បរទេស៖ ​យោងតាមរបាយការណ៍ពីមូលនិធិរូបិយវត្ថុអន្តរជាតិ (IMF) បានព្យាករណ៍ថា សេដ្ឋកិច្ចកម្ពុជាសម្រាប់ឆ្នាំ២០២៥​ នឹង​បន្ត​ស្ទុះ​ងើប​ឡើង​ បើ​ទោះ​បី​ជា​មាន​ល្បឿន​តិចតួច​ក៏​ដោយ។

ក្រុមប្រឹក្សាប្រតិបត្តិរបស់មូលនិធិរូបិយវត្ថុអន្តរជាតិ (IMF) បានបញ្ចប់ការវាយតម្លៃលើការពិគ្រោះគ្នារវាងក្រុមការងារបេសកកម្ម Article IV របស់ (IMF) ជាមួយនឹងកម្ពុជា។ ផ្អែកទៅលើការវាយតម្លៃទាំងនោះ ក្រុមប្រឹក្សាប្រតិបត្តិរបស់មូលនិធិរូបិយវត្ថុអន្តរជាតិ (IMF)  បានព្យាករណ៍ថា សេដ្ឋកិច្ច​កម្ពុជា​នឹងបន្ត​ស្ទុះ​ងើប​ឡើង​វិញបើ​ទោះ​បី​ជា​មាន​ល្បឿន​តិចតួច​ក៏​ដោយ ជាមួយនឹងផលិតផលក្នុងស្រុកសរុបពិត (Real GDP) នឹងកើនឡើងពី ៥,៥ ភាគរយនៅឆ្នាំ២០២៤ ដល់ ៥,៨ ភាគរយនៅឆ្នាំ ២០២៥។

IMF បានព្យាករណ៍ថា ការងើបឡើងវិញនៃវិស័យនីមួយៗនៅកម្ពុជាមានភាពមិនស្មើគ្នា។ កំណើនផលិតផលក្នុងស្រុកសរុបពិត (Real GDP) ត្រូវបានជំរុញជាចម្បងដោយតម្រូវការខាងក្រៅ ជាមួយនឹងការកើនឡើងយ៉ាងខ្លាំងនៃការនាំចេញសម្លៀកបំពាក់ និងការនាំចេញកសិផល។ យ៉ាងណាមិញ ប្រាក់ចំណូលនៅក្នុងវិស័យទេសចរណ៍អាចស្ទុះងើបឡើងវិញយឺត ដោយសារការផ្លាស់ប្តូររចនាសម្ព័ន្ធនៅក្នុងវិស័យនេះ។ មិនត្រឹមតែប៉ុណ្ណោះ កំណើននៅក្នុងវិស័យមិនមែនពាណិជ្ជកម្មនៅតែខ្សោយ (វិស័យដែលមិនមែនពាណិជ្ជកម្ម គឺជាឧស្សាហកម្មដែលផលិតទំនិញ និងសេវាកម្មដែលមិនត្រូវបានជួញដូរជាលក្ខណៈអន្តរជាតិរួមមាន៖ សំណង់ សេវាសាធារណៈ និងការថែទាំសុខភាព)។ វិស័យសំណង់ និងអចលនវត្ថុត្រូវបានមើលឃើញថា បន្តធ្លាក់ចុះ ជាមួយនឹងការកើនឡើងនៃប្រាក់កម្ចីមិនដំណើរការ និងការកើនឡើងនៃនៃបំណុលរបស់វិស័យឯកជន។

ទន្ទឹមនឹងនេះ ក្រុមប្រឹក្សាប្រតិបត្តិនៃមូលនិធិរូបិយវត្ថុអន្តរជាតិ (IMF) បានបង្ហាញពីការអបអរសាទរចំពោះការបន្តស្ទុះងើបឡើងវិញនៃសេដ្ឋកិច្ចកម្ពុជា ដែលត្រូវបានជំរុញដោយកំណើនដ៏រឹងមាំក្នុងវិស័យកាត់ដេរ និងការនាំចេញកសិកម្ម និងការកែលម្អសកម្មភាពទេសចរណ៍។ កំណើនត្រូវបានព្យារកណ៍ថា នឹងបន្តកើនឡើង ប៉ុន្តែការស្ទុះងើបឡើងវិញនៃវិស័យមួយចំនួនមានភាពមិនស្មើគ្នា។ ក្រុមប្រឹក្សាប្រតិបត្តិ IMF បានគូសបញ្ជាក់អំពីសារៈសំខាន់នៃគោលនយោបាយដើម្បីការពារស្ថិរភាពហិរញ្ញវត្ថុម៉ាក្រូ, ធានានូវការងើបឡើងវិញយូរអង្វែង និងមានលក្ខណៈរួមបញ្ចូល និងសម្រេចបាននូវគោលដៅអភិវឌ្ឍន៍របស់អាជ្ញាធរក្នុងរយៈពេលមធ្យម។ មិនត្រឹមតែប៉ុណ្ណោះ ក្រុមប្រឹក្សាប្រតិបត្តិ IMF បានគាំទ្រគោលជំហរសារពើពន្ធអព្យាក្រឹតក្នុងរយៈពេលខ្លី ហើយបានគូសបញ្ជាក់ពីសារៈសំខាន់នៃការបង្រួបបង្រួមបន្តិចម្តងៗ និងគុណភាពខ្ពស់ក្នុងរយៈពេលមធ្យម ដែលគាំទ្រដោយក្របខណ្ឌសារពើពន្ធត្រឹមត្រូវ ដើម្បីរក្សានិរន្តរភាពបំណុល និងពង្រឹងភាពធន់នឹងសេដ្ឋកិច្ច។

