សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ថ្លែងនៅក្នុងវេទិកាស្ដីពីស្ថានភាពសេដ្ឋកិច្ច និងអចលនទ្រព្យកម្ពុជា ឆ្នាំ២០២៤ កាលពីពេលថ្មីៗនេះ លោកបណ្ឌិត គី សេរីវឌ្ឍន៍ ប្រធានវិទ្យាស្ថានសិក្សាចិននៃរាជបណ្ឌិត្យសភាកម្ពុជា និងជាអ្នកជំនាញសេដ្ឋកិច្ច បានលើកឡើងថា តាមពិតទៅវិស័យអចលនទ្រព្យកម្ពុជាបានជួបប្រទះនឹងបញ្ហាតាំងពីមុនជំងឺកូវីដ១៩ចូលមកដល់ម្ល៉េះ ប៉ុន្តែមនុស្សភាគច្រើនបានដាក់បន្ទុកទៅលើកូវីដ១៩ជាដើមចម។
លោកបណ្ឌិត គី សេរីវឌ្ឍន៍ មានប្រសាសន៍ថា នៅក្នុងឆ្នាំ២០១៩ សន្ទុះនៃសេដ្ឋកិច្ចកម្ពុជាមានសន្ទុះកើនឡើងខ្លាំង ដោយសារតែវិស័យអចលនទ្រព្យ និងរំហូរហិរញ្ញវត្ថុចូលមកក្នុងប្រទេសច្រើន ជាពិសេសនៅខេត្តព្រះសីហនុ។ រំហូរនេះបានបង្កើនប្រាក់ចំណូលដល់ប្រជាពលរដ្ឋបានយ៉ាងច្រើនដូចគ្នា ខណៈអ្នកដែលចាប់យកឱកាសវិនិយោគក្នុងទីផ្សារអចលនទ្រព្យក៏មានច្រើនដែរ ប៉ុន្តែអ្វីដែលជាបញ្ហារារាំងឱ្យជាប់គាំងនៃទីផ្សារមួយនោះគឺដោយសារការកើនឡើងនូវតម្លៃអចលនទ្រព្យខ្ពស់ និងឈានដល់ចំណុចទុំចោរ គួបផ្សំនឹងការចាកចេញរបស់ជនជាតិចិនមុនចូលឆ្នាំចិនយ៉ាងគំហុកមុនពេលជំងឺកូវីដ១៩ចូលលុកលុយ ។
លោកបណ្ឌិតបន្តថា នៅក្នុងពេលស្ថានភាពនៃការរីកចម្រើន និងរំហូរហិរញ្ញវត្ថុចូលមកក្នុងខេត្តព្រះសីហនុកាន់តែច្រើន ធ្វើឱ្យមានពលរដ្ឋជាច្រើនលូកដៃចូលក្នុងវិស័យអចលនទ្រព្យកាន់តែច្រើន និងមានវិសាលភាពកាន់តែធំ ដូច្នេះហើយនៅពេលដែលមានការចាកចេញរបស់ជនជាតិចិន ក៏ធ្វើឱ្យវិស័យអចលនទ្រព្យនៅក្នុងខេត្តមួយនេះជួបបញ្ហាប្រឈមកាន់តែខ្លាំងដូចគ្នា។
លោកបណ្ឌិតបន្តទៀតថា ៖
«ការចាប់ផ្ដើមមានបញ្ហាប្រឈមដែលកើតឡើងតាំងពីអំឡុងឆ្នាំ២០១៩ ក្រោយពេលទីផ្សារអចលនទ្រព្យកើនឡើងខ្ពស់ពេក ឈានដល់ដំណាក់កាលទុំចោរ គួបផ្សំនឹងដំណើរចាកចេញរបស់ជនជាតិចិនដែរផង ហើយមិនយូរប៉ុន្មានក៏ចូលមកដល់វិបត្តិកូវីដ១៩ទៀត។ ក្នុងពេលភ្លាមៗ យើងមើលឃើញថា វិស័យអចលនទ្រព្យនៅល្អ ប៉ុន្តែវាបានជួបបញ្ហាតាំងពីឆ្នាំ២០១៩មកម្ល៉េះ ក្រោយមក ម្នាក់ៗរង់ចាំឱ្យស្ថានភាពកូវីដ១៩បានប្រសើរឡើងវិញ ទើបបន្តចាប់ផ្ដើមសកម្មភាពវិនិយោគឡើងវិញ»។
លោកបន្តទៀតថា ៖
«ក្នុងពេលកំពុងរង់ចាំនោះដែរ ម្នាក់ក៏ចាប់ផ្ដើមយកលុយសន្សំដែលរកបានកាលពីមុនកូវីដ១៩មកចាយ ហើយរហូតដល់ឆ្នាំ២០២២ កូវីដ១៩ក៏បានចប់ តែម្នាក់ៗ ក៏អស់លុយបង្កើតអាជីវកម្មឡើងវិញ ពីព្រោះតែនៅពេលដែលស្ថានភាពសេដ្ឋកិច្ចល្អប្រសើរ ម្នាក់ៗបានយកលុយទៅបណ្ដាក់ទុនវិនិយោគលើអចលនទ្រព្យអស់ទៅហើយ សូម្បីតែអ្នកប្រកបរបរក្នុងវិស័យ SME ក៏បានងាកទៅបណ្ដាក់ទុនក្នុងវិស័យអចលនទ្រព្យដែរ ទើបធ្វើឱ្យពួកគេមិនអាចមកបង្កើតអាជីវកម្មថ្មីបាន ហើយរង់ចាំបន្តឱ្យស្ថានភាពអចលនទ្រព្យប្រសើរដើម្បីបានចំណូលមកបង្កើតអាជីវកម្មផ្សេង» ។
យ៉ាងណាក៏ដោយ បើតាមលោកបណ្ឌិត គី សេរីវឌ្ឍន៍ បានព្យាករណ៍ថា សម្រាប់ឆ្នាំ២០២៤ នេះ ស្ថានភាពអចលនទ្រព្យនៅតែមើលឃើញថាមិនទាន់មានភាពប្រសើរឡើងវិញនោះទេ ពីព្រោះថាស្ថានភាពសេដ្ឋកិច្ចពិភពលោកនៅមិនទាន់មានភាពច្បាស់លាស់នៅឡើយ។
ដោយឡែក លោក សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) បានឱ្យដឹងថា ភាពរីកចម្រើននៃវិស័យអចលនទ្រព្យគឺអាស្រ័យលើការរីកចម្រើននៃសេដ្ឋកិច្ច ហើយនៅពេលស្ថានភាពសេដ្ឋកិច្ចធ្លាក់ចុះ ឬថមថយ វិស័យនេះក៏មិនថមថយភ្លាមៗដែរ គឺត្រូវការពេលមួយរយៈ។ ជាក់ស្ដែង គ្រាសេដ្ឋកិច្ចកម្ពុជាមានបញ្ហាដោយសារតែកូវីដ១៩ វិស័យអចលនទ្រព្យចាប់ផ្ដើមមានបញ្ហានៅរយៈពេល ៦ខែក្រោយពេលសេដ្ឋកិច្ចមានបញ្ហា ។ ដូច្នេះនៅពេលសេដ្ឋកិច្ចកម្ពុជាចាប់ផ្ដើមប្រសើរ ឬកើនឡើងវិញក៏វិស័យអចលនទ្រព្យមិនទាន់រើបឡើងវិញភ្លាមៗដែរ ពោលគឺត្រូវការពេលវេលាដូចគ្នា ៕
Account
Security
Favourite Content