បរទេស ៖ កាលពីថ្ងៃដើមសប្តាហ៍កន្លងមកនេះ សហរដ្ឋអាម៉េរិកបានបង្ហាញវត្តមានប្រព័ន្ធបាញ់បង្ហោះមីស៊ីលរយៈចំងាយមធ្យមដ៏ទំនើប Typhon នៅក្នុងទឹកដីប្រទេសជប៉ុនជាលើកដំបូង។ តាមរយៈរូបភាពនេះ បានបង្កឱ្យមានភាពភ្ញាក់ផ្អើល និងជឿជាក់ថាអាចរុញច្រានឲ្យការប្រកួតប្រជែងសព្វាវុធនៅក្នុងតំបន់អាស៊ីមានសកម្មភាពកាន់តែខ្លាំងឡើងជាងមុន។

នៅក្នុងអត្ថបទមួយដែលត្រូវបានចេញផ្សាយដោយកាសែតរ៉យទ័របានសរសេរថា ព្រឹត្តិការណ៍នៃការបង្ហាញប្រព័ន្ធបាញ់មីស៊ីលនេះ ជាគោលបំណងរបស់រដ្ឋាភិបាលទីក្រុងវ៉ាស៊ិនតោន និងទីក្រុងតូក្យូ ដើម្បីអាចបំពេញបន្ថែមនូវសព្វាវុធមួយចំនួនដែលជាមហិច្ឆតារបស់ខ្លួន ខណៈដែលជារឿយៗប្រទេសចិនតែងតែប្រកាសជំទាស់ និងថ្កោលទោស ជាមួយនឹងការព្រមានចំៗថា វានឹងធ្វើឲ្យមានបញ្ហាដល់អស្ថិរភាពសន្តិសុខនៅក្នុងតំបន់។

Typhon ជាប្រព័ន្ធបាញ់មីស៊ីលដែលបញ្ឈរ និងបាញ់ចេញពីទីតាំងនៅដីគោក ហើយក៏អាចដំឡើងបាញ់បានជាមួយប្រភេទគ្រាប់មីស៊ីលម៉ូដេល Tomahawak បានផងដែរ។ មីស៊ីលប្រភេទនេះមានសមត្ថភាពគ្រប់គ្រាន់ក្នុងការវាយប្រហារទៅដល់ដែនទឹកសមុទ្ររបស់ចិននៅភាគខាងកើត ព្រមទាំងផ្នែកមួយចំនួនទៀតរបស់ទឹកដីប្រទេសរុស្សី (ប្រសិនបើវាបាញ់ចេញពីទឹកដីជប៉ុន)។

គួរឲ្យដឹងដែរថា Typhon ត្រូវបានគេដាក់ឲ្យចូលរួមក្នុងសមយុទ្ធយោធាទ្រង់ទ្រាយធំមួយរវាងជប៉ុន និងអាម៉េរិក ដែលមានឈ្មោះថា Resolute Dragon ។ សមយុទ្ធយោធាដែលមានការចូលរួមពីសំណាក់យោធាជប៉ុន និងអាម៉េរិក សរុបចំនួន២ម៉ឺននាក់នេះនឹងប្រព្រឹត្តទៅក្នុងរយៈពេលដល់ទៅ២សប្តាហ៍។ ដោយឡែក ងាកទៅប្រទេសចិនឯណោះវិញ នៅសប្តាហ៍នេះ ក៏កំពុងរៀបចំវេទិកាសន្តិសុខដ៏ធំមួយផងដែរនៅក្នុងទីក្រុងប៉េកាំង ខណៈដែលវេទិកាសន្តិសុខ Beijing Xiangshan Forum ជាវេទិកាប្រចាំឆ្នាំធ្វើឡើងដើម្បីបង្ហាញយុទ្ធសាស្ត្រកាទូតរបស់ប្រទេសចិន និងកិច្ចខិតខំដើម្បីពង្រឹងឥទ្ធិពល ព្រមទាំងអំណាចនៅក្នុងតំបន់ស្របពេលដែលភាពតានតឹងកំពុងតែកើនឡើងកំដៅ។

ប្រភពដដែលក៏បានបញ្ជាក់ដែរថា វេទិកាសន្តិសុខនេះក៏នឹងក្លាយទៅជាឧបករណ៍សម្រាប់ចិនក្នុងការបញ្ជាក់អំពីទស្សនៈវិស័យរបស់មេដឹកនាំខ្លួនគឺលោក Xi Jinping អំពីការយល់ឃើញចំពោះសណ្តាប់ធ្នាប់ពិភពលោក។ លោក Xi ដែលកាលពីដើមខែកន្លងមកបានអំពាវនាវឲ្យមានការប្រយុទ្ធប្រឆាំងទៅនឹងគោលនយោបាយអំណាច និងមនោគមវិជ្ជាបែបឯកតោភាគី ពោលគឺសំដៅទៅរករដ្ឋាភិបាលទីក្រុងវ៉ាស៊ិនតោនតែម្តង។

យោងតាមការចេញផ្សាយរបស់ទីភ្នាក់ងារចិនស៊ិនហួបានឲ្យដឹងថា វេទិកាសន្តិសុខនេះនឹងមានការចូលរួមពីសំណាក់អ្នកតំណាងប្រមាណជា១៨០០នាក់ មកពីជាង១០០ប្រទេស ដែលរួមមានទាំងក្រុមមន្ត្រីយោធា និងស៊ីវិល របស់បណ្តារដ្ឋាភិបាល និងក្រុមអ្នកវិភាគ ក្នុងរយៈពេល៣ថ្ងៃ គិតចាប់ពីថ្ងៃពុធសប្តាហ៍នេះតទៅ៕