បរទេស ៖ យោងតាមប្រភពពី Study in Denmark បានលើកឡើងថា ប្រទេសដាណឺម៉ាកជាប់ចំណាត់ថ្នាក់ជាអ្នកដឹកនាំខាងភាពច្នៃប្រឌិតដ៏កំពូលនៅអឺរ៉ុបច្រើនដងមកហើយ បើទោះបីខ្លួនជាប្រទេសតូចមួយដែលចំនួនប្រជាជន ៥,៨៥ លាននាក់ និងមានធនធានតិចតួចក៏ដោយ។ កម្មវិធីល្បីៗដូចជា Skype, Google Maps និងគ្រឿងសាងសង់ LEGO សុទ្ធតែត្រូវបានបង្កើតឡើងដោយជនជាតិដាណឺម៉ាក។

ទន្ទឹមនឹងនេះ កត្តាចម្បងមួយនៃការច្នៃប្រឌិត គឺប្រព័ន្ធអប់រំរបស់ដាណឺម៉ាកដែលបង្រៀនកុមារតាំងពីតូចដែលផ្តោតលើការងារក្រុម និងការច្នៃប្រឌិត ដើម្បីប្រកួតប្រជែងជាមួយគ្រូបង្រៀន និងឪពុកម្តាយរបស់ពួកគេ។ គេជឿថា DNA របស់ជនជាតិដាណឺម៉ាកមានគំនិតច្នៃប្រឌិត និងភាពជាសហគ្រិនពីធម្មជាតិ ហើយវិស័យវិទ្យាសាស្ត្រជីវិតរបស់ដាណឺម៉ាកបានអភិវឌ្ឍទៅជាក្រុមដ៏មានឥទ្ធិពលបំផុតមួយនៅទ្វីបអឺរ៉ុប។ លើសពីនេះ ដាណឺម៉ាកជាប្រទេសដែលមានចំនួនប៉ាតង់ច្រើនជាងគេមួយពីការបង្កើតថ្មី និងការច្នៃប្រឌិតទៅលើវិស័យដូចជា ជីវវេជ្ជសាស្ត្រ វិទ្យាសាស្ត្របរិស្ថាន អាហារ កសិកម្ម វិទ្យាសាស្ត្រជីវិត និងឱសថ។

ក្រុមហ៊ុនឱសថដាណឺម៉ាក Novo Nordisk គឺជាក្រុមហ៊ុនផ្គត់ផ្គង់អាំងស៊ុយលីន និងអង់ស៊ីមសម្រាប់ប្រើក្នុងឧស្សាហកម្មឈានមុខគេមួយរបស់ពិភពលោក។ លើសពីនេះ ដាណឺម៉ាកមានក្រុមហ៊ុនបច្ចេកវិទ្យាស្អាតជាច្រើនទទួលបានជោគជ័យដូចជា Grundfos និង Danfoss ដែលបង្កើតប្រព័ន្ធគ្រប់គ្រងទឹក និងកំដៅដែលជួយកាត់បន្ថយផលប៉ះពាល់ដល់បរិស្ថាន។ មិនត្រឹមតែប៉ុណ្ណោះ ក្រុមហ៊ុនរចនាម៉ូដផ្ទះ និងគ្រឿងសង្ហារឹម Danish Design ត្រូវបានគេស្គាល់ទូទាំងពិភពលោកដោយសារគុណភាពខ្ពស់ ភាពច្នៃប្រឌិត ភាពសាមញ្ញ និងផាសុកភាព ហើយស្ថិតក្នុងចំណោមអ្នកនាំចេញធំបំផុតមួយរបស់ដាណឺម៉ាកអស់រយៈពេលជាច្រើនឆ្នាំ។ លើសពីនេះ ស្ថាបត្យកម្មដាណឺម៉ាកមានភាពល្បីល្បាញជុំវិញពិភពលោក ហើយសំណង់ស្ថាបត្យកម្មល្បីៗដែលមានម៉ូដដាណឺម៉ាកត្រូវបានរកឃើញនៅកន្លែងជាច្រើន។

បន្ថែមពីនេះ ដាណឺម៉ាកបានសម្រេចចិត្តដឹកនាំសម្រាប់ការផ្លាស់ប្តូរទៅជាសេដ្ឋកិច្ចបៃតង និងចង់ក្លាយជាប្រទេសដំបូងគេក្នុងពិភពលោកដែលគ្មានឥន្ធនៈហ្វូស៊ីលនៅឆ្នាំ២០៥០។ ប្រទេសដាណឺម៉ាកគឺជាអ្នកនាំមុខគេក្នុងការស្រាវជ្រាវ និងការប្រើប្រាស់ប្រភពថាមពលកកើតឡើងវិញដូចជា ជីវឥន្ធនៈ ខ្យល់ រលក និងថាមពលពន្លឺព្រះអាទិត្យ ដោយសារគោលនយោបាយផ្តោតសំខាន់លើថាមពលរយៈពេល ៣០ ឆ្នាំ។ គួរបញ្ជាក់ដែរថា ដាណឺម៉ាកបានជាប់ចំណាត់ថ្នាក់លេខ ១ ក្នុងការរៀបចំបរិស្ថានស្អាតឆ្នាំ២០២០ ដែលមានន័យថា ដាណឺម៉ាកគឺជាប្រទេសដែលមានពណ៌បៃតងជាងគេបំផុតក្នុងពិភពលោក។

នៅក្នុងឆ្នាំ២០២៣ នេះផងដែរ រដ្ឋាភិបាលដាណឺម៉ាកបានដាក់ចេញនូវយុទ្ធសាស្ត្រថ្មីសម្រាប់ការស្រាវជ្រាវលើវិទ្យាសាស្ត្រ quantum និងការបង្កើតថ្មីក្នុងរយៈពេលវែង ដោយធានាថាប្រទេសដាណឺម៉ាកស្ថិតនៅជួរមុខរបស់ពិភពលោកដែលដើរតួយ៉ាងសំខាន់សម្រាប់បច្ចេកវិទ្យា quantum នាពេលអនាគត៕