ជាការពិត ការមកដល់ជាបន្តបន្ទាប់នៃបច្ចេកវិទ្យាបានបង្កជាការព្រួយបារម្ភដល់មនុស្សជាតិ ចំពោះ ភាពប្រកួតប្រជែងនៃទីផ្សារការងារ។ ខណៈដែលការងារមួយចំនួន​ ត្រូវបានជំនួសដោយបច្ចេកវិទ្យា មនុស្សត្រូវតែមានភាពចាំបាច់ណាស់ក្នុងការពង្រឹងសមត្ថភាពរបស់ខ្លួន។ ប៉ុន្តែទោះជាយ៉ាងណា អ្នកជំនាញនៅតែលើកទឹកចិត្តឱ្យប្រជាជនមានការគិតបែបវិជ្ជមាន និងចេះទាញ​យកផល​ប្រយោជន៍ពីការចូលមកដល់នៃបច្ចេកវិទ្យាទាំងនេះ។

លោក ជា កុកម៉េង ស្ថាបនិកក្រុមហ៊ុន DURUN TIRE Cambodia បានមានប្រសាសន៍នៅក្នុង​សិក្ខាសាលាអាជីវកម្មមួយកាលពីពេលថ្មីៗនេះថា សម្រាប់លោក នេះគឺជាទំនោរថ្មីរបស់សង្គមដែលមនុស្សម្នាក់ៗត្រូវតែដើរតាម។

លោកបន្តថា ៖

«យើងត្រូវតែធ្វើជាមនុស្សដែលគ្រប់គ្រងបច្ចេកវិទ្យា មិនមែនអនុញ្ញាតឱ្យបច្ចេកវិទ្យា មកគ្រប់គ្រងយើងនោះទេ ជាក់ស្ដែងពេលបច្ចេកវិទ្យាថ្មីៗចូលមកបែបនេះ ត្រូវចេះបត់បែនវាឱ្យក្លាយជាឱកាសសម្រាប់យើងវិញ»។

ជាមួយគ្នានេះលោក សោម សម្បត្តិ អគ្គនាយកក្រុមហ៊ុនថ្នាំពណ៍ជាតិខាំផេន ដែលជាអ្នកមានបទពិ​សោធន៍​លើ​វិស័យ​ជំនួញក្នុងស្រុកជាច្រើនឆ្នាំបានបង្ហាញការយល់ឃើញថា បញ្ញាសិប្បនិម្មិតមិនអាច ជំនួសមនុស្សបានទេ។

អ្នកជំនាញលើវិស័យជំនួញរូបនេះបានបន្តគូសបញ្ជាក់ថា ៖

«បើវាឈ្នះយើង វាជាអ្នកបង្កើត​យើង​ហើយ មិនមែនយើង​បង្កើតវាទេ ហើយថ្ងៃមុខគេអាចនឹងបង្កើតអ្វី​ផ្សេងទៀត​ផងដូច្នេះអ្វីដែល​សំខាន់នា​ពេលនេះគឺពង្រឹងសមត្ថិភាពខ្លួនឯងឱ្យល្អ ហើយម្យ៉ាងទៀតយើងមិនអាច​ប្រកួត​​ប្រជែង​លើសង្គមទាំងមូលទេ ដូច្នេះផ្ដោតលើតែខ្លួនឯងទៅបានហើយ»។

ងាកចេញពីការយល់ឃើញរបស់អ្នកជំនាញជុំវិញបញ្ញាសិប្បនិម្មិត ខាងក្រោមនេះជារបក​គំហើញដែលអ្នកស្រាវជ្រាវបានរកឃើញ និងផលិតបច្ចេកវិទ្យាទំនើបជំនួសមនុស្សឈានដល់​ការបង្កើតរូបូតដើរដោយបញ្ញាសិប្បនិម្មិត។

ឆ្នាំ២០០៥ រថយន្តស្វ័យប្រវត្តិគ្មានមនុស្សបើក ចំនួន ៥ បានជោគជ័យនូវការប្រណាំងរថយន្ត Grand Challenge 2005 ក្នុងចម្ងាយផ្លូវ ២១២ គីឡូម៉ែត្រឆ្លងកាត់វាលខ្សាច់ Mojave ។

ឆ្នាំ២០០៧ Caltech Distinguished Alumna Fei-Fei Li បានបង្កើត និងដឹកនាំគម្រោង ImageNet ដែលជាមូលដ្ឋានទិន្នន័យរួមបញ្ចូលរូបភាពរាប់លានសម្រាប់ការស្រាវជ្រាវអំពីចក្ខុវិស័យកុំព្យូទ័រ ដោយគូសបញ្ជាក់ពីសារៈសំខាន់នៃសំណុំទិន្នន័យធំៗក្នុងការជំរុញ AI ។

ឆ្នាំ២០១២ AlexNet គឺជាបច្ចេកវិទ្យាសម្រាប់ប្រើប្រាស់ក្នុងវិស័យស្ថាបត្យកម្ម ដែលមានសមត្ថភាពខ្ពស់ បើធៀបទៅនឹងបច្ចេកវិទ្យាផ្សេងទៀត ត្រូវបានបង្កើតឡើង។

