សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ក្រុមហ៊ុនបច្ចេកវិទ្យាខ្នាតយក្សរបស់អាម៉េរិក Amazon បានសម្រេចច្រានចោលពាក្យដាក់ស្នើសុំធ្វើការងារជាង ១ ៨០០ នាក់ ដែលសង្ស័យថាជាភ្នាក់ងារមកពីកូរ៉េខាងជើង នេះបើយោងតាមសេចក្ដីរាយការណ៍ពី BBC។
ប្រធានសន្តិសុខបច្ចេកវិទ្យារបស់ក្រុមហ៊ុន Amazon លោក Stephen Schmidt បានលើកឡើងថា ពលរដ្ឋមកពីកូរ៉េខាងជើង បានព្យាយាមដាក់ពាក្យសុំធ្វើការងារពីចម្ងាយផ្នែកព័ត៌មានវិទ្យា (IT) ដោយប្រើអត្តសញ្ញាណលួចពីគេ ឬក្លែងក្លាយ។ លោក Schmidt បានបង្ហោះនៅក្នុង LinkedIn ថា គោលបំណងរបស់ពួកគេជាធម្មតាគឺចង់ទទួលបានការងារធ្វើ និងទទួលបានប្រាក់ឈ្នួល ដើម្បីផ្តល់មូលនិធិទៅដល់កម្មវិធីសព្វាវុធរបស់ប្រទេសខ្លួន ហើយនិន្នាការនេះទំនងជាកំពុងកើតឡើងនៅទូទាំងឧស្សាហកម្ម ជាពិសេសនៅក្នុងអាម៉េរិក។ អាជ្ញាធរទាំងនៅអាម៉េរិក និងកូរ៉េខាងត្បូង ធ្លាប់បានព្រមានអំពីប្រតិបត្តិការបោកប្រាស់តាមអ៊ីនធឺណិតរបស់ទីក្រុងព្យុងយ៉ាងផងដែរ។
កាលពីឆ្នាំ២០២៤ ក្រុមហ៊ុន Amazon បានកត់សម្គាល់ឃើញពីការកើនឡើង ១ ភាគ ៣ នៃពាក្យស្នើសុំធ្វើការងារមកពីកូរ៉េខាងជើង។ ជាធម្មតា ប្រតិបត្តិករ ធ្វើការជាមួយមនុស្សដែលគ្រប់គ្រង “laptop farm” មានន័យថា កម្មវិធី ឬ ប្រព័ន្ធនៅក្នុងកុំព្យូទ័រមានមូលដ្ឋាននៅអាម៉េរិក ប៉ុន្តែដំណើរការចម្ងាយមកពីខាងក្រៅប្រទេស។ ក្នុងន័យនេះ ដើម្បីពិនិត្យផ្ទៀងផ្ទាត់លើពាក្យសុំការងារទាំងនោះ Amazon បានប្រើប្រាស់ការរួមបញ្ចូលគ្នារវាងបច្ចេកវិទ្យាឆ្លាតវៃសិប្បនិម្មិត (AI) និងការផ្ទៀងផ្ទាត់ដោយបុគ្គលិករបស់ខ្លួន ដើម្បីចៀសវាងប៉ះអ្នកបោកប្រាស់ ប៉ុន្តែវិធីសាស្រ្តនេះកាន់តែមានភាពស្មុគ្រស្មាញ។ អ្នកបោកប្រាស់ទាំងនោះនៅតែអាចលួចចូលគណនី LinkedIn ដែលគេទុកចោល ដោយប្រើព័ត៌មានសម្ងាត់លេចធ្លាយ និងក្លែងបន្លំជាបុគ្គលម្នាក់នោះ។ មិនត្រឹមតែប៉ុណ្ណោះ អ្នកក្លែងបន្លំទាំងនោះកំណត់គោលដៅ ឬ ស្វែងរកការងារផ្នែកវិស្វករកម្មវិធី ឬ software engineer និងបង្ហាញពីភាពមានវិជ្ជាជីវៈគួរឲ្យទុកចិត្ត។ ដូច្នោះហើយ លោក Schmidt បានជំរុញឲ្យក្រុមហ៊ុននានាពិនិត្យមើលឲ្យបានល្អិតល្អន់ ឬ រាយការណ៍ទៅអាជ្ញាធរ ប្រសិនបើជួបប្រទះនឹងពាក្យស្នើសុំការងារគួរឱ្យសង្ស័យ។ និយោជកគួរពិនិត្យមើលសូចនាករនៃការក្លែងបន្លំកម្មវិធីការងាររបស់កូរ៉េខាងជើង រួមមាន លេខទូរស័ព្ទមានទ្រង់ទ្រាយមិនត្រឹមត្រូវ និងប្រវត្តិនៃការអប់រំមិនត្រូវគ្នា។
សូមរំលឹកថា កាលពីខែមិថុនា កន្លងទៅនេះ រដ្ឋាភិបាលអាម៉េរិកបានរកឃើញ “laptop farm” ចំនួន ២៩ ដំណើរការខុសច្បាប់ដោយបុគ្គលិកផ្នែកព័ត៌មានវិទ្យារបស់កូរ៉េខាងជើង។ នាយកដ្ឋានយុត្តិធម៌ (DOJ) បានលើកឡើងថា ពួកគេបានលួច ឬក្លែងបន្លំអត្តសញ្ញាណរបស់ជនជាតិអាម៉េរិក ដើម្បីទទួលបានការងារធ្វើនៅអាម៉េរិក។ លើសពីនេះ គេក៏សង្ស័យថាមានមេខ្យល់ជនជាតិអាម៉េរិក ដែលបានជួយធានាការងារសម្រាប់ប្រតិបត្តិករកូរ៉េខាងជើងផងដែរ។ ដោយឡែក កាលពីខែកក្កដា មានស្ត្រីម្នាក់មកពីរដ្ឋ Arizona ត្រូវបានកាត់ទោសឱ្យជាប់គុកជាង ៨ ឆ្នាំពីបទដំណើរការ “laptop farm” ដើម្បីជួយបុគ្គលិក IT របស់កូរ៉េខាងជើងទទួលបានការងារធ្វើពីចម្ងាយនៅក្នុងក្រុមហ៊ុនអាម៉េរិកជាង ៣០០ ។ DOJ បានលើកឡើងថា ករណីខុសច្បាប់នេះធ្វើឲ្យស្ត្រីរូបនោះ និង ទីក្រុងព្យុងយ៉ាងរកប្រាក់ចំណេញបានជាង ១៧ លានដុល្លារឯណោះ៕
Account
Security
Favourite Content