បរទេស ៖ យោងទៅតាមប្រភពព័ត៌មានពី Business Insider បានរាយការណ៍ថា និន្នាការ AI បានធ្វើឲ្យមនុស្សមិនសូវចាប់អារម្មណ៍រឿងអាមេរិកកំពុងប្រឈមមុខនឹងវិបត្តិសេដ្ឋកិច្ចនាពេលបច្ចុប្បន្ននេះ។ ទន្ទឹមនឹងនេះដែរ ទាំងពិភពជំនួញ​ និង​ហិរញ្ញវត្ថុសប្បាយចិត្តជាមួយនឹងវត្តមាននៃ ChatGPT របស់ OpenAI ហើយវាបានជំរុញឱ្យភាគហ៊ុនកើនឡើងយ៉ាងខ្លាំងនៅក្នុងវិស័យបច្ចេកវិទ្យា ដែលធ្វើឱ្យទ្រព្យសម្បត្តិរបស់នាយកប្រតិបត្តិក្រុមហ៊ុនបច្ចេកវិទ្យាទាំងនោះកើនឡើងផងដែរ។

យ៉ាងណាក៏ដោយ នៅក្រោយពីរឿងវិជ្ជមានផ្នែកបច្ចេកវិទ្យាខាងលើនេះ សេដ្ឋកិច្ចអាមេរិកកំពុងប្រឈមមុខនឹងភាពមិនច្បាស់លាស់មួយចំនួន ដែលផ្ទុយស្រឡះពីការកើនឡើងនៃទីផ្សារភាគហ៊ុន។ នេះ​ជា​ហានិភ័យ​សេដ្ឋកិច្ច​សំខាន់ៗ​មួយ​ចំនួន​ដែលអាមេរិកកំពុង​ប្រឈម​មុខ ខណៈដែលនិន្នាការបច្ចេកវិទ្យា AI កំពុងមានប្រជាប្រិយភាព។

ក្នុងរយៈពេល ១៥ ខែកន្លងមកនេះ ធនាគារកណ្តាលអាមេរិកបានដំឡើងអត្រាការប្រាក់ដែលជាការកើនឡើងខ្លាំងបំផុតក្នុងរយៈពេល៤ទសវត្សរ៍ ដើម្បីទប់ទល់នឹងអតិផរណាខ្ពស់។ ស្របពេលដែលធនាគារកណ្តាល Fed បានទទួលជោគជ័យក្នុងការបន្ទាបអតិផរណា និងការឡើងថ្លៃតម្លៃទំនិញប្រើប្រាស់បានធ្លាក់ចុះកម្រិតខ្ពស់បំផុតកាលពីឆ្នាំមុន ៩,១ ភាគរយមកនៅត្រឹម ៤ ភាគរយក៏ដោយ ប៉ុន្តែអត្រាការប្រាក់នៅតែមិនទាន់ធូរស្រាលនៅឡើយ។ បញ្ហានេះអាចធ្វើឱ្យហានិភ័យនៃការធ្លាក់ចុះសេដ្ឋកិច្ចកាន់តែធ្ងន់ធ្ងរ ដោយសារការខ្ចីប្រាក់ក្នុងអត្រាខ្ពស់បានធ្វើឱ្យប៉ះពាល់ដល់វិស័យធនាគារ និងទីផ្សារអចលនទ្រព្យ។ លើសពីនេះ វិនិយោគិនមួយចំនួនមានការព្រួយបារម្ភថា ភាគហ៊ុនរបស់អាមេរិកនឹងអាចក្លាយជាអ្នករងគ្រោះបន្ទាប់ប្រសិនបើធនាគារកណ្តាល Fed បន្តរឹតបន្តឹងគោលនយោបាយ។

អ្នក​វិភាគ​ទីផ្សារ​ជាន់​ខ្ពស់​របស់ OANDA លោក Kelvin Wong បាននិយាយ​ថា ប្រសិនបើអត្រាការប្រាក់ខ្ពស់នៅយូរជាងនេះទៀត គួបផ្សំនឹងវិបត្តិសេដ្ឋកិច្ចសកលដែលនឹងកើតឡើង នោះអាចធ្ចើឲ្យប្រាក់ចំណេញរបស់ក្រុមហ៊ុនធ្លាក់ចុះ។ ស្ថានភាពបែបនេះនឹងកាត់បន្ថយការចំណាយរបស់ក្រុមហ៊ុន និងការកើនឡើងតម្រូវការនៃផ្នែកបច្ចេកវិទ្យា។

មិនត្រឹមតែប៉ុណ្ណោះ វិបត្តិអចលនទ្រព្យអាចនឹងកើតឡើងនៅសហរដ្ឋអាមេរិក ដោយទ្រព្យសម្បត្តិរាប់សិបពាន់លានដុល្លារកំពុងគាំងស្ទះ ខណៈដែលអត្រាការប្រាក់ខ្ពស់បានទាក់ទាញអ្នកខ្ចី។ ម្ចាស់អចលនទ្រព្យអាមេរិកបានជួបការលំបាកតាំងពីឆ្នាំមុនមកម្ល៉េះ ដោយសារការកើនឡើងអត្រាការប្រាក់ខ្ពស់ខ្លាំង។ ទន្ទឹមនឹងនេះ ការរឹតបន្តឹងលក្ខខណ្ឌឥណទាន កំពុងបន្ថែមសម្ពាធលើវិស័យនេះ ដោយវាបានបង្កឱ្យមានការព្រួយបារម្ភយ៉ាងខ្លាំងបន្ទាប់ពីមានភាពវឹកវរក្នុងវិស័យធនាគារក្នុងរយៈពេលប៉ុន្មានខែថ្មីៗនេះ។ លើសពីនេះផងដែរ កំណើនយឺតនៃសេដ្ឋកិច្ចចិន ក៏ជាហានិភ័យខាងក្រៅរបស់អាមេរិកផងដែរ។ បើទោះបីជាប្រទេសពីរនេះជាដៃគូប្រកួតប្រជែងក៏ដោយ ប៉ុន្តែពួកគេក៏ជាដៃគូពាណិជ្ជកម្មដែលមិនអាចខ្វះគ្នាបានផងដែរ។ បន្ទាប់ពីចិនបើកដំណើរការសេដ្ឋកិច្ចឡើងវិញនៅឆ្នាំនេះក្រោយពីការបិទប្រទេសក្រោមគោលនយោបាយគ្មានកូវីដ-១៩ ជាច្រើនឆ្នាំមក អ្នកសេដ្ឋកិច្ចសង្ឃឹមថាសេដ្ឋកិច្ចអាស៊ីនឹងជួបប្រទះនឹងការស្ទុះងើបឡើងវិញដ៏រឹងមាំ ប៉ុន្តែវានៅឆ្ងាយពីអ្វីដែលរំពឺងទុក។ សេដ្ឋកិច្ចរបស់ប្រទេសចិនមានបញ្ហាច្រើនជាងអ្វីដែលគេគិតដូចជា ការយឺតយ៉ាវនៃពាណិជ្ជកម្ម តួលេខផលិតកម្មឧស្សាហកម្មខ្សោយ និងបំណុលកើនឡើងជាដើម៕