សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ព្រះសីហនុ ៖ បច្ចុប្បន្ន អគារជាប់គាំងនៅក្នុងខេត្តព្រះសីហនុ មានចំនួន ៣៦៤អគារ ខណៈដែលរាជរដ្ឋាភិបាលកម្ពុជាបាន និងកំពុងរកវិធីសាស្ត្រដើម្បីដោះស្រាយឱ្យអគារទាំងនោះរស់ឡើងវិញ។
យោងតាមរបាយការណ៍របស់ក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា ភាពជាប់គាំងទាំងនោះបណ្តាលមកពីបញ្ហាប្រឈមចំនួន៥ ដែលនាំឱ្យការដោះស្រាយអូសបន្លាយរយៈពេលយូរ។ បញ្ហាទាំងអស់នោះរួមមាន ៖ ១ -វិវាទរវាងម្ចាស់អគារ និងម្ចាស់ដី, ២-សំណង់ភាគច្រើនគ្មានលិខិតអនុញ្ញាតសាងសង់ ដែលធ្វើឱ្យខ្វះការត្រួតពិនិត្យគុណភាពសំណង់, ៣- តម្លៃអចលនទ្រព្យខ្ពស់ , ៤-ការបង់ពន្ធច្រើន និងទី៥-កង្វះទុនវិនិយោគបន្ថែមសម្រាប់បន្តការសាងសង់ និងអនុវត្តគម្រោង។
រាជរដ្ឋាភិបាលក៏បានស្រាវជ្រាវឃើញថា អ្នកវិនិយោគភាគច្រើនខ្វះទំទុកចិត្ត ខ្វះធនធាន និងជំនាញក្នុងការរៀបចំគម្រោងឡើងវិញ ជាពិសេសក្នុងបង្កើតទំនាក់ទង។
ជាវិធានការដោះស្រាយ រាជរដ្ឋាភិបាលកម្ពុជា តាមរយៈក្រសួងសេដ្ឋកិច្ចបានដាក់ចេញនូវវិធានការលើកលែងពន្ធ សម្រួលលើលិខិតនានា និងអនុញ្ញាតឱ្យវិស័យឯកជនបង្កើតមូលនិធិនៃគម្រោងវិនិយោគរួម និងតាមរយៈបរធនបាលកិច្ចរបស់ក្រសួងសេដ្ឋកិច្ចផងដែរ។
គួរបញ្ជាក់ថា គិតត្រឹមខែកញ្ញា ឆ្នាំ២០២៣កន្លងទៅនេះ ខេត្តព្រះសីហនុ មានគម្រោងសាងសង់សរុប ៩៦៥ ស្មើ ១០៦៩ អគារ។ គម្រោងផ្អាកសាងសង់មានចំនួន ៣៤១ ស្មើ ៣៦៤ អគារ កំពុងដំណើរការសាងសង់ ២៩ គម្រោង ស្មើ៥៣អគារ សាងសង់រួចតែមិនដំណើរការមាន ១៦១ គម្រោងស្មើ ១៧៧អគារ សាងសង់រួចកំពុងដំណើរការមាន ៤៣៤ គម្រោងស្មើ ៤៧៥ អគារ។
ទាក់ទងនឹងការដោះស្រាយវិបត្តិអគារជាប់គាំងនេះដែរ នៅថ្ងៃទី៧ ខែធ្នូ ឆ្នាំ២០២៣ និយ័តករបរធនបាលកិច្ច ក្រុមការងារដោះស្រាយគម្រោងអគារជាប់គាំង និងរដ្ឋបាលខេត្តព្រះសីហនុ បានសហការរៀបចំសិក្ខាសាលាមួយក្នុងគោលបំណងបញ្ជ្រាបបន្ថែមអំពីយន្តការបរធនបាលកិច្ចទៅដល់វិនិយោគគិន និងតួអង្គពាក់ព័ន្ធជាពិសេសបុគ្គលដែលពាក់ព័ន្ធគម្រោងវិនិយោគជាប់គាំង។