ក្រុមប្រឹក្សាប្រតិបត្តិ IMF បានអបអរចំពោះកិច្ចខិតខំប្រឹងប្រែងដើម្បីជំរុញការអភិវឌ្ឍន៍ទីផ្សារមូលបត្របំណុលរបស់រដ្ឋាភិបាលក្នុងស្រុក ដោយសារលទ្ធភាពទទួលបានហិរញ្ញប្បទានពីបរទេសរបស់កម្ពុជានឹងកាត់បន្ថយនៅពេលដែលខ្លួនលែងមា​នឋានៈ និងស្ថានភាពជាប្រទេសមានការអភិវឌ្ឍន៍តិចតួច។ ដូច្នោះហើយ ពួកគេក៏បានសង្កត់ធ្ងន់ផងដែរអំពីតម្រូវការគ្រប់គ្រងនៃហានិភ័យសារពើពន្ធប្រកបដោយប្រសិទ្ធភាពពីសហគ្រាសគ្រប់គ្រងដោយរដ្ឋ និងភាពជាដៃគូសាធារណៈឯកជន។​ មិនត្រឹមតែប៉ុណ្ណោះ ក្រុមប្រឹក្សាប្រតិបត្តិ IMF គាំទ្រដល់ការធ្វើឱ្យគោលនយោបាយរូបិយវត្ថុមានលក្ខណៈធម្មតាបន្តិចម្តងៗ ខណៈពេលដែលរក្សាបាននូវសាច់ប្រាក់ងាយស្រួលនៃប្រព័ន្ធហិរញ្ញវត្ថុពេញលេញ។ ពួកគេបានលើកទឹកចិត្តឱ្យកម្ពុជាបន្តកិច្ចខិតខំប្រឹងប្រែងធ្វើបច្ចុប្បន្នភាពក្របខ័ណ្ឌគោលនយោបាយរូបិយវត្ថុ ដើម្បីកែលម្អគោលនយោបាយ និងគាំទ្រការចៀសឆ្ងាយពីប្រាក់ដុល្លារ។ IMF កត់សម្គាល់ថា វិស័យសំណង់ និងអចលនទ្រព្យចាំបាច់ត្រូវការកែលម្អបន្ថែមទៀត និងលើកទឹកចិត្តឱ្យបង្កើតផែនការដ៏ទូលំទូលាយមួយដើម្បីការពារស្ថិរភាពហិរញ្ញវត្ថុ។ ពួកគេបានផ្តល់យោបល់ឱ្យពង្រឹងការត្រួតពិនិត្យផ្អែកលើហានិភ័យ, ការកែលម្អគោលនយោបាយ, បង្កើនការសម្របសម្រួលក្នុងចំណោមភ្នាក់ងារត្រួតពិនិត្យផ្នែកហិរញ្ញវត្ថុ, និងពង្រឹងការត្រួតពិនិត្យវិស័យអចលនទ្រព្យ។

ក្រុមប្រឹក្សាប្រតិបត្តិ IMF ក៏បានលើកឡើងពីសារៈសំខាន់នៃកំណែទម្រង់រចនាសម្ព័ន្ធផងដែរ ដើម្បីលើកកម្ពស់ការធ្វើពិពិធកម្មសេដ្ឋកិច្ច និងលើកកម្ពស់ការប្រកួតប្រជែង។ ពួកគេបានលើកទឹកចិត្តដល់កិច្ចខិតខំប្រឹងប្រែងរបស់អាជ្ញាធរក្នុងការលើកកម្ពស់ធនធានមនុស្ស​​, វិនិយោគលើហេដ្ឋារចនាសម្ព័ន្ធ, ពង្រឹងបរិយាកាសធុរកិច្ច, ដោះស្រាយភាពងាយរងគ្រោះនៃអាកាសធាតុ, និងលើកកម្ពស់ថាមពលកកើតឡើងវិញ ដើម្បីទាក់ទាញការវិនិយោគពីបរទេស (FDI) ចម្រុះឲ្យបានកាន់តែច្រើន៕