បរទេស ៖ នយោបាយរបស់សហរដ្ឋអាម៉េរិកក្នុងរយៈពេលមួយឆ្នាំចុងក្រោយនេះហាក់បានបង្ហាញសញ្ញាព្រមានគួរឲ្យកត់សំគាល់ ជាពិសេស សកម្មភាពហិង្សាផ្ទៃក្នុងដែលក្នុងនោះមានទាំងហេតុការណ៍ប៉ុនប៉ងធ្វើឃាតទៅលើបុគ្គលជាអ្នកនយោបាយកំពូលរបស់ប្រទេសផង បូករួមទាំងលោកប្រធានាធិបតី Donald Trump តែម្តង។

នៅក្នុងអត្ថបទមួយដែលត្រូវបានចេញផ្សាយដោយកាសែត RT បានសរសេរថា រដ្ឋាភិបាលទីក្រុងវ៉ាស៊ិនតោនបានវិលត្រឡប់ចូលវដ្តនៃការរំខានផ្នែកនយោបាយដោយសារអំពើហិង្សាសាជាថ្មីដោយក្នុងនោះរយៈពេលមួយឆ្នាំចុងក្រោយនេះគេសង្កេតឃើញមានផែនការធ្វើឃាតគួរឲ្យកត់សំគាល់ចំនួន៥ករណីមកហើយរួមមានដូចខាងក្រោមនេះ៖

១- ផែនការធ្វើឃាតលើលោកប្រធានាធិបតី Donald Trump៖ កាលពីថ្ងៃទី១៣ ខែកក្កដា ឆ្នាំ២០២៤ ការប៉ុនប៉ង់ដោយខ្មាន់កាំភ្លើងមានវ័យទើបតែ២០ឆ្នាំម្នាក់ទៅលើលោក Trump ដែលបណ្តាលឲ្យអ្នកចូលរួមក្នុងពិធីថ្លែងសារស្ថិតនៅ Pennsylvania បាត់បង់ជីវិត និងរបួសច្រើននាក់ ប៉ុន្តែជាសំណាងល្អដែលលោកប្រធានាធីបតីរូបនេះរងរបួសត្រឹមតែស្លឹកត្រចៀក។ ក្រោយមកមានការប៉ុនប៉ង់ធ្វើឃាតម្តងទៀតពោលគឺត្រឹមតែ២ខែបន្ទាប់ ត្រូវនឹងថ្ងៃទី១៥ ខែកញ្ញា ឆ្នាំ២០២៤ ប៉ុន្តែ លោក Trump នៅតែគេចផុតពីផែនការនេះ។

២- ផែនការធ្វើឃាតទៅលើប្រធានសភាតំណាងឲ្យរដ្ឋ Minnesota ៖ លោកស្រី Melissa Hortman ប្រធានសភានៅរដ្ឋ Minnesota និងស្វាមី ត្រូវបានឃាតករបាញ់សម្លាប់នៅនឹងគេហដ្ឋានកាលពីថ្ងៃទី១៤ មិថុនា ឆ្នាំ២០២៥។
៣- នៅយប់ថ្ងៃទី១៥ ខែមិថុនា បុរសជាខ្មាន់កាំភ្លើងម្នាក់បានបាញ់ទៅលើក្រុមគ្រួសារសមាជិកសភាម្នាក់ទៀតនៅក្នុងរដ្ឋនេះដែរបង្ករឱ្យរងរបួសធ្ងន់ ខណៈដែលជនបង្កត្រូវបានគេស្គាល់ឈ្មោះថា Vance Luther Boeloter មានវ័យ៥៧ឆ្នាំ ជាយោធាចូលនិវត្ត។ ក្នុងករណីនេះគេបានស្រាវជ្រាវ និងរកឃើញថា ខ្មាន់កាំភ្លើងមានផែនការបាញ់សម្លាប់សមាជិកសភា និងគោលដៅស្រដៀងគ្នានេះប្រមាណជា៧០នាក់ផ្សេងទៀតនៅ Minnesota ។
៤- ផែនការធ្វើឃាតបុគ្គលស្តាំនិយមដ៏ល្បីម្នាក់ក្នុងបណ្តាញសង្គមដែលមានឈ្មោះថា Nick Fuentes ៖ ឃាតករមានគ្នា៣នាក់ បានព្យាយាមឡោមព័ទ្ធផ្ទះរបស់លោក Fuentes ប៉ុន្តែត្រូវបានឆ្លើយតបភ្លាមដោយប្រតិបត្តិការរបស់ក្រុមប៉ូលីសជំនាញ ហើយជាលទ្ធផលខ្មាន់កាំភ្លើងទាំងអស់ត្រូវបានប៉ូលីសបាញ់សម្លាប់។

៥- ផែនការធ្វើឃាតបានជោគជ័យទៅលើបុរសម្នាក់ដែលមានទំនាក់ទំនងយ៉ាងស្និទ្ធបំផុតជាមួយនឹងលោក Trump ៖ អ្នកអត្ថាធិប្បាយអភិរក្សនិយម និងជាអ្នកគាំទ្រដ៏យូរមកហើយរបស់លោក Donald Trump គឺលោក Charlie Kirk ត្រូវបានគេធ្វើឃាតនៅថ្ងៃព្រឹកថ្ងៃ១០ ខែកញ្ញា ឆ្នាំ២០២៥ ខណៈពេលដែលលោកកំពុងថ្លែងសុន្ទរកថានៅសាកលវិទ្យាល័យ Utah Valley ។ សកម្មជន​ស្តាំ​និយម​ត្រូវ​បាន​គេ​បាញ់​ចំ​ក​របស់​គាត់ ហើយ​បាន​ស្លាប់​នៅក្រោយពេលបញ្ជូនដល់​មន្ទីរពេទ្យ​៕