ភ្នំពេញ ៖ វេទិកាថែទាំសុខភាព និងពិព័រណ៍នវានុវត្តន៍ ឆ្នាំ២០២៥ (Healthcare Forum & Innovation​Exhibition 2025 )បានប្រារព្ធឡើងកាលថ្ងៃទី ៣០ ខែតុលា ឆ្នាំ២០២៥ នាសណ្ឋាគារ Sun & Moon Riverside រាជធានីភ្នំពេញ ក្នុងគោលបំណងលើកស្ទួយ និងចាប់យកបច្ចេកវិទ្យាទំនើបវិស័យសុខាភិបាលនៅកម្ពុជានាពេលអនាគត។

រៀបចំដោយសភាពាណិជ្ជកម្មអឺរ៉ុប (EuroCham )នៅកម្ពុជា វេទិកានេះមានការចូលរួមពីតំណាងរដ្ឋាភិបាល អ្នកជំនួញ និងក្រុមហ៊ុនអន្តរជាតិ ដើម្បីស្វែងរកវិធី និងយុទ្ធសាស្ត្រជំរុញ ធ្វើឱ្យវិស័យសុខាភិបាលកាន់តែល្អប្រសើរ ទាន់សម័យតាមរយៈបច្ចេកវិទ្យាថ្មីៗ និងនវានុវត្តន៍។

ក្រោមប្រធានបទ« ការជំរុញតម្លៃនៅយុគបន្ទាប់៖ ពីការប្រើប្រាស់បញ្ញាសិប្បនិម្មិត(AI)ដល់កំណែទម្រង់គោលនយោបាយ» ព្រឹត្តិការណ៍នេះ ប្រមូលផ្តុំដោយអ្នកធ្វើគោលនយោបាយ វិនិយោគិន និងអ្នកបង្កើតនវានុវត្តន៍ ដើម្បីជជែកពិភាក្សាពីកំណែទម្រង់ និងផ្លាស់ប្តូរឌីជីថល អភិបាលកិច្ច និងអន្តរប្រតិបត្តិការនៅក្នុងបរិវត្តកម្មប្រព័ន្ធអេកូសុខាភិបាលរបស់ព្រះរាជាណាចក្រកម្ពុជា។

បណ្ឌិត ឡូ វាសនាគីរី រដ្ឋលេខាធិការក្រសួងសុខាភិបាល និងលោក Tassilo Brinzer អនុប្រធាន Euro​Cham​ នៅកម្ពុជា និងជាប្រធានធុរកិច្ចអាល្លឺម៉ង់-កម្ពុជា ដែលបានអញ្ជើញជាអធិបតីនៃវេទិកា បានថ្លែងរំលេចពីការប្តេជ្ញាចិត្តរបស់​រដ្ឋាភិបាលក្នុងការជំរុញសុខភាពឌីជីថល ដែលជាមូលដ្ឋានគ្រឹះនៃការផ្តល់សេវាប្រសើរឡើង និងភាពធន់ជាតិ។

លោក Tassilo Brinzer បានមានប្រសាសន៍ថា៖

«ក្នុងរយៈពេលប៉ុន្មានឆ្នាំចុងក្រោយនេះ ជំងឺរាតត្បាត COVID-19 បានរឹតបន្តឹងយ៉ាងខ្លាំងដល់ការប្រមូលផ្តុំរបស់មនុស្ស ហើយក៏​បាន​ពន្លឿន​កំណើន​នៃ​ការ​បង្កើត​ថ្មី​ឌីជីថល ខណៈ​បុគ្គល និង​សហគមន៍​ជុំវិញពិភពលោក​​បានងាកទៅរកបច្ចេកវិទ្យាសម្រាប់ការងារ ការទាក់ទង និងការទទួលបានសេវាកម្មសំខាន់ៗក្នុងអំឡុងពេលបិទខ្ទប់។ ការផ្លាស់ប្តូរជាសកលនេះ បានបង្ហាញពីតម្រូវការបន្ទាន់សម្រាប់ប្រព័ន្ធថែទាំសុខភាពក្នុងការទទួលយកបច្ចេកវិទ្យា និងសេវាកម្មឌីជីថលកាន់តែច្រើន និងកាន់តែប្រសើរឡើង ដើម្បីឆ្លើយតបទៅនឹងនិន្នាការថ្មីៗទាំងនេះ សំដៅធ្វើឱ្យកាន់តែមានភាពធន់ និងឆ្លើយតបទៅនឹងតម្រូវការអ្នកជំងឺប្រកបដោយគុណតម្លៃ គុណភាពពិតប្រាកដនៅក្នុងឧស្សាហកម្មថែទាំសុខភាព»។

