សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងទៅតាមប្រភពព័ត៌មានពីរ៉យទ័របានរាយការណ៍ថា ក្រុមប្រទេស G7 និងសហភាពអឺរ៉ុបអាចនឹងហាមឃាត់ការនាំចូលឡើងវិញនូវហ្គាសរបស់រុស្ស៊ី ដែលទីក្រុងម៉ូស្គូធ្លាប់បានកាត់ផ្តាច់ការផ្គត់ផ្គង់។ ស្របពេលនេះដែរ កិច្ចពិភាក្សាកំពុងត្រូបានធ្វើឡើងរវាងក្រុម G7 និង សហភាពអឺរ៉ុប ដោយការសម្រេចចិត្តអាចនឹងត្រូវបញ្ចប់នៅក្នុងកិច្ចប្រជុំកំពូល G7 ដែលធ្វើឡើងនៅទីក្រុងហ៊ីរ៉ូស៊ីម៉ា ប្រទេសជប៉ុននាសប្តាហ៍ក្រោយនេះ។
យោងតាមសេចក្តីថ្លែងការណ៍ព្រាងមួយបានលើកឡើងថា បណ្តាក្រុមប្រទេស G7 និងសហភាពអឺរ៉ុប មានគោលបំណងកាត់បន្ថយបន្ថែមទៀតលើការប្រើប្រាស់ថាមពលរបស់រុស្ស៊ី រួមទាំងការទប់ស្កាត់ការបើកឡើងវិញនូវផ្លូវនាំចូលថាមពលរបស់រុស្ស៊ីដែលធ្លាប់បានបិទរហូតទាល់តែមានដំណោះស្រាយជម្លោះសម្រាប់អ៊ុយក្រែន។ លើសពីនេះ វិធានការនេះនឹងរារាំងលំហូរហ្គាសពីបំពង់បង្ហូររបស់រុស្ស៊ីនៅលើផ្លូវទៅកាន់ប្រទេសប៉ូឡូញ និងអាល្លឺម៉ង់ ដែលធ្លាប់បានកាត់ផ្តាច់ការផ្គត់ផ្គង់កាលពីឆ្នាំមុន។ ប្រទេសទាំងពីរបានទទួលហ្គាសពីរុស្ស៊ីតាមរយៈបំពង់បង្ហូរ Yamal-Europe ដែលរត់ពីស៊ីបេរីឆ្លងកាត់បេឡារុស ប៉ូឡូញ និងអាល្លឺម៉ង់។
កាលពីរដូវក្តៅឆ្នាំមុន ក្រុមហ៊ុនថាមពលយក្សរុស្ស៊ី Gazprom បានបញ្ឈប់ការផ្គត់ផ្គង់តាមរយៈបំពង់បង្ហូរប្រេងនៅផ្នែកប៉ូឡូញ បន្ទាប់ពីទីក្រុង Warsaw បានដាក់ទណ្ឌកម្មលើក្រុមហ៊ុន Gazprom ។ អាល្លឺម៉ង់បានទទួលហ្គាសរុស្ស៊ីតាមបំពង់ Nord Stream 1 ដែលរត់កាត់សមុទ្របាល់ទិក ប៉ុន្តែការផ្គត់ផ្គង់តាមរយៈបំពង់នេះត្រូវបានកាត់បន្ថយដោយសារតែបញ្ហាបច្ចេកទេស និងការដាក់ទណ្ឌកម្ម ហើយបន្ទាប់មកត្រូវបានកាត់ផ្តាច់ទាំងស្រុងនៅពេលដែលបំពង់បង្ហូរប្រេងនេះមិនអាចដំណើរការបានបន្ទាប់ពីការផ្ទុះនៅក្រោមទឹកកាលពីខែកញ្ញាកន្លងទៅនេះ។
មុនពេលមានជម្លោះជាមួយនឹងអ៊ុយក្រែន រុស្ស៊ីធ្លាប់ផ្គត់ផ្គង់ប្រហែល ៤០ ភាគរយនៃតម្រូវការហ្គាសរបស់សហភាពអឺរ៉ុប ប៉ុន្តែក្រោយមក ការផ្គត់ផ្គង់បានធ្លាក់ចុះតិចជាង ១០ ភាគរយដោយសារតែបណ្តាប្រទេសសហភាពអឺរ៉ុបបាន កាត់បន្ថយការពឹងផ្អែកលើថាមពលរបស់រុស្ស៊ី។ បើទោះបីជាទណ្ឌកម្មបានធ្វើឱ្យការផ្គត់ផ្គង់ឧស្ម័នរបស់រុស្ស៊ីបានធូរស្បើយបន្តិច ប៉ន្តែវិធានការណ៍របស់ក្រុមប្រទេស G7 និង សហភាពអឺរ៉ុបនឹងក្លាយជាគោលដៅដំបូងគេដែលរឹតបន្តឹងលើការនាំចេញហ្គាសរបស់រុស្ស៊តាមរយៈបំពង់បង្ហូរ។ កាលពីដើមសប្តាហ៍នេះ មានការលេចឡើងថា សហភាពអឺរ៉ុបក៏មានគម្រោងបិទការចែកចាយប្រេងរបស់រុស្ស៊ីទៅកាន់ប្រទេសអាល្លឺម៉ង់ និងប៉ូឡូញ តាមរយៈបំពង់បង្ហូរប្រេង Druzhba ដែលជាផ្នែកនៃទណ្ឌកម្មជុំបន្ទាប់របស់ខ្លួនផងដែរ។ កាលពីមុន ប្រទេសទាំងពីរធ្លាប់ឈប់នាំចូលប្រេងតាមរយៈបំពង់បង្ហូរប្រេង ប៉ុន្តែដោយសារមានការលើកលែងពីសហភាពអឺរ៉ុប គឺប្រទេសទាំងពីរត្រូវបានអនុញ្ញាតបន្តការនាំចូលឡើងវិញ។ ដូច្នោះហើយ អាល្លឺម៉ង់ក៏បន្តនាំចូលប្រេងឆៅកាហ្សាក់ស្ថានតាមខ្សែបន្ទាត់ Druzhba ដែលឆ្លងកាត់រុស្ស៊ី។ យ៉ាងណាមិញ វិធានការនេះត្រូវបានគេរាយការណ៍ថាអាចត្រូវបានរួមបញ្ចូលទៅក្នុងទណ្ឌកម្មជុំទី ១១ របស់ទីក្រុងប្រ៊ូសែលដែលនឹងដាក់មកលើទីក្រុងម៉ូស្គូ៕
Account
Security
Favourite Content