បរទេស៖ ក្មេងៗអូស្ត្រាលីក្រោមអាយុ ១៦ ឆ្នាំអាចនឹងត្រូវបានហាមឃាត់ពីការប្រើប្រាស់វេទិកានៃបណ្តាញសង្គមរបស់ក្រុមហ៊ុន Meta រួមមាន Instagram, Facebook និង Threads នេះបើយោងតាមការរាយការណ៍ពី BBC។

Meta ដែលជាក្រុមហ៊ុនមេរបស់វេទិកាប្រព័ន្ធផ្សព្វផ្សាយសង្គមទាំង៣ (Instagram, Facebook និង Threads) បានជូនដំណឹងដល់អ្នកប្រើប្រាស់នៅប្រទេសអូស្ត្រាលីដែលមានអាយុចន្លោះពី ១៣ ទៅ ១៥ ឆ្នាំ តាមរយៈអ៊ីមែល និងក្នុងកម្មវិធីជាសារអក្សរ ដែលបញ្ជាក់ថា គណនីរបស់ពួកគេនឹងបិទដំណើរការចាប់ពីថ្ងៃទី ៤ ខែធ្នូ ឆ្នាំ២០២៥ខាងមុខនេះ។ ការហាមឃាត់នេះនឹងចូលជាធរមាននៅថ្ងៃទី ១០ ខែធ្នូ ហើយវាអាចនឹងរួមបញ្ចូលវេទិកាមួយចំនួនទៀតរួមមាន TikTok, YouTube, X និង Reddit ផងដែរ។

នាយករដ្ឋមន្ត្រីអូស្ត្រាលី លោក Anthony Albanese បានលើកឡើងថា ការរឹតបន្តឹងនេះមានគោលបំណងឱ្យកុមាររក្សាឥរិយបថ ឬ សកម្មភាពសមស្របតាមអាយុរបស់ពួកគេ។ ការហាមឃាត់នេះមានគោលបំណងការពារក្មេងជំទង់ពីសម្ពាធ និងហានិភ័យដែលពួកគេអាចប្រឈមមុខពីការប្រើប្រាស់គណនីប្រព័ន្ធផ្សព្វផ្សាយសង្គម។ ជាមួយគ្នានេះ និយតករអ៊ីនធឺណិតរបស់ប្រទេសអូស្ត្រាលី បានប៉ាន់ប្រមាណថា មានអ្នកប្រើប្រាស់ Facebook ចំនួន ១៥០ ០០០ នាក់ និង ចំនួន ៣៥០ ០០០ នាក់នៅលើ Instagram ដែលស្ថិតក្នុងរង្វង់អាយុចន្លោះពី ១៣-១៥ ឆ្នាំ។

យ៉ាងណាក៏ដោយ ទោះបីជាក្រុមហ៊ុន Meta និងក្រុមហ៊ុនផ្សេងទៀតជំទាស់នឹងវិធានការនេះក៏ដោយ ប៉ុន្តែពួកគេនឹងត្រូវអនុវត្តតាម។ វេទិកាប្រព័ន្ធផ្សព្វផ្សាយសង្គមដែលមិនអនុវត្តតាមវិធានការរបស់អូស្ត្រាលី អាចប្រឈមនឹងការផាកពិន័យរហូតដល់ ៥០ លានដុល្លារអូស្រ្តាលី (៣២​ លានដុល្លារអាម៉េរិក) ។

ទន្ទឹមនឹងនេះ Meta កំពុងស្នើសុំឱ្យអ្នកប្រើប្រាស់វ័យក្មេងធ្វើបច្ចុប្បន្នភាពព័ត៌មានលម្អិតទំនាក់ទំនងរបស់ពួកគេ ដើម្បីអាចជូនដំណឹងនៅពេលដែលពួកគេគ្រប់អាយុមានសិទ្ធិបើកគណនី។ មុនពេលគណនីត្រូវបានបិទ ពួកគេអាចទាញយក និងរក្សាទុកការបង្ហោះ វីដេអូ និងសាររបស់ពួកគេដើម្បីរក្សាទុក។ លើសពីនេះ ក្មេងគ្រប់អាយុប្រើប្រាស់វេទិកាប្រព័ន្ធផ្សព្វផ្សាយសង្គម អាចត្រូវប្រឈមនឹងការរឹតបន្តឹងដូចជា ថតវីដេអូ Selfie ដើម្បីប្រើក្នុងការស្កែនមុខ និង ផ្តល់ព័ត៌មានប័ណ្ណបើកបរ ឬអត្តសញ្ញាណប័ណ្ណផ្សេងទៀតផងដែរ។ វិធីសាស្រ្តផ្ទៀងផ្ទាត់ទាំងអស់នេះត្រូវបានសាកល្បងដោយភ្នាក់ងារត្រួតពិនិត្យអាយុដែលមានមូលដ្ឋាននៅចក្រភពអង់គ្លេស (ACCS) កាលពីដើមឆ្នាំនេះ។ ACCS លើកឡើងថា វិធីសាស្រ្តទាំងអស់មានគុណសម្បត្តិរបស់វា ប៉ុន្តែក៏មិនធានាពីប្រសិទ្ធភាពនៃការដាក់ពង្រាយថានោះដែរ។

Antigone Davis ប្រធានផ្នែកសុវត្ថិភាពសកលនៅក្រុមហ៊ុន Meta លើកឡើងថា ពួកគេកំពុងធ្វើការយ៉ាងខ្លាំងដើម្បីដកអ្នកប្រើប្រាស់អាយុក្រោម ១៦ ឆ្នាំចេញត្រឹមថ្ងៃទី ១០ ខែធ្នូ ដើម្បីអនុលោមតាមច្បាប់។ បន្ថែមពីណេះ Meta ក៏ចង់ឃើញមានច្បាប់ដែលអនុញ្ញាតក្មេងអាយុក្រោម ១៦ ឆ្នាំទទួលបានការយល់ព្រមពីអាណាព្យាបាល មុនពេលពួកគេទាញយកកម្មវិធីប្រព័ន្ធផ្សព្វផ្សាយសង្គម៕