លោកអនុប្រធាន EuroCham បានលើកឡើងទៀតថា៖ របៀបវារៈថ្ងៃនេះ បាននាំក្រុមអ្នកជំនាញជាតិ និងអន្តរជាតិឈានមុខមកចែករំលែកការយល់ដឹងរបស់ពួកគេលើប្រធានបទថែទាំសុខភាពមួយចំនួន រួមមានបទប្បញ្ញត្តិការ ថែទាំសុខភាព និន្នាការ និងការច្នៃប្រឌិតឌីជីថល ការផ្តល់សេវា ការការពារទិន្នន័យអ្នកជំងឺ និងនិរន្តរភាពហិរញ្ញវត្ថុក្នុងវិស័យនេះ។

ឯកឧត្ត ឡូ វាសនាគីរី បានមានប្រសាសន៍ថា៖

«កិច្ចសន្ទនា និងទំនាក់ទំនងដែលយើងបានបង្កើតនៅថ្ងៃនេះ នឹងនាំឱ្យមានការផ្លាស់ប្តូរសុខភាពឌីជីថលរបស់កម្ពុជា ឆ្ពោះទៅរកប្រព័ន្ធសុខាភិបាលកាន់តែឆ្លាតវៃ រឹងមាំជាងមុន និងបរិយាបន្ន ។ នៅក្នុងសករាជនៃការផ្លាស់ប្តូរបច្ចេកវិទ្យា ដែលផ្លាស់ប្តូរការថែទាំសុខភាពជាសាកលនេះ  ប្រទេសកម្ពុជាបានត្រៀមខ្លួនរួចជាស្រេចដើម្បីទទួលយកនវានុវត្តន៍ ដែលមានដូចជា  AI ជំនាន់ថ្មីប្រកបដោយទំនួលខុសត្រូវ »។

គួរជម្រាបថា៖ នៅក្នុងវេទិកាពិភាក្សា លោក Elias Engelking សហប្រធាននៃគណៈកម្មាធិការថែទាំសុខភាព EuroCham ក៏បានចែករំលែកពីតួនាទីនៃថ្នាលទិន្នន័យនៅក្នុងប្រព័ន្ធអេកូថែទាំសុខភាពគួរឱ្យទុកចិត្ត។ លោកបានបន្ថែមថា ប្រទេសកម្ពុជាកំពុងផ្លាស់ប្តូរឆ្ពោះទៅរកឋានៈជាប្រទេសដែលមានចំណូលមធ្យមកម្រិតខ្ពស់ ដូច្នេះ ការកសាងប្រព័ន្ធសុខភាពឌីជីថល នឹងអាស្រ័យលើការបង្កើតរួមគ្នារវាងរដ្ឋ និងឯកជន ប្រកប​ដោយប្រសិទ្ធភាព ដោយលាយបញ្ចូលគ្នានូវបទប្បញ្ញត្តិ ជាមួយនឹងដើមទុន និងនវានុវត្តន៍របស់វិស័យឯកជន។

ចំណែក លោក Oudom Rony នាយកផ្នែកបច្ចេកវិទ្យា ការត្រួតពិនិត្យហានិភ័យ និងនវានុវត្តន៍នៃធនាគារជាតិនៃកម្ពុជា ក៏បានចូលរួមចែករំលែកបទពិសោធន៍ពីហេដ្ឋារចនាសម្ព័ន្ធវិស័យហិរញវត្ថុសម្រាប់ពង្រឹងអភិ​បា​ល​កិច្ចទិន្នន័យផ្នែកសុខាភិបាល។

លោកបានលើកឡើងថា៖ ការថែទាំសុខភាពមិនមែនជាហិរញ្ញវត្ថុទេ ប៉ុន្តែវាពឹងផ្អែកលើការជឿទុកចិត្ត និងទិន្នន័យ ខណៈវិស័យសុខាភិបាលរបស់កម្ពុជាត្រៀមទទួលយកការផ្លាស់ប្តូរ​ឌីជី​ថល។

ជាមួយគ្នានេះដែរ លោក Stefan Messerer ឯកអគ្គរដ្ឋទូតសហព័ន្ធសាធារណរដ្ឋ​អាល្លឺម៉ង់​ប្រចាំ​ប្រទេស​កម្ពុជា បាន​បញ្ជាក់​ជាថ្មី​នូវ​ការ​គាំទ្រ​របស់​អាល្លឺម៉ង់​ចំពោះវិស័យសុខាភិបាល និងបង្កើនកិច្ចសហប្រតិបត្តិការដែលកំពុងកើនឡើងរវាងធុរកិច្ចអ៊ឺរ៉ុប និងអ្នកពាក់ព័ន្ធក្នុងស្រុកដើម្បីលើកកម្ពស់នវានុវត្តន៍ឌីជីថលប្រកបដោយការទទួលខុសត្រូវ និងនិរន្តរភាព ៕