បរទេស ៖ យោងតាមប្រភពពីបរទេសបានលើកឡើងថា ការ​ចិញ្ចឹម​គោ​ក្របីគឺ​ជា​ទំនៀម​ទម្លាប់​របស់​ស្ត្រី​ក្នុង​ប្រទេស​ប៉ាគីស្ថាន ប៉ុន្តែផលិតកម្មទឹកដោះគោមានកម្រិតទាបនៅឡើយបើធៀបទៅនឹងតម្រូវការទីផ្សារ។ កសិករទាំងនោះចិញ្ចឹមគោយកទឹកដោះដោយក្នុងមួយគ្រួសារមានគោចិញ្ចឹមចន្លោះពី ៣-៥ក្បាល។

ក្នុងនាមជាអ្នកផលិតទឹកដោះគោធំទី ២ នៅក្នុងប្រទេសប៉ាគីស្ថាន Engro Foods (EFL) ត្រូវបានបើកដំណើរការឡើងក្នុងឆ្នាំ២០០៥ ដោយអនុវត្តគំរូអាជីវកម្មបរិយាបន្ន ដើម្បីរក្សាបានការផ្គត់ផ្គង់ទឹកដោះគោក្នុងស្រុក និងបានដឹកនាំកសិករក្រៅផ្លូវការជាច្រើនចូលទៅក្នុងសង្វាក់ផ្គត់ផ្គង់របស់ពួកគេ ខណៈពេលដែលជាឱកាសបង្កើតការងារនៅតំបន់ជនបទផងដែរ។ ក្រៅពីការពង្រឹង និងធានាការផ្គត់ផ្គង់ទឹកដោះគោសម្រាប់ពេលអនាគត Engro Foods បានគិតជាយុទ្ធសាស្ត្ររយៈពេលវែង ដើម្បីឱ្យមានការបង្កើតហេដ្ឋារចនាសម្ព័ន្ធបណ្តាញដ៏ធំទូលាយមួយក្នុងការប្រមូលទឹកដោះគោ ដោយការបណ្តុះបណ្តាលកសិករ ផ្តល់សេវាកសិផល និងធានានូវតម្លាភាពដំណើរការពេញលេញ។ គោលបំណងរបស់ Engro Foods គឺជួយសម្រួលជីវភាពរស់នៅរបស់កសិករ និងជំរុញការផ្លាស់ប្តូរប្រកបដោយប្រសិទ្ធភាព។ ជាមួយគ្នានេះ ដើម្បីពង្រីកផលិតកម្ម Engro Foods បាន​ទិញ​ទឹកដោះគោ​ដោយ​ផ្ទាល់​ពីកសិករខ្នាតតូច ដោយភ្នាក់ងារក្រុមហ៊ុនជិះម៉ូតូជុំវិញភូមិជារៀងរាល់ថ្ងៃ ដើម្បីប្រមូលទឹកដោះគោស្រស់ៗដាក់ក្នុងធុងត្រជាក់។ ពួកគេអាចប្រមូលទីកដោះគោពីកសិករបាន ៤០០ លីត្រក្នុងមួយថ្ងៃ ។

Engro Foods បានផ្តល់ការបណ្តុះបណ្តាល និងសេវាកម្មពេទ្យសត្វ ជាពិសេសស្ត្រីទទួលបានអត្ថប្រយោជន៍ពីការបណ្តុះបណ្តាល និងរកប្រាក់ចំណូលបានថែមទៀតផង។ Engro Foods មើលឃើញពីសក្ដានុពលនៃអាជីវកម្មទឹកដោះគោដែលផ្តល់ផលប្រយោជន៍ដល់ស្ត្រី ហើយក្រុមហ៊ុនបានធ្វើការជាមួយគ្រឹះស្ថានជាច្រើនដើម្បីឈានទៅមុខមួយជំហានទៀត។ កសិករស្ត្រីត្រូវបានបណ្តុះបណ្តាលអំពីការចញ្ចឹមគោ និងការប្រមូលទឹកដោះគោពីសហគមន៍របស់ពួកគេ ដោយសារគោលដៅរបស់ Engro Foods គឺផ្តល់ឱ្យស្ត្រីនូវប្រភពចំណូលបន្ថែម និងផ្តល់ការងារដែលមានប្រាក់ខែសមរម្យសម្រាប់ពួកគេ។ មុនដំបូង Engro Foods ត្រូវចូលរួមជាមួយកសិករក្រៅផ្លូវការ ដែលមានន័យថា កសិករប្រហែល ១ លានប៉ុណ្ណោះក្នុងចំណោមកសិករប្រហែល ៨ លានលក់ទឹកដោះគោទៅឱ្យក្រុមហ៊ុន ហើយក្រៅពីនោះគឺប្រកបរបរកសិកម្មបែបក្រៅផ្លូវការ។ បន្ទាប់មក Engro Foods ទិញទឹកដោះគោពីកសិករ​តាមតំបន់ដែលចិញ្ចឹមគោយកទឹកដោះលក្ខណៈតូចតាចបែបធម្មជាតិនៅក្នុងប្រទេសប៉ាគីស្ថាន ដែលជាមធ្យម គ្រួសារមួយមានគោ ២ ទៅ ៥ ក្បាល អាចផ្តល់ទិន្នផលទឹកដោះគោ ៣ ទៅ ៥ លីត្រប៉ុណ្ណោះក្នុងមួយថ្ងៃ។ បន្ទាប់មកទៀត Engro Foods ជួយកសិករកែលម្អទិន្នផល និងគុណភាពទឹកដោះគោឲ្យមានលក្ខណៈល្អប្រសើរបំផុត ដោយសារការចិញ្ចឹមបែបគ្រួសារកង្វះបច្ចេកទេសកសិកម្មទំនើប និងលទ្ធភាពទទួលសេវាពេទ្យសត្វនៅមានកម្រិតទាប។