ឆ្នាំ២០១៦ ប្រព័ន្ធ AI AlphaGo ដែលបង្កើតឡើងដោយក្រុមហ៊ុនបុត្រសម្ព័ន្ធ Google DeepMind បានយកឈ្នះជើងឯក Go Lee Se-dol ៤ប្រកួតទៅលើកម្មវិធីកុំព្យូទ័រ​ដែលមាន​លក្ខណៈស្មុគស្មាញ ប៉ុន្តែបានរុញការវិវត្តបច្ចេកវិទ្យាទៅមួយកម្រិតទៀត។

ឆ្នាំ២០១៨ សេវាកម្មតាក់ស៊ីបើកបរដោយស្វ័យប្រវត្តិរបស់ Waymo ត្រូវបានដាក់ឱ្យប្រើប្រាស់ជាផ្លូវការ​នៅទីក្រុង Phoenix រដ្ឋ Arizona ។

ឆ្នាំ២០២០ មន្ទីរពិសោធន៍ស្រាវជ្រាវបញ្ញាសិប្បនិមិត្ត OpenAI បានប្រកាសពីការអភិវឌ្ឍន៍ Generative Pre-Trained Transformer 3 (GPT-3) ដែលជាគំរូភាសា មានសមត្ថភាពផលិតអត្ថបទ​ដោយភាពស្ទាត់​ជំនាញដូចមនុស្ស។

តាមរយៈការរីកចម្រើននៃបច្ចេកវិទ្យាបែបនេះ គេបានស្រាវជ្រាវ និងពិនិត្យអំពីលទ្ធភាពក្នុងការចូលមកជំនួសការងាររបស់មនុស្សដោយបញ្ញាសិប្បនិម្មិតត ហើយបើយោងតាមអត្ថបទស្រាវជ្រាវរបស់ Science exchange គេបានប្រៀបធៀបបញ្ញាសិប្បនិម្មិត ទៅនឹងទំនាក់ទំនងរវាងកុំព្យូទ័រ ជាមួយនឹងមនុស្ស។

ការស្រាវជ្រាវនោះបានពន្យល់ថា កុំព្យូទ័រមានអត្ថប្រយោជន៍ច្រើន ដោយវាមានការចងចាំល្អ​ជាងមនុស្ស ហើយអាចប្រមូលព័ត៌មានបានយ៉ាងឆាប់រហ័សពីប្រភពឌីជីថល។ វាអាចធ្វើការដោយមិនចាំបាច់សំរាក និងអាចធ្វើ​ការងារបានច្រើនក្នុងពេលតែមួយ។

ហេតុផលទាំងនេះបានធ្វើឱ្យកុំព្យូទ័រមានភាពពូកែជាងមនុស្សក្នុងការសម្រេចបាននូវគោលដៅមួយចំនួន ដូចជាការគណនាគណិតវិទ្យាដ៏ស្មុគស្មាញ ឬតម្រៀបតាមបរិមាណទិន្នន័យច្រើន។ ប៉ុន្តែសម្រាប់ប្រព័ន្ធ AI វិញ ភាគច្រើនត្រូវបានបង្កើតឡើងសម្រាប់បម្រើឱ្យតែការងារមួយជាក់លាក់ប៉ុណ្ណោះ។

ផ្ទុយទៅវិញ មនុស្សអាចប្រើប្រាស់ការស្រមៃ និងប្រើប្រាស់ការគិតនៅពេលមានស្ថានការណ៍អ្វីមួយកើតឡើង ក៏ដូចជាការព្យាករណ៍ទៅលើហេតុការណ៍នាពេលអនាគត។ នេះជាចំណុចលេចធ្លោមួយរបស់មនុស្សក្នុងការសម្រប និងកែប្រែការគិតរបស់គេ ទៅតាមស្ថានភាពដែលពួកគេកំពុងរស់នៅ។ ក្រៅពីនេះក៏នៅមានចំណុចមួយចំនួនធំទៀត ដែលមនុស្សអាចធ្វើបាន ប៉ុន្តែគេនៅមិនទាន់អាច បង្កើតប្រព័ន្ធ AI ណាដែលអាចមានភាពវៃឆ្លាតដល់កម្រិតមនុស្សបាននោះទេ។

នៅពេលដែលប្រព័ន្ធ AI វិវត្តកាន់តែទំនើប វាអាចនឹងមានភាពប្រសើរឡើងក្នុងការទទួលបានសមត្ថភាពស្រដៀងទៅនឹងមនុស្ស មានន័យថា “បញ្ញាសិប្បនិម្មិត”​ ជាគោលដៅចម្បងក្នុង​ចំណោម​អ្នកស្រាវ​​ជ្រាវ។

តាមផ្អែកតាមការស្រាវជ្រាវដដែលនេះ គេប៉ានស្មានថា ទៅថ្ងៃអនាគត​អាចនឹងមានបញ្ញាសិប្បនិម្មិត ដែលមានសមត្ថភាពលើសពីមនុស្ស ប៉ុន្តែគេនៅតែមិនទាន់អាចកំណត់ជាក់លាក់ថា ពិតជាអាចធ្វើ​បាន ឬបើអាចបាន តើនៅពេលណាឱ្យប្រាកដនោះទេ៕