ភ្នំពេញ ៖ កម្ពុជា បានដើរតួនាទីយ៉ាងសំខាន់ក្នុងនាមជាខ្សែសង្វាក់ផ្គត់ផ្គង់ក្នុងទីផ្សារតំបន់ ដែលកំពុងលេចធ្លោដ៏សំខាន់មួយក្នុងការតភ្ជាប់អាស៊ីអាគ្នេយ៍ជាមួយអឺរ៉ុប ខណៈអាជីវកម្ម អឺរ៉ុបកំពុងចាប់អារម្មណ៍ស្វែងយល់ពីឱកាសបន្ថែមនៅក្នុងប្រទេសនេះ។

តាមរយៈសេចក្តីប្រកាសព័ត៌មានរបស់ក្រុមប្រឹក្សាធុរកិច្ចសភាពអឺរ៉ុប-អាស៊ាន បានឱ្យដឹងថា ចាប់ពីថ្ងៃទី ៤ ដល់ទី ៥ មីនា ឆ្នាំ២០២៦ ក្រុមប្រឹក្សាធុរកិច្ចសភាពអឺរ៉ុប-អាស៊ាន (EU-ABC) នឹងដឹកនាំគណៈប្រតិភូអាជីវកម្មអឺរ៉ុបមកកាន់រាជធានីភ្នំពេញ ក្នុងគោលបំណងធ្វើទស្សនកិច្ច និងជួបពិភាក្សាជាមួ​យ​សមាជិកនៃថ្នាក់ដឹកនាំសេដ្ឋកិច្ចកម្ពុជាសំខាន់ៗ រួមមាន ឯកឧត្តម ឧបនាយករដ្ឋមន្ត្រី ស៊ុន ចាន់ថុល និងលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម ។ ជាមួយគ្នានេះផងដែរ ប្រតិភូគ្រប់គ្រង​ជាន់ខ្ពស់ជាង ៣០ រូប ដែលតំណាងឱ្យក្រុមហ៊ុន អឺរ៉ុបជាង ១៥ក្រុមហ៊ុនផ្សេងៗគ្នា ដែលរកស៊ីក្នុងវិស័យដឹកជញ្ជូន ផលិតផលប្រើប្រាស់ ហិរញ្ញវត្ថុ និងអាកាសចរណ៍ ក៏នឹងមកកាន់ប្រទេស​កម្ពុជាផងដែរ។

នៅក្នុងសេចក្ដីប្រកាសដដែលបានបញ្ជាក់ថា លោក នូអែល ក្លេហេន (Noel Clehane) អនុប្រធានក្រុមប្រឹក្សាធុរកិច្ចសភាពអឺរ៉ុប-អាស៊ាន (EU-ABC) នឹងដឹកនាំគណៈប្រតិភូចូលរួមកិច្ចពិភាក្សាផ្តោតលើភាពរីកចម្រើនរបស់កម្ពុជា ជាពិសេស បង្ហាញពីតួនាទីដ៏សំខាន់កាន់ និងកាន់តែខ្លាំងឡើងរបស់ប្រទេសកម្ពុជា សម្រាប់អាជីវកម្មអឺរ៉ុប និងឱកាសលើកកម្ពស់​កិច្ចសហប្រតិបត្តិការផ្នែកសេដ្ឋកិច្ច អឺរ៉ុប-កម្ពុជា ក៏ដូចជាអឺរ៉ុប និងអាស៊ានទាំងមូល។

លោក គ្រីស ហាំព្រី (Chris Humphrey) អគ្គនាយក ក្រុមប្រឹក្សាធុរកិច្ចសភាពអឺរ៉ុប-អាស៊ាន EU-ABC បានបញ្ជាក់នៅក្នុងសេចក្តីប្រកាសព័ត៌មានថា ៖

«ទស្សនកិច្ចនេះកើតឡើងនៅក្នុងកាលៈទេសៈដ៏សំខាន់មួយសម្រាប់ទំនាក់ទំនងពាណិជ្ជកម្មអឺរ៉ុប-អាស៊ាន ខណៈ​ពេលដែលភាគីទាំងពីរកំពុងពង្រឹងភាពជាដៃគូរយៈពេលវែង ក្នុងបរិបទភាពមិនច្បាស់លាស់​នៃពាណិជ្ជកម្មសកល ក៏ដូចជាសេដ្ឋកិច្ចពិភពលោកដែលកំពុងផ្លាស់ប្តូរ»។

លោកបន្ថែមថា៖ កម្ពុជាធ្វើបានយ៉ាងជោគជ័យគួរឱ្យកត់សម្គាល់ចាប់តាំងពីដំណើរទស្សនកិច្ចចុងក្រោយរបស់ EU-ABC កាលពីឆ្នាំ២០២៣ ហើយជឿថា កម្ពុជានឹងបន្តតួនាទីដ៏សំខាន់នេះក្នុងការរៀបចំ និងរឹតបន្តឹងទំនាក់ទំនងសេដ្ឋកិច្ច រវាងអឺរ៉ុប និងអាស៊ីអាគ្នេយ៍។

ក្រុមប្រឹក្សាពាណិជ្ជកម្មអឺរ៉ុប-អាស៊ាន (EU-ABC) ជាស្ថាប័នដ៏សំខាន់ក្នុងការលើកកម្ពស់គោលនយោបាយដែលផ្តោតលើពាណិជ្ជកម្ម អឺរ៉ុប អាស៊ាន និងត្រូវបានទទួលស្គាល់ជាផ្លូវការដោយលេខា​ធិការដ្ឋានអាស៊ាន រួមទាំងគណៈកម្មាធិការអឺរ៉ុបផងដែរ។ ក្រុមប្រឹក្សានេះក្លាយជាតំណាងសំខាន់សម្រាប់សហគ្រាស​អឺរ៉ុប ដែលប្រតិបត្តិការនៅក្នុងតំបន់អាស៊ាន។ EU-ABC ធ្វើការជិតស្និទ្ធជាមួយរដ្ឋាភិបាល និងអ្នកសម្រេចចិត្ត ដើម្បីរួមចំណែករៀបចំគោលនយោបាយ បង្កើនកំណែរទម្រង់ច្បាប់ និងបង្កើតបរិយាកាសឲ្យសមស្របសម្រាប់អាជីវកម្មអឺរ៉ុបឱ្យរីកចម្រើន។

សូមបញ្ជាក់ដែរថា ៖ សហភាពអឺរ៉ុបដែលជាដៃគូពាណិជ្ជកម្មធំជាងគេមួយរបស់កម្ពុជា មានទំហំពាណិជ្ជកម្មទ្វេភាគីប្រមាណ ៥ ៣៧៦លានដុល្លារក្នុងរយៈពេល ១១ខែនៃឆ្នាំ​២០២៥កន្លងទៅនេះ​។ ដោយឡែក ចំពោះទំនិញសំខាន់ៗដែលកម្ពុជា បាននាំចេញច្រើនជាងគេ រួមមាន សម្លៀកបំពាក់ និងគ្រឿងបន្ទាប់បន្សំដែលធ្វើឡើងពីក្រណាត់ ផ្លែឈើ និងគ្រាប់ធញ្ញជាតិ ដែលអាចបរិភោគបាន គ្រឿងម៉ាស៊ីន និងឧបករណ៍អគ្គិសនី ស្បែកជើង កៅស៊ូ និងផលិតផលធ្វើអំពីកៅស៊ូ ព្រមទាំងទំនិញផ្សេងទៀតទៅកាន់សហភាពអឺរ៉ុបក្រោមគម្រោង EBA៕