សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពីរ៉យទ័រ បានរាយការណ៍ថា Baidu ដែលជាក្រុមហ៊ុនអ៊ីនធឺណិតដ៏ធំមួយរបស់ចិនបានឈានដល់កិច្ចព្រមព្រៀងជាមួយ Tesla ដើម្បីផ្តល់សិទ្ធិឱ្យក្រុមហ៊ុនរថយន្តអគ្គិសនីមួយនេះកាន់អាជ្ញាប័ណ្ណផែនទីផ្លូវសាធារណៈរបស់ប្រទេសចិន។
ក្រុមហ៊ុន Tesla កំពុងចាប់ដៃគូជាមួយក្រុមហ៊ុន Baidu ក្នុងគោលបំណងដាក់ឱ្យដំណើរការនូវសមត្ថភាពរថយន្តបើកបរដោយខ្លួនឯងស្វ័យប្រវត្តិ FSD (Full Self-Driving) នៅក្នុងប្រទេសចិន។ ក្រុមហ៊ុនផលិតរថយន្តអគ្គិសនីរបស់សហរដ្ឋអាមេរិកមួយនេះគ្រោងនឹងលុបបំបាត់ឧបសគ្គដ៏សំខាន់មួយ ដើម្បីបើកដំណើរការមុខងារជំនួយការបើកបរកម្រិតខ្ពស់នៅក្នុងប្រទេសចិន ដោយចាប់ដៃគូជាមួយក្រុមហ៊ុន Baidu លើមុខងារផែនទីនៃគន្លងផ្លូវ។ កាលពីពេលថ្មីៗនេះ កិច្ចព្រមព្រៀងនេះត្រូវបានសម្រេចឡើងនៅពេលដែលលោក Elon Musk នាយកប្រតិបត្តិក្រុមហ៊ុន Tesla ធ្វើដំណើរទស្សនកិច្ចទៅកាន់ប្រទេសចិន និងបានជួបជាមួយនាយករដ្ឋមន្ត្រី Li Qiang ។ កិច្ចព្រមព្រៀងនេះនឹងផ្តល់ប្រព័ន្ធជំនួយដល់អ្នកប្រើប្រាស់បើកបរដោយខ្លួនឯងស្វ័យប្រវត្តិរបស់ Tesla នៅក្នុងប្រទេសចិន ហើយនៅផ្នែកមួយនៃកិច្ចព្រមព្រៀងនេះ ក្រុមហ៊ុន Baidu ក៏នឹងផ្តល់ប្រព័ន្ធបង្ហាញគន្លងផ្លូវរបស់ខ្លួនដល់ក្រុមហ៊ុន Tesla ផងដែរ។ ក្នុងអំឡុងពេលកិច្ចប្រជុំជាមួយមន្ត្រីចិន Elon Musk ស្នើរសុំការយល់ព្រមពីចិនសម្រាប់ការផ្ទេរទិន្នន័យទៅក្រៅប្រទេស និងការដាក់ឱ្យដំណើរការកម្មវិធី FSD នៅក្នុងប្រទេសចិន។
នៅក្នុងប្រទេសចិន ប្រព័ន្ធបើកបរឆ្លាតវៃទាំងអស់ចាំបាច់ត្រូវមានវិញ្ញាបនប័ត្រផែនទីមុនពេលពួកគេអាចដំណើរការនៅលើផ្លូវសាធារណៈបាន។ ដូច្នោះហើយ ក្រុមហ៊ុនបរទេសត្រូវចាប់ដៃគូជាមួយក្រុមហ៊ុនក្នុងស្រុកដែលមានអាជ្ញាប័ណ្ណនេះ ហើយ Baidu ស្ថិតក្នុងចំណោមក្រុមហ៊ុនរាប់សិបដែលមានវា។ ជាមួយនឹងអាជ្ញាប័ណ្ណផែនទី Tesla នឹងត្រូវបានអនុញ្ញាតឱ្យដំណើរការកម្មវិធី FSD របស់ខ្លួនស្របច្បាប់នៅលើផ្លូវរបស់ប្រទេសចិន ហើយរថយន្តអាចប្រមូលទិន្នន័យអំពីជុំវិញខ្លួនវាដូចជា ប្លង់ផ្លូវ ផ្លាកសញ្ញាចរាចរណ៍ និងអគារនៅក្បែរនោះ។ យ៉ាងណាមិញ គេមិនច្បាស់នោះទេថា តើទិន្នន័យដែលប្រមូលបាននឹងក្លាយជាកម្មសិទ្ធិរបស់ក្រុមហ៊ុន Tesla ឬ Baidu?
គួរឲ្យបញ្ជាក់ដែរថា ភាពជាដៃគូរបស់ក្រុមហ៊ុន Baidu និង Tesla មានតាំងពីដើមឆ្នាំ២០២០ ដោយ Tesla បានប្រើប្រាស់ផែនទីគន្លងផ្លូវរបស់ Baidu រួចហើយសម្រាប់រថយន្តរបស់ខ្លួននៅក្នុងប្រទេសចិន។ កាលពីថ្ងៃទី ២០ ខែមេសា ឆ្នាំ២០២៤ ក្រុមហ៊ុន Baidu បានធ្វើសន្និសីទសារព័ត៌មានមួយដោយប្រកាសពីកិច្ចសហប្រតិបត្តិការជាមួយក្រុមហ៊ុនជាច្រើន រួមទាំងក្រុមហ៊ុន Tesla ទោះបីជាមុខងារ FSD មិនត្រូវបានលើកឡើងជាពិសេសក៏ដោយ៕
Account
Security
Favourite Content