គួរឲ្យបញ្ជាក់ដែរថា Engro Foods បានចាប់ផ្តើមប្រតិបត្តិការពេញលេញក្នុងឆ្នាំ២០០៦ ជាមួយនឹងសមត្ថភាពផលិតទឹកដោះគោ ២៣៤ ០០០ លីត្រក្នុងមួយថ្ងៃ ហើយបានកើនឡើងដល់ជាង ១,៨ លានលីត្រក្នុងមួយថ្ងៃនៅឆ្នាំ២០១៣ ។ លើសពីនេះ ប្រាក់ចំណូលក្រុមហ៊ុនបានកើនឡើងពី ១៦,៥ លានដុល្លារក្នុងឆ្នាំ២០០៦ ដល់ ៣៧០ លានដុល្លារក្នុងឆ្នាំ២០១៣។ មិនត្រឹមតែប៉ុណ្ណោះ កសិករផ្គត់ផ្គង់ទីកដោះគោរបស់ក្រុមហ៊ុនបានកើនឡើងទ្វេដងរហូតដល់ ៣០០ ០០០ នាក់រវាងឆ្នាំ២០០៨ និងឆ្នាំ២០១៣។ ក្នុងអំឡុងពេលដូចគ្នា តម្លៃសរុបនៃទឹកដោះគោដែលបានទិញ កើនឡើងពី ៥៥ លានដុល្លារដល់ ៩០ លានដុល្លារ។ នៅឆ្នាំ២០១៣ Engro Foods បានទិញទឹកដោះគោ ២០០ លានលីត្រ ដោយក្នុងនោះការទិញពីកសិករតូចតាចមានចំណែក ៩៥ ភាគរយ។

ទោះជាយ៉ាងណាក្តី Engro Food បានជួបប្រទះនឹងបញ្ហាប្រឈមមួយចំនួន ដោយសារការងារតម្រូវឱ្យស្ត្រីជិះម៉ូតូជុំវិញភូមិរបស់ពួកគេ ហើយសកម្មភាពបែបនេះមិនសូវត្រូវបានអនុវត្តក្នុងតំបន់ជនបទនោះទេ។ ជាទំនៀមទំលាប់ ស្ត្រីស្នាក់នៅក្នុងផ្ទះ និងមិនត្រូវបានអនុញ្ញាតឱ្យមានទំនាក់ទំនងជាមួយបុរសពីភូមិផ្សេងៗនោះទេ។ យ៉ាងណាមិញ Engro បានរកឃើញថានៅពេលដែលសហគ្រិនស្ត្រីបានបំប្លែងទៅជាអាជីវកម្មបែបគ្រួសារ ដែលពួកគេអាចផ្លាស់ទីជុំវិញភូមិ​ជាមួយ​ប្ដី ឪពុក ឬ​បង​ប្អូនបានងាយស្រួលជាងមុន។ នៅពេលដែលកម្មវិធីសម្រាប់ស្ត្រីបង្ហាញពីការលំបាកក្នុងការអនុវត្ត ការចូលរួមពីសមាជិកគ្រួសារជាបុរសជួយពួកគេឱ្យទទួលបានជោគជ័យ។ ដូច្នោះហើយ អាជីវកម្មត្រូវតែសិក្សាស្វែងយល់ពីឧបសគ្គខាងយេនឌ័រ និងស្វែងរកវិធីដើម្បីបង្កើតឱកាសសម្រាប់ស្ត្រី ដោយមិនបង្កើនសម្ពាធបន្ថែមទៀតពីអ្វីដែលពួកគេកំពុងជួបប្រទះនៅក្នុងគ្រួសារ និងសហគមន៍របស់ពួកគេ៕