បរទេស ៖ យោងតាមប្រភពព័ត៌មានពី South China Morning Post បានរាយការណ៍ថា ការផលិតឈីបកម្រិតខ្ពស់របស់ចិនដើរយឺតជាងអ្នកផលិតឈីបកំពូលៗនៅលើពិភពលោក ៥ ឆ្នាំ ទោះបីជាក្រុមហ៊ុនចិនបានរីកចម្រើននៅក្នុងផ្នែកផ្សេងៗទៀតក៏ដោយ។

យោងតាមគ្រីះស្ថានបច្ចេកវិទ្យាព័ត៌មាន និងនវានុវត្តន៍ (ITIF) បានឲ្យដឹងថា ក្រុមហ៊ុនបច្ចេកវិទ្យាតៃវ៉ាន់ Taiwan Semiconductor Manufacturing Company (TSMC) គឺជាអ្នកផលិតបន្ទះឈីបកម្រិតខ្ពស់ដែលមានភាពជឿនលឿនជាងក្រុមហ៊ុនបច្ចេកវិទ្យាចិន Semiconductor Manufacturing International Corporation (SMIC) ប្រហែល ៥ ឆ្នាំ។ TSMC ដែលជាក្រុមហ៊ុនផលិតបន្ទះឈីបដ៏ធំបំផុតរបស់ពិភពលោក និងបានណែនាំដំណើរការ 3-nanometer របស់ខ្លួនកាលពីឆ្នាំ ២០២២ ដែលត្រូវបានប្រើក្នុងការផលិតបន្ទះឈីបដ៏ទំនើបបំផុតមួយចំនួនរបស់ពិភពលោក។ កាលពីឆ្នាំមុន ក្រុមហ៊ុនបច្ចេកវិទ្យាចិន SMIC បានសាកល្បងដំណើរការ 5-nanometer ជំនាន់ក្រោយរបស់ខ្លួន ក្នុងការប្រឆាំងនឹងការដាក់ទណ្ឌកម្មរបស់សហរដ្ឋអាមេរិកក្នុងគោលដែលមានបំណងបិទក្រុមហ៊ុនចិន។ គួរឲ្យបញ្ជាក់ដែរថា អ្នកផលិតឈីបកំពូលៗរបស់ពិភពលោករួមមាន កោះតៃវ៉ាន់ សហរដ្ឋអាម៉េរិក ជប៉ុន​ កូរ៉េខាងត្បូង និងចិន ហើយចិនស្ថិតនៅចំណាត់ថ្នាក់លេខប្រាំ។

លោក Stephen Ezell អនុប្រធាន ITIF បាននិយាយថា ចិនកំពុងវិនិយោគរាប់រយពាន់លានដុល្លារដើម្បីក្លាយជាអ្នកដឹកនាំក្នុងវិស័យ semiconductors។ ទោះបីជាចិនកំពុងបោះជំហានគួរអោយចាប់អារម្មណ៍ ប៉ុន្តែការរីកចម្រើនរបស់ខ្លួនរហូតមកដល់ពេលនេះនៅមានកម្រិតចំពោះទិដ្ឋភាពមួយចំនួននៃការអភិវឌ្ឍន៍បន្ទះឈីប និងការ​បង្កើត​ថ្មី​ជា​សាកល។ ទោះបីជាមានការខិតខំប្រឹងប្រែងប្រកបដោយភាពច្នៃប្រឌិតក៏ដោយ ប៉ុន្តែចិននៅតែឈរនៅពីក្រោយអ្នកផលិតកំពូលៗពិភពលោក។ យ៉ាងណាមិញ ក្រុមហ៊ុនចិននៅក្រោយអ្នកផលិតផ្សេងៗទៀតត្រឹមតែពីរឆ្នាំប៉ុណ្ណោះចំពោះការរចនាប្រភេទបន្ទះឈីបតក្ក ដោយសារតម្រូវការក្នុងស្រុកខ្លាំងសម្រាប់ប្រើក្នុងទូរស័ព្ទ ឬកម្មវិធីបញ្ញាសិប្បនិម្មិត បានជំរុញឱ្យមានការច្នៃប្រឌិតលឿនជាងមុន។

