បរទេស ៖ ប្រទេសជប៉ុនទើបតែទទួលរងនូវការវាយប្រហារដោយគ្រោះរញ្ជួយដីកម្រិត ៧,៥រិចទ័រកាលពីថ្ងៃបុណ្យចូលឆ្នាំសកលកន្លងទៅថ្មីៗនេះ និងបានបណ្តាលឲ្យពលរដ្ឋចំនួន៧៣នាក់បានបាត់បង់ជីវិតគិតត្រឹមល្ងាចថ្ងៃពុធសប្តាហ៍នេះ។
ហេតុការណ៍នេះមិនមែនជារឿងថ្មីឡើយសម្រាប់ប្រទេសដែនកោះមួយនេះតាំងតែពីពេលកកើតប្រទេសមក ពីព្រោះថាជប៉ុនលាតសន្ធឹងលើសណ្ឋានដីដែលមានសកម្មភាពខ្លាំងបំផុតលើភពផែនដីនេះដែលធ្វើឲ្យពលរដ្ឋជប៉ុនទទួលរងការវាយប្រហារយ៉ាងហោចណាស់២០ភាគរយនៃគ្រោះរញ្ជួយដីសរុបនៅទូទាំងពិភពលោកដែលមានកម្រិតចាប់ពី៦រិចទ័រឡើងទៅ ហើយជាមធ្យមរៀងរាល់៥នាទីតែងកើតមានម្ដង។
ថ្វីត្បិតតែបច្ចេកវិទ្យាខ្លាំង សេដ្ឋកិច្ចខ្លាំងពិតមែន ប៉ុន្តែជប៉ុនមិនអាចរារាំង និងបង្ការគ្រោះធម្មជាតិមួយនេះបានឡើយ តែវាបានបង្ខំឲ្យជប៉ុនក្លាយខ្លួនជាប្រទេសដែលត្រូវតែវិនិយោគខ្លាំងទៅលើវិធីសាស្ត្រនៃកិច្ចការពារខ្លួន និងការត្រៀមខ្លួនទុកជាមុន ដើម្បីអាចសម្របខ្លួនរស់នៅជាមួយនឹងហេតុការណ៍នេះជាមួយគ្នាបន្តទៀត។
វិធីសាស្ត្រទាំងនោះរាប់ចាប់តាំងពីការសាងសង់អគារស្របទៅតាមច្បាប់សំណង់ដែលទាមទារចាំបាច់នូវការបញ្ចូលគ្នាជាមួយនឹងបច្ចេកវិទ្យាទំនើបអាចការពារគ្រោះរញ្ជួយដីបានដែលគិតមកទល់ពេលនេះដំណើរការនេះបានសម្រេចបានប្រមាណជា៨៧ភាគរយរួចមកហើយចំពោះគ្រប់សំណង់អគារ (គិតត្រឹមក្នុងទីក្រុងតូក្យូ) និងកំពុងរៀបចំទៅកាន់ទីក្រុងផ្សេងទៀតក្នុងប្រទេស។
ការកសាងបណ្តាញប្រព័ន្ធប្រកាសព័ត៌មានបន្ទាន់ដ៏មានប្រសិទ្ធភាពដូចជាកម្មវិធីទូរស័ព្ទសម្រាប់ហេតុការណ៍ស៊ូណាមិ និងគ្រោះរញ្ជួយដីផងដែរ ដែលពលរដ្ឋទាំងអស់អាចទទួលបានដំណឹងយ៉ាងហោចណាស់រយៈពេល ៥ ទៅ ១០វិនាទី មុនពេលហេតុការណ៍ធម្មជាតិនោះអាចកើតឡើងនៅទីតាំងរបស់ពួកគេ ជាពិសេស ប្រព័ន្ធផ្លូវរថភ្លើងល្បឿនលឿនដែលអាចដឹងជាមុននូវហេតុការណ៍គ្រោះធម្មជាតិ។
គួរឲ្យដឹងដែរថា បណ្តារថភ្លើងល្បឿនលឿនរបស់ជប៉ុន Shinkansen (bullet trains) ទាំងអស់មានបំពាក់ sensor ដែលអាចបញ្ជាឲ្យរថភ្លើងទាំងនោះបញ្ឈប់ការធ្វើដំណើរភ្លាមៗដោយស្វ័យប្រវត្តិ និងអនុញ្ញាតឲ្យអ្នកដំណើរធ្វើការចាកចេញក្នុងករណីមានការវាយប្រហារដោយគ្រោះរញ្ជួយដី ឬស៊ូណាមិ។
ជាក់ស្តែង កាលពីឆ្នាំ២០១១ក្នុងអំឡុងពេលវាយប្រហារដោយគ្រោះរញ្ជួយដីកម្រិតដល់ទៅ៩រិចទ័រ ប៉ុន្តែរថភ្លើងល្បឿនលឿនដែលកំពុងដំណើរការទាំងអស់ចំនួន២៧ខ្សែដែលមានបំពាក់បច្ចេកវិទ្យាបញ្ឈប់ដោយស្វ័យប្រវត្តិនេះបានធ្វើឲ្យករណីបាត់បង់ជីវិត ឬរបួសមិនមានឡើយសូម្បីតែមួយករណី។
ក្រៅពីនោះគេសង្កេតឃើញផងដែរនូវប្រព័ន្ធទូរទស្សន៍ដ៏ទំនើបដែលអាចប្តូរប៉ុស្ត៍ទាំងអស់ទៅកាន់ប៉ុស្តិ៍ដែលប្រកាសអាសន្នចំពោះហេតុការណ៍ធម្មជាតិជំនួសវិញភ្លាមៗដើម្បីប្រកាសដំណឹងជូនពលរដ្ឋនៅគ្រប់តំបន់ទាំងអស់។
អ្វីដែលជាការវិនិយោគដ៏ខ្លាំងក្លាបំផុតរបស់ជប៉ុនសម្រាប់ការបង្ការ និងការត្រៀមខ្លួនក្នុងការរស់នៅជាមួយនឹងគ្រោះធម្មជាតិប្រភេទនេះ គឺការអប់រំ និងបង្រៀនប្រជាជនចាប់តាំងតែពីថ្នាក់តូចៗឲ្យយល់ដឹងពីរបៀបការពារខ្លួនគេចខ្លួន និងយល់អំពីរបៀបនៃការជួយសង្គ្រោះខ្លួនឯងចេញពីគ្រោះថ្នាក់ផង។
ក្រៅពីនោះ នៅមានវិធីសាស្ត្រជាច្រើន និងមានតម្លៃរាប់ពាន់លានដុល្លារផ្សេងទៀតដែលជប៉ុនបានរៀបចំ និងវិនិយោគកន្លងមក ដូចជា សារមន្ទីរនៃការចងចាំសម្រាប់គ្រោះមហន្តរាយធម្មជាតិសម្រាប់ពលរដ្ឋជំនាន់ក្រោយ, ការត្រៀមទុកនូវកញ្ចប់សង្គ្រោះបន្ទាន់ជាទៀងទាត់ ក៏ដូចជាបច្ចេកវិទ្យាបង្ហូរទឹកចេញពីទីក្រុងក្នុងពេលដែលមានទឹកជំនន់ជន់លិចខ្លាំងជាដើមផងដែរ៕