សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី BBC បានឱ្យដឹងថា ប្រធានាធិបតីអាម៉េរិក Donald Trump បានប្រកាសយកពន្ធនាំចូល ២៥ ភាគរយលើរថយន្ត និងគ្រឿងបន្លាស់រថយន្តទាំងឡាយណាដែលចូលមកក្នុងទឹកដីអាម៉េរិក ដែលការយកពន្ធនាំចូលលើរថយន្តទាំងនេះ នឹងចូលជាធរមាននៅថ្ងៃទី ២ ខែមេសា ហើយការយកពន្ធលើគ្រឿងបន្លាស់ត្រូវបានកំណត់នៅខែឧសភា ឬ ក្រោយនេះ។
ប្រធានាធិបតីរូបនេះអះអាងថា វិធានការនេះនឹងជំរុញឱ្យឧស្សាហកម្មរថយន្តក្នុងស្រុកមានកំណើនយ៉ាងខ្លាំង ហើយមិនត្រឹមតែប៉ុណ្ណោះ វាក៏នឹងជំរុញឱកាសការងារ ព្រមទាំងការវិនិយោគនៅក្នុងសហរដ្ឋអាម៉េរិកផងដែរ។ នៅក្នុងសន្និសីទសារព័ត៌មានមួយ លោក Trump បានសង្កត់ធ្ងន់ថា វិធានការនេះគឺជាវិធានការអចិន្រ្តៃយ៍ ប៉ុន្តែប្រសិនបើពួកគេផលិតរថយន្តនៅលើទឹកដីសហរដ្ឋអាមេរិក នោះពួកគេមិនតម្រូវឱ្យបង់ពន្ធនោះទេ។ វិធានការនេះនឹងអនុវត្តមិនត្រឹមតែចំពោះរថយន្តដែលផលិតរួចរាល់ប៉ុណ្ណោះទេ ប៉ុន្តែនឹងអនុវត្តចំពោះគ្រឿងបន្លាស់រថយន្តផងដែរ ដែលជារឿយៗត្រូវបាននាំចូលមកពីប្រទេសផ្សេងៗ មុនពេលដំឡើងនៅសហរដ្ឋអាមេរិក។ ប៉ុន្តែយ៉ាងណា ពន្ធថ្មីនេះនឹងលើកលែងកាណាដា និងម៉ិកស៊ិកសិន រហូតដល់ភ្នាក់ងារគយ និងល្បាតតាមព្រំដែនរបស់អាម៉េរិកបង្កើតយន្តការមួយដើម្បីកំណត់ពន្ធពីប្រទេសទាំងពីរ។
បើទោះជាបែបនេះក្ដី អ្នកវិភាគបានលើកឡើងថា ការផ្លាស់ប្តូរនេះទំនងធ្វើឲ្យផលិតកម្មរថយន្តសំខាន់ៗនៅសហរដ្ឋអាម៉េរិកត្រូវបង្ខំចិត្តបិទបណ្តោះអាសន្ន, ជំរុញតម្លៃរថយន្ដ, និងបង្កើនភាពតានតឹងនៃទំនាក់ទំនងជាមួយសម្ព័ន្ធមិត្ត។ យ៉ាងណាក៏ដោយ ទោះបីជា Trump ផ្តោតសំខាន់លើពន្ធគយស្របតាមគោលនយោបាយរបស់លោកក្នុងគោលបំណងការពារអាជីវកម្មអាមេរិក និងជំរុញការផលិតក៏ដោយ ប៉ុន្តែក្រុមហ៊ុន ឬអាជីវកម្មក្នុងស្រុកត្រូវបង្កើនការចំណាយសម្រាប់បង់ពន្ធការនាំចូលពីបរទេស។ ក្រុមអ្នកវិភាគបានប៉ាន់ប្រមាណថា តម្លៃរថយន្តអាចឡើងដល់រាប់ពាន់ដុល្លារ ដោយសារពន្ធ ២៥ ភាគរយលើគ្រឿងបន្លាស់អាចបន្ថែមតម្លៃពី ៤ ០០០ ដុល្លារទៅ ១០ ០០០ ដុល្លារ អាស្រ័យលើប្រភេទរថយន្ត។
បន្ទាប់ពីការប្រកាសរបស់ប្រធានាធិបតីអាម៉េរិករូបនេះ ភាគហ៊ុនរបស់ក្រុមហ៊ុនផលិតរថយន្តធំៗរបស់ជប៉ុន រួមមាន តូយ៉ូតា នីសាន់ ហុងដា បានធ្លាក់ចុះ ខណៈដែលប្រទេសនេះគឺជាអ្នកនាំចេញរថយន្តធំទី២ របស់ពិភពលោក។ ក្នុងនោះ នាយករដ្ឋមន្ត្រីជប៉ុន លោក Shigeru Ishiba បានលើកឡើងថា រដ្ឋាភិបាលរបស់លោកនឹងដាក់ជម្រើសទាំងអស់នៅលើតុ ដើម្បីឆ្លើយតបទៅនឹងគោលនយោបាយពន្ធគយរបស់អាម៉េរិក។
គួរឲ្យបញ្ជាក់ដែរថា ម៉ិចស៊ិក គឺជាអ្នកផ្គត់ផ្គង់រថយន្តកំពូលទៅកាន់សហរដ្ឋអាមេរិក បន្ទាប់មកគឺកូរ៉េខាងត្បូង ជប៉ុន កាណាដា និងអាល្លឺម៉ង់។ កាលពីឆ្នាំមុន សហរដ្ឋអាម៉េរិកបាននាំចូលរថយន្តប្រហែល ៨ លានគ្រឿង ដែលមានតម្លៃប្រហែល ២៤០ ពាន់លានដុល្លារនៃទំហំពាណិជ្ជកម្មសរុប៕
Account
Security
Favourite Content