យោងតាមរបាយការណ៍ ITIF បានឱ្យដឹងថា ការរីកចម្រើននៃឧស្សាហកម្ម semiconductor របស់ចិនភាគច្រើនត្រូវបានជំរុញដោយការឧបត្ថម្ភធនដ៏ធំ ដោយសារប្រធានាធិបតីចិន Xi Jinping អំពាវនាវដល់រដ្ឋាភិបាលគ្រប់លំដាប់ថ្នាក់ឱ្យគាំទ្រដល់បន្ទះឈីបរបស់ប្រទេស។ ក្រុមហ៊ុនបន្ទះឈីបរបស់ចិនទទួលបានអត្ថប្រយោជន៍មិនត្រឹមតែពីការឧបត្ថម្ភធនរបស់រដ្ឋប៉ុណ្ណោះទេ ប៉ុន្តែថែមទាំងត្រូវបានកាត់បន្ថយពន្ធ ឬការលើកលែងពន្ធផងដែរ។ ចាប់តាំងពីឆ្នាំ ២០១៤ មក ការវិនិយោគលើវិស័យឈីបដែលមានប្រហែល ៥២ ពាន់លានដុល្លារអាមេរិកពីរដ្ឋាភិបាលចិនគ្រប់ជាន់ថ្នាក់ជារៀងរាល់ឆ្នាំ។ អ្នកវិភាគលើកឡើងថា ការឧបត្ថម្ភធនរបស់រដ្ឋាភិបាលមានសារៈសំខាន់ណាស់ក្នុងការជួយដល់ក្រុមហ៊ុនចិនដែលខាតបង់ក្នុងវិស័យមួយនេះ ដោយសារយុទ្ធសាស្រ្តរបស់ចិនក្នុងការអភិវឌ្ឍន៍ឧស្សាហកម្មបន្ទះឈីបជួបការលំបាកខ្លាំង ប៉ុន្តែការឧបត្ថម្ភធនរបស់រដ្ឋាភិបាលយ៉ាងច្រើនក៏បាននាំទៅដល់ការផលិតបន្ទះឈីបជំនាន់ចាស់ច្រើនផងដែរ។

ចិនមានចំណែក ៣១ ភាគរយក្នុងដំណើរការ mature-node សកលនៅក្នុងឆ្នាំ ២០២៣ ហើយរំពឹងថានឹងកើនឡើង ៣៩ ភាគរយនៅឆ្នាំ ២០២៧។ យ៉ាងណាមិញ ការអភិវឌ្ឍន៍នេះបានបង្កឱ្យទីក្រុងវ៉ាស៊ីនតោនមានការព្រួយបារម្ភថា ចិនអាចនឹងគ្របដណ្តប់លើការផ្គត់ផ្គង់បន្ទះឈីបសកល ហើយសហរដ្ឋអាមេរិកបានប្រកាសថាខ្លួននឹងដំឡើងពន្ធទ្វេដងលើការនាំចូល semiconductor ពីប្រទេសចិនដល់ ៥០ ភាគរយនៅឆ្នាំក្រោយ។ ឥឡូវនេះ ចិនមានក្តីសង្ឃឹមខ្ពស់លើការវេចខ្ចប់ ការផ្គុំ និងការតេស្តកម្រិតខ្ពស់ (ATP) ខណៈចិនមានចំណែកសម្រាប់បរិក្ខារ ATP សកល ២៧ ភាគរយក្នុងឆ្នាំ ២០២១ ហើយបានកើនឡើង ៣៨ ភាគរយនៅឆ្នាំ ២០២៣។ ក្រុមហ៊ុនដំឡើង និងសាកល្បងធំៗរបស់ចិនមានដូចជា JCET Group និង Tongfu Microelectronics ដែលស្ថិតនៅក្នុងបញ្ជឺក្រុមហ៊ុនដំឡើងកំពូលៗទាំងប្រាំរបស់ពិភពលោក៕