បរទេស ៖ យោងទៅតាមប្រភពពី SBS News បានលើកឡើងថា បច្ចេកវិទ្យា AI ដូចជា ChatGPT អាចរកចំណូលបន្ថែមរាប់ពាន់លានដុល្លារដល់សេដ្ឋកិច្ចអូស្ត្រាលីតាមរយៈការបង្កើនផលិតភាពរបស់មនុស្ស។
បន្ទាប់ពីកំណើនផលិតភាពយឺតបានគំរាមកំហែងដល់សេដ្ឋកិច្ច ការស្រាវជ្រាវផ្នែកឧស្សាហកម្មបច្ចេកវិទ្យាបានសិក្សាបន្ថែមពីការបង្កើនប្រសិទ្ធភាពនៃបញ្ញាសិប្បនិម្មិត AI។ ការស្រាវជ្រាវពីក្រុមប្រឹក្សាបច្ចេកវិទ្យានៃប្រទេសអូស្ត្រាលី និងក្រុមហ៊ុន Microsoft អះអាងថា បច្ចេកវិទ្យានេះអាចរកចំណូលបន្ថែមចំនួន ១១៥ ពាន់លានដុល្លារដល់សេដ្ឋកិច្ចអូស្ត្រាលីក្នុងមួយឆ្នាំៗក្នុងរយៈពេលប្រាំពីរឆ្នាំ ជាមួយនឹងការកើនឡើងតាមរយៈផលិតភាពខ្ពស់។ លើសពីនេះ កំណើនសេដ្ឋកិច្ចអាចកើនឡើងពី ២ ទៅ ៥ ភាគរយ អាស្រ័យលើរបៀបដែលអូស្ត្រាលីទទួលយកវាលឿនប៉ុណ្ណា។ ទន្ទឹមនឹងនេះ ការស្រាវជ្រាវពី Accenture បានរកឃើញថា តម្លៃសេដ្ឋកិច្ចដូចជា សេវាកម្ម និងផលិតផលនឹងកើនឡើង ៧០ ភាគរយដោយសារកំណើនផលិតភាព។
ប្រធានផ្នែកបច្ចេកវិទ្យារបស់ Microsoft ANZ លោក Lee Hickin បាននិយាយថា ប្រទេសអូស្ត្រាលីកំពុងសម្លឹងឃើញឱកាសសេដ្ឋកិច្ចដ៏ធំ ហើយកំពុងតាមដានក្នុងទិសដៅត្រឹមត្រូវដើម្បីចាប់យកអត្ថប្រយោជន៍របស់វា។ បណ្តាក្រុមហ៊ុនអាជីកម្មអូស្ត្រាលីកំពុងប្រញាប់ប្រញាល់បញ្ចូលបច្ចេកវិទ្យាទៅក្នុងប្រតិបត្តិការរបស់ពួកគេ ហើយរដ្ឋាភិបាលអូស្ត្រាលីកំពុងចាប់ផ្តើមការងារលើការគ្រប់គ្រងវិស័យនេះ។ ស្របពេលដែលបច្ចេកវិទ្យាបានធ្វើឱ្យមនុស្សមានសង្ឃឹមច្រើន ប៉ុន្តែវាក៏បានធ្វើឱ្យមនុស្សមានការភ័យខ្លាចក្នុងការបាត់បង់ការងារដែលនឹងអាចកែប្រែទៅស្វ័យប្រវត្តិកម្មផងដែរ។ ទោះជាយ៉ាងណាក្តី AI អាចនឹងក្លាយជាបច្ចេកវិទ្យាបន្ថែមពីលើការងារក្នុងការជួយសម្រួលពលរដ្ឋអូស្រ្តាលីជាជាងការជំនួសពួកគេ។ ដើម្បីបង្កើតឱ្យមានកំណើនផលិតភាពដែលប្រទេសត្រូវឈានទៅដល់នោះ អូស្ត្រាលីត្រូវការមនុស្សបន្ថែមដើម្បីចែកចាយចំណេះដឹងបច្ចេកវិទ្យាបន្ថែមទៀត ហើយមធ្យោបាយតែមួយគត់នោះគឺ ការផ្តល់ឱ្យពួកគេនូវឧបករណ៍ និងបច្ចេកវិទ្យា AI សម្រាប់ប្រតិបត្តិការកម្រិតខ្ពស់។
មិនត្រឹមតែប៉ុណ្ណោះ ដោយសារតែសមត្ថភាពរបស់វាក្នុងការធ្វើឱ្យប្រតិបត្តិការធម្មតាទៅជាស្វ័យប្រវត្តិកម្ម និងជាជំនួយសម្រាប់ការងារស្មុគស្មាញ បច្ចេកវិទ្យាអាចជួយឱ្យមនុស្សខិតខំប្រឹងប្រែងតិចប៉ុណ្ណោះ ប៉ុន្តែពួកគេអាចបង្កើនផលិតភាពបានដោយធ្វើការបានច្រើនជាងមុន។ នៅក្នុងការអភិវឌ្ឍន៍ផ្នែក software ឧបករណ៍ដែលដំណើរការដោយ AI កម្រិតខ្ពស់អាចណែនាំវិធីថ្មីទាំងស្រុងដើម្បីដោះស្រាយបញ្ហា និងបង្កើនល្បឿនដំណើរការ។ នាពេលបច្ចុប្បន្ននេះ បច្ចេកវិទ្យាមានសក្តានុពលក្នុងការធ្វើស្វ័យប្រវត្តិកម្ម និងបង្កើនម៉ោងការងារដល់ពលរដ្ឋអូស្ត្រាលីចំនួន ៤៤ ភាគរយ ដោយពួកគេមានពេលសម្រាប់ការងារដែលមានតម្លៃខ្ពស់ និងបង្កើនគុណភាពការងាររបស់ពួកគេផងដែរ។ យោងតាមប្រភពដដែល បានលើកឡើងថា អូស្ត្រាលីមានទីតាំងល្អក្នុងការក្លាយជាអ្នកទទួលយកបច្ចេកវិទ្យាដំបូងដោយផ្អែកលើល្បឿនដែលវាចាប់យកឱកាសសម្រាប់ cloud computing និងបច្ចេកវិទ្យាផ្សេងទៀត ខណៈដែលប្រទេសនេះមានកម្លាំងពលកម្មផ្នែកបច្ចេកវិទ្យាខ្លាំង និងរីកចម្រើនផងដែរ។ ដូច្នោះហើយ អូស្ត្រាលីចាំបាច់ត្រូវធ្វើសកម្មភាពយ៉ាងឆាប់រហ័ស ដើម្បីចាប់យកឱកាសដ៏ធំមួយនេះ ដែលមិនត្រឹមតែធ្វើឲ្យអូស្ត្រាលីមានការជឿនលឿនផ្នែកបច្ចេកវិទ្យាប៉ុណ្ណោះទេ ប៉ុន្តែក៏បានធ្វើឲ្យប្រទេសនេះក្លាយជាអ្នកដឹកនាំខ្លាំងមួយនៅលើឆាកអន្តរជាតិផងដែរ៕