង២ បានឯកភាពគ្នាក្នុងការបង្កើតគណៈកម្មការតម្រង់ទិស និងក្រុមការងារបច្ចេកទេសរួម សម្រាប់ច្រករបៀងអង្ករ និងមច្ឆា និងឯកភាពថាក្រុមការងារបច្ចេកទេសនឹងចាប់ផ្តើមកិច្ចប្រជុំឆាប់ៗដើម្បីកំនត់ផែនការសកម្មភាព និងលើកទិសដៅច្បាស់លាស់ក្នុងការ​អនុវត្តឈានទៅសម្រេចបាននូវជោគជ័យ ឆ្លើយតបទៅតាមទស្សនៈវិស័យរបស់ថ្នាក់ដឹកនាំកំពូលរបស់ប្រទេសទាំងពីរ។

គួរបញ្ជាក់ផងដែរថា បង្កងកណ្តូប ត្រូវបាននាំទៅលក់ លើទីផ្សារប្រទេសចិន ជាលើកដំបូងបំផុត ។ ការនាំចេញបង្កងកណ្តូបនេះគឺជាលើក​ទីមួយហើយទៅកាន់ទីផ្សារ ប្រទេសចិន។

ជំទាវ ​អ៊ឹម រចនា អនុរដ្ឋលេខាធិការ ក្រសួងកសិកម្មបានថ្លែងថា ៖ ក្រសួងកសិកម្ម កំពុងធ្វើការថ្លឹងថ្លែងមើលថា បង្កងកណ្តូបដែល​មានក្នុងធម្មជាតិ មានចំនូនតិចតួចនៅឡើយ ហេតុនេះថាតើយើងត្រូវនាំចេញកម្រិតដូចម្តេច ឱ្យរក្សាបាននូវតុល្យភាពសត្វទាំងនេះនៅក្នុង​ធម្មជាតិ។

ឯកឧត្តម ពុំ សុថា ប្រតិភូរាជរដ្ឋាភិបាលកម្ពុជា ទទួលបន្ទុកអគ្គនាយករដ្ឋបាលជលផល បានឱ្យដឹងថា៖ បង្កងកណ្តូបកំពុងមានទីផ្សារល្អ​លើទីផ្សារចិន ដែលមានន័យថា កម្ពុជាមានប៉ុន្មាន ក៏គេទទួលយកដែរ។ ការនាំចេញបង្កងប៉ាក និងធនធានសមុទ្រកម្ពុជាច្រើនទៀតនាកន្លង​មកនេះដែរ សុទ្ធតែមានរសជាតិឆ្ងាញ់ពិសា ដែលទីផ្សារប្រទេសចិនគេត្រូវការ។

ឯកឧត្តមបានលើកឡើងថា៖

“កាលពីដំបូងឡើយ បង្កងកណ្តូប អ្នកនេសាទកម្ពុជា មិនត្រូវការវាទេ ដោយសារគ្មានទីផ្សារ ប៉ុន្តែបន្ទាប់ពីកម្ពុជា បានទទួលកិច្ចសហប្រតិបត្តិការ លើទីផ្សារ និងជនជាតិចិន ចូលមកកាន់កម្ពុជា កាន់តែច្រើន មកឃើញថា ទីផ្សារបង្កងកណ្តូបកំពុងមាន​តម្រូវការខ្ពស់ ហើយពេលនេះ យើងអាចនាំចេញទៅលក់ប្រទេសនេះ បានទៀតផង”។

គួរបញ្ជាក់ថា កាលពីខែឧសភា ឆ្នាំ២០២៣ ផលិតផលជលផល ធម្មជាតិរបស់កម្ពុជា ចំនួន ១១ ប្រភេទ ទទួលបានការអនុញ្ញាត ឲ្យនាំចេញ ទៅកាន់ទីផ្សារប្រទេសចិន។ ផលិតផលចំនួន ១១ ប្រភេទនេះ រួមមាន៖ កំពឹសទឹកសាប, ត្រីប្រាធំ, ត្រីប្រាខ្ចៅ, ខ្យងទឹកសាបពីរប្រភេទ, អន្ទង់ទឹកសាប, បង្កងកណ្តូប ពីរប្រភេទ, បង្គាខ្លឹង, បង្គា ស និងបង្គាប៉ារ៉ា៕