លោកបណ្ឌិតសភាចារ្យ ហ៊ាន សាហ៊ីប រដ្ឋលេខាធិការ ក្រសួងសេដ្ឋកិច្ច និង ហិរញ្ញវត្ថុ និងជាប្រធានក្រុមការងារដោះស្រាយគម្រោងវិនិយោគជាប់គាំងក្នុងខេត្តព្រះសីហនុ ធ្លាប់បានលើកឡើងថា៖ រាជរដ្ឋាភិបាលបានដាក់ចេញវិធានការជាកញ្ចប់ ដើម្បីដោះស្រាយគម្រោងវិនិយោគជាប់គាំង ក្នុងខេត្តព្រះសីហនុ ក្នុងខែមីនា ឆ្នាំ២០២៣ និងបានធ្វើការផ្សព្វផ្សាយនូវវិធានការរាជរដ្ឋាភិបាលទៅដល់តួអង្គសំខាន់ៗ និង អ្នកពាក់ព័ន្ធនានា ទាំងរដ្ឋ និងឯកជន ដើម្បីជំរុញការអនុវត្ត និងជំរុញសកម្មភាព និង សម្ទុះសេដ្ឋកិច្ចក្នុងខេត្ត ទាំងក្នុងរយៈពេលខ្លី មធ្យម និងវែង។
រាជរដ្ឋាភិបាល បានដាក់ចេញវិធានការជាកញ្ចប់ ដើម្បីដោះស្រាយគម្រោងវិនិយោគជាប់គាំង ដោយផ្អែកតាមគោលការណ៍ចំនួន ២ ដោយទី១៖ ឲ្យអគារដែលសាងសង់មិនទាន់ចប់ អាចសាងសង់ឱ្យចប់ និងទី២៖ ឲ្យអគារដែលបានសាងសង់ចប់ អាចមានសកម្មភាពវិនិយោគ ឬធុរកិច្ច។
លោកបណ្ឌិតសភាចារ្យ ហ៊ាន សាហ៊ីប ធ្លាប់បញ្ជាក់កន្លងមកថា រាជរដ្ឋាភិបាល ក្នុងនីតិកាលទី៧ នៃរដ្ឋសភា ក្រោមមគ្គទ្ទេសក៏ដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានដាក់ចេញនូវ «យុទ្ធសាស្រ្តបញ្ចកោណ-ដំណាក់កាលទី១» ដែលតាមនេះ រាជរដ្ឋាភិបាលផ្តោតអាទិភាព លើការពន្លឿនការអភិវឌ្ឍខេត្តព្រះសីហនុ ឲ្យក្លាយទៅជាតំបន់សេដ្ឋកិច្ចពិសេសគំរូពហុបំណងដែលជាប៉ូលសេដ្ឋកិច្ចដ៏សំខាន់សម្រាប់វិស័យទេសចរណ៍,មជ្ឈមណ្ឌលសេវាហិរញ្ញវត្ថុ,តំបន់ឧស្សាហកម្ម ជាដើម ដោយកំណត់យន្តការអនុវត្ត ឲ្យបានច្បាស់លាស់ និងគ្រប់ជ្រុងជ្រោយ។
ខេត្តព្រះសីហនុ គឺជាខេត្តមួយដែលរាជរដ្ឋាភិបាលផ្តោតអាទិភាពខ្ពស់ ហើយម៉្យាងជាខេត្តដែលមានអគារច្រើន មានតម្លៃជាង ១,០០០លានដុល្លារអាមេរិក ដែលត្រូវជួយដោះស្រាយ ដើម្បីជំរុញសកម្មភាព សេដ្ឋកិច្ច និងធុរកិច្ច ជាពិសេសប្រែក្លាយពីស្ថានភាពជាប់គាំងក្នុងអតីតកាល ទៅជាស្ថានភាពរស់រវើក ប្រកបដោយថាមពលក្នុងពេលបច្ចុប្បន្ន និងបន្តទៅអនាគត៕
Account
Security
Favourite Content