ភ្នំពេញ ៖ ឈានចូលមកជិតដល់ដំណាច់ខែធ្នូ ឆ្នាំ២០២៥ ជាអំឡុងពេលដែលត្រីទឹកសាប ចាប់ផ្តើមបន្លាស់ទីចេញពីបឹងទន្លេសាប ចូលព្រែក ទន្លេបាសាក់ និងចូលបឹងទន្លេសាបវិញ ដែលឱ្យអំណោយផលសម្រាប់ប្រជានេសាទ អាចប្រមូលផលត្រីបានច្រើន និងលក់ឱ្យពលរដ្ឋទូទៅទិញយកទៅធ្វើផ្អក ប្រហុក ឆ្អើរ ទុក សម្រាប់ទទួលទាននៅរដូវក្រោយៗទៀត។

ជាការប្រកាសឱ្យបានកាន់តែទូលាយ រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ ចេញសេចក្ដីជូនដំណឹងថា ចាប់ពីថ្ងៃទី២៥ ដល់ថ្ងៃទី៣១ ខែធ្នូ ឆ្នាំ២០២៥ ក្នុងករណីមេឃស្រឡះល្អ គ្មានភ្លៀងកក់ខែ ឬមិនទទួលរងឥទ្ធិពលព្យុះភ្លៀង ត្រីចាប់ផ្តើមបន្លាស់ទីចេញពីបឹងទន្លេសាប បឹង ស្ទឹង និងព្រែកនានា ចូលទន្លេសាប ទន្លេមេគង្គ និងទន្លេបាសាក់ ដែលអំណោយផលដល់ការធ្វើនេសាទបានត្រីច្រើន ជាពិសេសគន្លងដាយត្រីតាមដងទន្លេសាប ស្ថិតនៅក្នុងភូមិសាស្ត្រខេត្តកណ្តាល និងរាជធានីភ្នំពេញ។

នៅក្នុងអំឡុងពេលនេះ ត្រីចាប់ផ្តើមត្រូវបណ្តើរៗហើយ ដោយរដ្ឋបាលជលផល សូមជូនដំណឹងដល់បងប្អូនប្រជាពលរដ្ឋដែលមានបំណងធ្វើប្រហុក ផ្អក ត្រីឆ្អើរ ឬទឹកត្រី សូមរួសរាន់អញ្ជើញមកទិញត្រី តាមពេលវេលា និងទីកន្លែងដូចមានក្នុងសេចក្តីជូនដំណឹង។

ឯកឧត្តម ប្រាក់ ដាវីដ រដ្ឋលេខាធិកាក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា ក្នុងរយៈពេល ៣ ឆ្នាំចុងក្រោយនេះ ផលនេសាទមានការកើនឡើងគួរឱ្យកត់សម្គាល់ ហើយការរឹតបន្តឹងលើការអនុវត្តច្បាប់ និងការបង្ក្រាបបទល្មើសនេសាទ គឺពិតជាបានចូលរួមចំណែកយ៉ាងសំខាន់ក្នុងកំណើនផលនេសាទនេះ។

ប្រសិទ្ធភាពនៃការអនុវត្តច្បាប់ ទាមទារឱ្យមានការចូលរួមពីគ្រប់ភាគីពាក់ព័ន្ធទាំងអស់ ពិសេសបងប្អូនប្រជានេសាទ សហគមន៍នេសាទ អាជ្ញាធរថ្នាក់ជាតិ និងថ្នាក់ក្រោមជាតិ មន្ត្រីជំនាញ ចូលរួមសហការគ្នាឱ្យបានល្អ ក្នុងការពង្រឹងការអនុវត្តច្បាប់ឱ្យមានប្រសិទ្ធភាពបំផុត សំដៅធានានិរន្តរភាពផលនេសាទ និងសន្តិសុខស្បៀង ការពារជីវភាពប្រចាំថ្ងៃរបស់បងប្អូនប្រជានេសាទ និងប្រជាពលរដ្ឋយើងទាំងអស់គ្នា ដែលជាអ្នកហូបសម្រាប់ពេលបច្ចុប្បន្នផង ព្រមទាំងរក្សាការពារធនធានជលផលរបស់យើងឱ្យសម្បូរបែបសម្រាប់កូនចៅតទៅជំនាន់ក្រោយផងដែរ។

សូមជម្រាបថា ច្បាប់ជលផលថ្មី ដែលប្រកាសឱ្យប្រើកាលពីខែមិថុនា ឆ្នាំ២០២៥ ផ្តល់នូវមូលដ្ឋានគ្រឹះដ៍រឹងមាំសម្រាប់ការគ្រប់គ្រង ការអភិរក្ស និងការអភិវឌ្ឍន៍ធនធានជលផលប្រកបដោយប្រសិទ្ធភាព និងនិរន្តរភាពសំដៅលើកំពស់សន្តិសុខស្បៀង និងសេដ្ឋកិច្ចជាតិ ព្រមទាំងធានាដល់កិច្ចការពារសិទ្ធិ និងផលប្រយោជន៍របស់ប្រជានេសាទ សហគមន៍នេសាទ វារីវប្បករ អាជីវកម្មផល និងផលិតផលជលផល។ ការងារអាទិភាពបន្ទាប់គឺការជំរុញនូវការអនុវត្តច្បាប់នេះឱ្យមានប្រសិទ្ធភាពបំផុត ហើយក្រសួងកសិកម្ម រុក្ខាប្រមាញ់ និងនេសាទ ក៏បាន និងកំពុងរៀបចំអនុក្រឹត្យ ប្រកាស និងលិខិតបទដ្ឋានគតិយុត្តផ្សេងទៀត ក៏ដូចជាកំពុងអនុវត្តសកម្មភាពជាក់ស្តែងក្នុងការត្រួតពិនិត្យ និងគ្រប់គ្រងកានេសាទ ជាពិសេសគឺការនេសាខុសច្បាប់។

តាមការអង្កេត ត្រីទើប​ចាប់ផ្ដើមចុះតិចៗនៅតាម​ដាយក្នុងភូមិសាស្ត្រខេត្តកណ្ដាល ដោយ​លើកម្ដង​រយៈពេលមួយម៉ោង ​បានប្រមាណ ​៧០០ គីឡូក្រាម ទៅ ១តោន ហើយភាគច្រើនជាប្រភេទ​ត្រីស្លឹក​ឫស្សី និងត្រីរៀលល្អិតៗ។

របាយការណ៍រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា នៅក្នុងឆ្នាំ២០២៤ ផលនេសាទ និងវារីវប្បកម្មកម្ពុជា សម្រេចបានសរុបចំនួនជាង ៩២ម៉ឺនតោន កើនឡើងជាង ៦០ពាន់តោន ស្មើនឹង៧%​ ក្នុងនោះ ផលនេសាទទឹកសាបទទួលបានជាង ៤៦ម៉ឺនតោន ផលនេសាទសមុទ្រទទួលបានជង ១៣ម៉ឺនតោន និងផលវារីវប្បកម្មទទួលបានជាង ៣២ម៉ឺនតោន៕