យោងតាមការស្រាវជ្រាវចុងក្រោយមួយដោយ WEFORUM បានរកឃើញថា គម្លាតរវាងការផ្គត់ផ្គង់ទឹក និងតម្រូវការទឹកជាសកលត្រូវបានព្យាករណ៍ថានឹងកើនឡើងទៅដល់៤០ភាគរយនៅឆ្នាំ២០៣០ខាងមុខនេះ ប្រសិនបើការអនុវត្ត និងប្រើប្រាស់ដូចពេលបច្ចុប្បន្ននៅតែបន្តបែបនេះ។

នៅតាមទីកន្លែង និងតំបន់ជាច្រើនលើសកលលោក តម្រូវការទឹកស្អាតមានទំហំលើសលប់ធៀបទៅនឹងការផ្គត់ផ្គង់ ហើយនៅកន្លែងផ្សេងទៀត បញ្ហាកង្វះទឹកកំពុងរារាំងដល់កំណើនសេដ្ឋកិច្ចយ៉ាងខ្លាំង ជាពិសេសបណ្តាអ្នករស់នៅតាមទីតាំងដែលមានអាកាសធាតុក្ដៅ រីងស្ងួតខ្លាំង ដូចជានៅអារ៉ាប់ និងអាហ្វ្រិកជាដើម។

ទោះបីជាយ៉ាងណាក្តី ដើម្បីជំនះបញ្ហាប្រឈមមុខទាំងនេះអ្នកជំនាញបានណែនាំនូវមធ្យោបាយ និងបច្ចេកវិទ្យាជាច្រើនដើម្បីជួយធ្វើឲ្យប្រសើរឡើងនៃការប្រើប្រាស់ទឹកស្អាត ហើយជាលទ្ធផលបានរកឃើញនូវបច្ចេកវិទ្យាចំនួន៥ដែលកំពុងដើរតួយ៉ាងសំខាន់ក្នុងការទាញយកទឹកស្អាតមកប្រើប្រាស់ និងកំពុងពេញនិយមខ្លាំងសម្រាប់ពលរដ្ឋដែលរស់នៅក្នុងតំបន់រីងស្ងួត និងក្តៅហួតហែងខ្លាំង។

១- Catching fog ៖ ជាបន្ទះសំណាញ់ពិសេសម្យ៉ាងអាចទាញយកទឹកពីអ័ព្ទ និងពពកនៅក្នុងអាកាសធាតុ ហើយតំណក់ទឹកតូចៗបានក្លាយទៅជាប្រភពទឹកប្រើប្រាស់ដែលមានសភាពស្អាតរួចជាស្រេច និងត្រូវបានហូរចូលទៅក្នុងធុងទឹកដែលត្រៀមរួចជាស្រេច។ គ្មានផលប៉ះពាល់គ្មានការបំពុល ចំណាយតិច ហើយភាគច្រើនត្រូវបានប្រើប្រាស់នៅតាមតំបន់ជើងភ្នំ និងឆ្នេរសមុទ្រ។

២- Iceberg Havesting ៖ ជាដំណើរការទាញយកផ្ទាំងទឹកកកធំពីតំបន់ប៉ូល និងជាគំនិតដែលពិបាកនឹងធ្វើទៅរួច ប៉ុន្តែប្រទេសអាហ្វ្រិកខាងត្បូង និងសហភាពអារ៉ាប់រួមកំពុងពិចារណាគម្រោងនេះ ដែលមិនត្រឹមតែអាចផ្តល់ទឹកស្អាតប៉ុណ្ណោះទេ អ្នកជំនាញជឿជាក់ថាផ្ទាំងទឹកកកទាំងនោះក៏នឹងអាចទាញយកភ្លៀងមកជាមួយផងដែរ។

៣- Cloud Seeding ៖ តាមរយៈយន្តហោះ ឬប៉មពិសេសដែលត្រូវបានសាងសង់ទុកគេអាចយកសារធាតុពិសេសម្យ៉ាងទៅចាក់បញ្ចូលជាមួយនឹងដុំពពកដែលធ្វើបែបនេះនឹងអាចបង្កទៅជាទឹកភ្លៀងយកមកប្រើប្រាស់បាន និងជួយជំរុញចំនួនទឹកភ្លៀងដល់ទៅ២០ភាគរយ។

៤- Rainwater Harvesting ៖ ការស្តុកទឹកភ្លៀង គឺជាវិធីសាស្ត្របុរាណ ប៉ុន្តែនៅតែមានភាពពេញនិយមនៅឡើយសម្រាប់បណ្តាប្រទេសជាច្រើន ហើយពួកគេបានអភិវឌ្ឍនូវបច្ចេកវិទ្យាកាន់តែមានប្រសិទ្ធភាពក្នុងការស្តុកទឹកទាំងនោះទុកទៀតផង។

៥- Disalination ៖ ជាបច្ចេកវិទ្យាដែលអាចទាញយកទឹកសមុទ្រទៅច្នៃជាទឹកស្អាតសម្រាប់ប្រើប្រាស់វិញ ហើយបច្ចុប្បន្នគេជឿជាក់ថាបច្ចេកវិទ្យានេះកំពុងត្រូវបានអនុវត្តយ៉ាងខ្លាំងក្លាហើយជាលទ្ធផលទឹកស្អាតដែលទាញបានពីទឹកសមុទ្រមានទៅដល់១០ភាគរយដែលអាចផ្គត់ផ្គង់តម្រូវការអ្នកប្រើប្រាស់នៅតាមទីក្រុងសមុទ្រជាច្រើនលើពិភពលោក៕