សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ និយ័តករមូលបត្រកម្ពុជា បានប្រកាសផ្ដល់សិទ្ធិអនុញ្ញាតឱ្យធនាគារអេស៊ីលីដា ភីអិលស៊ី ធ្វើជាអន្តរការីមូលបត្ររដ្ឋ ដូច្នេះ សម្រាប់វិនិយោគិនដែលមិនមែនជាគ្រឹះស្ថានធនាគារ អាចចូលរួមដេញថ្លៃ និងជួញដូរមូលបត្រតាមរយៈអន្តរការីមូលបត្ររដ្ឋដែលមានធនាគារអេស៊ីលីដា ជាធនាគារទី១ ទទួលបានការអនុញ្ញាតពីនិយ័តករមូលបត្រកម្ពុជា ។
កាលពីចុងខែកុម្ភៈ ឆ្នាំ២០២៥កន្លងទៅនេះដែរ និយ័តករមូលបត្រកម្ពុជា បានសហការជាមួយធនាគារអេស៊ីលីដា រៀបចំពិធីប្រកាសជាផ្លូវការនូវការអនុញ្ញាតឱ្យធនាគារអេស៊ីលីដា ធ្វើជាអន្តរការីមូលបត្ររដ្ឋ និងសិក្ខាសាលាស្ដីពីសក្ដានុពល កាលានុវត្តភាពនៃការវិនិយោគលើមូលបត្ររដ្ឋ ដោយមានការចូលរួមពី ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា និងលោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារអេស៊ីលីដាផងដែរ ។
ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា បានមានប្រសាសន៍ឱ្យដឹងថា អន្តរការីមូលបត្រមានសារសំខាន់ណាស់ ពីព្រោះថាទីផ្សារមួយដំណើរការបានល្អទៅមុខ គឺត្រូវមានការចូលរួមវិនិយោគិនធំៗ ប៉ុន្តែការចូលរួមពីសាធារណជនកាន់តែមានភាពចាំបាច់ ។ កាលណាទីផ្សារមួយដែលមានវិនិយោគិនជាសាធារណជនចូលរួម មានន័យថា ការបើកចំហរទីផ្សារកាន់តែធំ ដូច្នេះហើយ អន្តរការីមូលបត្រត្រូវមានវត្តមានជាចាំបាច់នៅលើទីផ្សារ ។
ឯកឧត្តមបន្តថា ៖
«អន្តរការីមូលបត្ររដ្ឋ នឹងអនុញ្ញាតឱ្យដំណើរការទីផ្សារដំបូងកាន់តែល្អប្រសើរ ដោយមានការចូលរួមពីវិនិយោគិន និងសាធារណជនជាអ្នកទិញ ប៉ុន្តែតួនាទីអន្តរការីមូលបត្ររដ្ឋ នឹងកាន់តែធំទូលាយនៅពេលដែលយើងចាប់ផ្ដើមដំណើរការទីផ្សារបន្តបន្ទាប់។ មូលបត្ររដ្ឋ គឺជាឧបករណ៍ហិរញ្ញវត្ថុ ដ៏សំខាន់មួយសម្រាប់បម្រើឱ្យរាជរដ្ឋាភិបាលក្នុងការកៀរគរហិរញ្ញប្បទាន ទាំងក្នុងស្រុក និងក្រៅស្រុក ពីវិស័យឯកជនសម្រាប់ការអភិវឌ្ឍសេដ្ឋកិច្ច និងសង្គម ។ មូលបត្ររដ្ឋ ដែលបោះផ្សាយដោយក្រសួងសេដ្ឋកិច្ច និងហិរញ្ញវត្ថុ តំណាងរបស់រដ្ឋាភិបាលកកម្ពុជា ត្រូវបានចាត់ទុកជាឧបករណ៍បំណុលដែលគ្មានហានិភ័យ» ។
ឯកឧត្តមរំពឹងថា ក្រោយពេលធនាគារអេស៊ីលីដា ទទួលបានការអនុញ្ញាតឱ្យធ្វើជាអន្តរការីមូលបត្ររដ្ឋ ការលក់មូលបត្ររបស់រដ្ឋនឹងកើនឡើងខ្ពស់ ជាក់ស្ដែងកន្លងមកដែលមិនទាន់មានអន្តរការីមូលបត្ររដ្ឋផង តែការលក់មូលបត្ររដ្ឋមានចំនួនជាង ១០០លានដុល្លារអាមេរិក ដូច្នេះ នៅពេលមានអេស៊ីលីដាធ្វើជាអន្តរការីមូលបត្ររដ្ឋ នោះការលក់នឹងកើនឡើងខ្ពស់បន្ថែមទៀត ។
លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី បានមានប្រសាសន៍ថា ធនាគារអេស៊ីលីដា ភីអិលស៊ិ ពិតជាមានមោទនភាពក្រៃលែងដែលបានទទួលការអនុញ្ញាតពីនិយ័តករមូលបត្រកម្ពុជាធ្វើជាអន្តរការីមូលបត្ររដ្ឋក្នុងវិស័យមូលបត្រ ដើម្បីផ្ដល់សេវាកម្មនេះជូនដល់វិនិយោគិន ទាំងក្នុង និងក្រៅប្រទេស ដែលមានបំណងវិនិយោគ និង/ឬជួញដូរមូលបត្ររដ្ឋនៅកម្ពុជា តាមរយៈធនាគារអេស៊ីលីដា ភីអិលស៊ី ដែលជាជម្រើសនៃការវិនិយោគមួយបន្ថែមទៀតប្រកបដោយសុវត្ថិភាព និងទទួលបានអត្ថប្រយោជន៍ ។ លើសពីនេះ ការវិនិយោគលើមូលបត្ររដ្ឋគឺជាការចូលរួមចំណែកដល់ការអភិវឌ្ឍសេដ្ឋកិច្ចជាតិផងដែរ ៕
Account
Security
Favourite Content